ގައުމީ ޔޫތު ޗެމްޕިއަންޝިޕް 2023 ގެ އަންހެނުންގެ ޓީ20 ކްރިކެޓް ޝިލްޑް ޗެމްޕިއަންކަން ލ. ކުނަހަންދޫ އަންހެން ޓީމު ހޯދައިފި އެވެ.
ތިން ޓީމް ވާދަކުރި މުބާރާތުގެ ފައިނަލުގައި ކުނަހަންދޫ ނުކުތީ ފުވައްމުލަކު ސިޓީއާ ދެކޮޅަށެވެ. ފައިނަލު މެޗުގެ ކުރިން ލީގު ބުރުގައި މި ދެ ޓީމު ކުޅުނު ތިން މެޗުގެ ތެރެއިން ދެ މެޗު ކާމިޔާބުކުރީ ފުވައްމުލަކުންނެވެ. ނަމަވެސް ފައިނަލް މެޗުގައި ފުވައްމުލަކު ޓީމުގެ މައްޗަށް ކުނަހަންދޫ އިން ވަނީ 36 ލަނޑުން ކުރި ހޯދައިފަ އެވެ.
ފައިނަލް މެޗުގައި ޓޮސް ދިމާވުމުން ފުވައްމުލަކު އަންހެން ޓީމުން ގަސްދުކުރީ ހޮވަން އަރާށެވެ. ކުނަހަންދޫ ޓީމުން ކުޅެން އަރައި، 20 އޯވަރުގެ ތެރޭގައި ފަސް ކުޅުންތެރިން ނުބައިވެގެން 125 ލަނޑު ހެދި އެވެ.
ކުނަހަންދޫ ޓީމަށް އެންމެ ރަނގަޅަށް ކުޅުނީ ނުބައިނުވެ 61 ބޯޅައިން 76 ލަނޑު ހެދި ސުމައްޔާ ހަމީދު އެވެ. މި އިނިންގްސްގައި ފުވައްމުލަކު ޓީމުގެ ފާތިމަތު އަނާލް އާއި ފާތިމަތު މާހާ ވަނީ ކޮންމެ ކުޅުންތެރިއަކު ދެ ވިކެޓު ނަގައިފަ އެވެ.
ޖަވާބުގައި ފުވައްމުލަކު ޓީމުން ކުޅެން އަރައި 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން ހެދުނީ 89 ލަނޑެވެ. އެ ޓީމުން އެންމެ ރަނގަޅަށް ކުޅުނީ 22 ބޯޅައިން 16 ލަނޑު ހެދި ކެޕްޓަން އައިޝަތު އައިމާ އެވެ. ދެން އެންމެ ރަނގަޅަށް ކުޅުނީ 22 ބޯޅައިން 13 ލަނޑު ހެދި މަރިޔަމް ސަމާ 13 އެވެ.
ފައިނަލް މެޗުގެ މޮޅު ކުޅުންތެރިއަކަށް ހޮވުނީ ކުނަހަންދޫގެ ސުމައްޔާ ހަމީދު އެވެ. 324 ލަނޑާ އެކު މުބާރާތުގައި އެންމެ ގިނަ ލަނޑު ހެދި ކުޅުންތެރިއަކީ ވެސް ސުމައްޔާ އެވެ. ދެ ވަނަ އަށް އެންމެ ގިނަ ލަނޑު ހެދީ ކުނަހަންދޫ ޓީމްގެ ފާތިމަތު ސަޖާ އެވެ. އެއީ 230 ލަނޑެވެ.
20 ވިކެޓާ އެކު މުބާރާތުގައި އެންމެ ގިނަ ވިކެޓު ނެގި ކުޅުންތެރިޔަކީ ކުނަހަންދޫގެ ނަބާ ބިންތި ނަސީމް އެވެ. ދެ ވަނަ އަށް އެންމެ ގިނަ ވިކެޓު ނެގި ފުވައްމުލަކުގެ އައިޝަތު މީސާ ވަނީ 16 ވިކެޓު ނަގައިފަ އެވެ. ފުވައްމުލަކުގެ ފާތިމަތު އަނާލް ވެސް މި މުބާރާތުގައި 14 ވިކެޓު ނެގި އެވެ.
މި މުބާރާތަކީ ކުނަހަންދޫގެ އަންހެން ޓީމް ގައުމީ ލެވެލްގައި ކާމިޔާބުކުރި ތިން ވަނަ މުބާރާތެވެ. މީގެ ކުރިން، 2018، 2019 ގައި ވެސް އެ ޓީމުން ވަނީ އަންހެން ކްރިކެޓު މުބާރާތް ކާމިޔާބުކޮށްފަ އެވެ.
