މެޑްރިޑް (އޮކްޓޯބަރު 28) - ސްޕެނިޝް ލަލީގާގެ އެންމެ ވާދަވެރި ދެ ޓީމު ކަމަށްވާ ރެއާލް މެޑްރިޑާއި ބާސެލޯނާ ވާދަކުރާ "އެލް ކްލަސިކޯ" މެޗު، ރެއާލް މެޑްރިޑްގެ ވެރިން ބޮއިކޮޓްކޮށްފި އެވެ.
ދުނިޔޭގެ އެންމެ ގިނަ ބަޔަކު ބަލާ އެންމެ ފޯރިގަދަ މެޗުގެ ގޮތުގައި ފާހަގަވެފައި އޮންނަ އެލް ކްލަސިކޯ މިރޭ ކުޅޭނީ ބާސެލޯނާގެ ދަނޑުގަ އެވެ. މި މެޗަށް ރެއާލް މެޑްރިޑްގެ ވެރިންނަށް ވެސް ވަނީ ދައުވަތު ދީފަ އެވެ.
ނަމަވެސް މިވަގުތު ބާސެލޯނާއާ ދެކޮޅަށް ހިނގަމުން އަންނަ ރިޝްވަތު ދިނުމުގެ މައްސަލައިގެ ސަބަބުން ރެއާލްގެ ވެރިން ނިންމީ މި މެޗަށް ނުދާށެވެ.
ގަވާއިދާ ހިލާފަށް މާލީ މަންފާ ހޯދަން މަސައްކަތް ކުރި ކަމުގެ ތުހުމަތުތަކާއެކު، މަގާމުގެ ނުފޫޒުގައި ފައިދާތަކެއް ނަގަން ކޮރަޕްޝަންގެ އަމަލެއް ހިންގަން ބާސެލޯނާ އިން މަސައްކަތް ކޮށްފައިވާ ކަމަށް ބުނެ، ބާސެލޯނާގެ ކޯޓަކުން އެ ކުލަބާ ދެކޮޅަށް ތަހުގީގެއްކުރަމުން އަންނައިރު މި މައްސަލައިގައި މިހާތަނަށް ބާސެލޯނާގެ ވެރިންނަށް ވަނީ ރިޝްވަތުގެ ދައުވާ ވެސް އުފުލައިފަ އެވެ.
މިއީ، ސްޕެއިން ލީގުގެ ރެފްރީސް ކޮމިޓީގައި އިސްކޮށް އުޅުނު ނެގްރެއިރާގެ ހިއްސާ އޮންނަ ކުންފުންޏަކަށް ބާސެލޯނާ އިން 2001 ވަނަ އަހަރުން 2018 ވަނަ އަހަރަށް ޖުމްލަ ނުވަ މިލިއަން ޑޮލަރު ދީފައިވާ ކަމަށް ހެކި ލިބެން ހުރުމުން ބާސެލޯނާގެ ވެރިންނާ ދެކޮޅަށް ކޮށްފައިވާ ދައުވާއެކެވެ.
ސްޕެއިންގެ ކޯޓުން ބަލަމުން އަންނަ މި މައްސަލައިގައި ބާސެލޯނާ އަށް ހަރުކަށި ފިޔަވަޅު އެޅުމަށް އެންމެ ބޮޑަށް ގޮވާލަމުން އަންނަ އެއް ކުލަބަކީ ވާދަވެރި ރެއާލް މެޑްރިޑެވެ. މިގޮތުން، އެ ކުލަބު ސަސްޕެންޑްކޮށް، ރިޝްވަތުގެ ތުހުމަތު އަމާޒުވެފައިވާ މުއްދަތުގައި ލިބިފައިވާ ޓްރޮފީތައް އަތުލަން ވެސް ރެއާލް އިން ވަނީ ގޮވާލާފަ އެވެ.
ބާސެލޯނާ އާއި ރެއާލް މެޑްރިޑްގެ ވެރިންގެ ދެމެދުގައި މައްސަލަ ހޫނުވި އަނެއް ސަބަބަކީ ދާދި ފަހުން ބާސެލޯނާ އިން ޓްވީޓު ކުރި ވީޑިއޯ އެވެ. އެ ވީޑިއޯގައި ރެއާލް މެޑްރިޑަކީ ރެފްރީން "ފޭވާ" ކުރާ ކުލަބެއް ކަމަށް ބުނެ، ރެފްރީން ރެއާލްއާ އެއްކޮޅަށް ގިނަ ނިންމުންތަކެއް ނިންމާ ކަމަށް ތުހުމަތުކޮށްފައިވެ އެވެ.
މިރޭ ކުޅޭ އެލް ކްލަސިކޯ މެޗު ބަލަން ރެއާލްގެ ރައީސް ވަޑައިނުގަންނަވާނެ ކަމަށް ވިދާޅުވެފައިވާތީ އެކަމާ ގުޅޭ ގޮތުން ކޯޗު ކާލޯ އެންޗެލޮޓީއާ ސުވާލު ކުރުމުން ބުނީ ކުލަބުގެ ވެރިން ނިންމާނީ ކުލަބަށް ފައިދާ ހުރި ގޮތެއް ކަމަށާއި، އެކަމާ ގުޅޭ ގޮތުން އެއްޗެއް ބުނަން ބޭނުން ނުވާ ކަމަށެވެ.
