އަބިޖަން، އައިވަރީ ކޮސްޓް (އޮކްޓޯބަރު 14) - އަންނަ ޖެނުއަރީ މަހު ފަށާ އެފްރިކަން ކަޕް އޮފް ނޭޝަންސް 2023ގައި އެންމެ ފަހުގެ ޗެމްޕިއަން ސެނެގާލް އާއި ކެމަރޫން އެއް ގްރޫޕެއްގައި ލައްވާލައިފި އެވެ.
އައިވަރީ ކޮސްޓުގައި މިދިޔަ ޖޫން-ޖުލައިގައި ބާއްވަން އުޅުނު މުބާރާތް އަންނަ ޖެނުއަރީ މަހަށް ފަސްކުރަން ޖެހުނީ އެ ގައުމުގެ ވާރޭ ވެހޭ މޫސުމާ ދިމާވާތީ މެޗުތަކަށް އެކަމުގެ އަސަރުކުރާނެ ކަމަށް ބެލެވޭތީ އެވެ. އެ ގޮތުން، 2024ގައި މުބާރާތުގެ މެޗުތައް ކުޅުނު ނަމަވެސް މުބާރާތުގެ ނަމުގައި އޮންނާނީ 2023 އެވެ.
ޖެނުއަރީ އަދި ފެބްރުއަރީގައި އޮންނަ އެފްރިކަން ކަޕް އޮފް ނޭޝަންސްގެ ގްރޫޕް ސްޓޭޖުގައި އެންމެ ފަހުގެ ޗެމްޕިއަން ސެނެގާލް ނުކުންނާނީ ފަސް ފަހަރު ތަށި ހޯދާފައިވާ ކެމަރޫން، ގެމްބިއާ އަދި ގިނީއާ ދެކޮޅަށެވެ.
ގްރޫޕް އޭގައި މުބާރާތް ބާއްވާ ގައުމު އައިވަރީ ކޮސްޓާއި ތިން ފަހަރު ތަށި ހޯދާފައިވާ ނައިޖީރިއާގެ އިތުރުން ދެން ހިމެނެނީ އިކުއިޓޯރިއަލް ޖިނީ އާއި ޖިނީ ބިސާއޫ އެވެ.
މުބާރާތުގެ އެންމެ ކާމިޔާބު ޓީމް ކަމަށްވާ މިސްރު އޮތީ ގްރޫޕް ބީގަ އެވެ. ހަތް ފަހަރު ތަށި ހޯދާފައިވާ މިސްރާ އެކު މި ގްރޫޕްގައި ދެން ހިމެނެނީ ހަތަރު ފަހަރުގެ ޗެމްޕިއަން ގާނާ، ކޭޕް ވާޑޭ އަދި މޮޒަމްބީކް އެވެ.
ގްރޫޕް ޑީގައި އޮތީ ދެ ފަހަރު ތަށި ހޯދާފައިވާ އަލްޖީރިއާ، ބުކީނާ ފަސޯ، އެންގޯލާ އަދި މައުރިޓާނިއާ އެވެ. ގްރޫޕް އީގައި އޮތީ 2004ގެ ޗެމްޕިއަން، ޓިއުނީޝީއާ، މާލީ 1996ގެ ޗެމްޕިއަން ސައުތު އެފްރިކާ އަދި ނެމީބިއާ އެވެ.
ގްރޫޕް އެފްގައި ކުރީގެ ތިން ޗެމްޕިއަނުން ހިމެނެ އެވެ. އެއީ 1976ގެ ޗެމްޕިއަން މޮރޮކޯ، 2012ގެ ޗެމްޕިއަން ޒެމްބިއާ، 1968 އާއި 1974ގެ ޗެމްޕިއަން ޑިމޮކްރެޓިކް ރިޕަބްލިކް އޮފް ކޮންގޯގެ އިތުރުން ޓަންޒޭނިއާ އެވެ.
އެފްރިކަން ކަޕް އޮފް ނޭޝަންސް 2023 ކުރިއަށްދާނީ އައިވޮރީ ކޮސްޓުގެ ހަ ސްޓޭޑިއަމެއްގައި ޖެނުއަރީ 13 އިން ފެށިގެން ފެބްރުއަރީ 11 އަށެވެ. މުބާރާތުގެ ގްރޫޕް ސްޓޭޖަށްފަހު ނޮކްއައުޓްބުރުން ޖާގަ ހޯދާނީ ގްރޫޕްގެ ގަދަ ދެ ޓީމްގެ އިތުރުން، ތިން ވަނައަށްދާ ޓީމްތަކުގެ ތެރެއިން ރަނގަޅު ނަތީޖާ ހޯދާ ހަތަރު ޓީމެކެވެ.
