ނިއު ދިއްލީ (އޮކްޓޯބަރު) - އައިސީސީ ކްރިކެޓް ވޯލްޑް ކަޕްގައި އިންޑިއާގެ ޓީމުން ކުޅޭ ދެވަނަ މެޗުގައި މާދަމާ އަފްގާނިސްތާނާ ދެކޮޅަށް ނުކުންނައިރު، މި މެޗުގައި ވެސް އެ ޓީމުގެ އޯޕަނިން ބެޓްސްމަން ޝުބްމަން ގިލް އަށް ނުކުޅެވޭނެކަން ކަށަވަރުވެއްޖެއެވެ.
އިންޑިއާގައި ކުރިއަށްދާ ވަންޑޭ އިންޓަނޭޝަނަލް (އޯޑީއައި) ވޯލްޑް ކަޕްގައި އިންޑިއާގެ ޓީމުން ކުޅުނު ފުރަތަމަ މެޗުގައި އޮސްޓްރޭލިއާ އަތުން އެ ޓީމު މޮޅުވިއިރު، އެ މެޗުގައި ވެސް ޝުބްމަން ނުކުޅެއެވެ. އެ މެޗުގައި ގިލްގެ ބަދަލުގައި ރޯހިތު ޝަރުމާއާ އެކު އިންޑިއާގެ އޯޕަނިން އަށް ނުކުތީ އިޝާން ކިޝާން އެވެ.
ޝުބްމަން، 24، އަށް އޮސްޓްރޭލިއާ މެޗު ގެއްލުނީ ޑެންގޫ ޖެހިގެންނެވެ. އަދި ދެ ވަނަ މެޗަށް ވެސް އޭނާ ފިޓެއްނުވި އެވެ.
އިންޑިއާގެ ކްރިކެޓް ބޯޑުން ބުނީ ދެ ވަނަ މެޗަށް ޓީމާއެކު ނިއު ދިއްލީ އަށް ޝުބްމަން ދަތުރެއްނުކުރެ އެވެ. އަދި އޭނާ މެޑިކަލް ޓީމުގެ ބެލުމުގެ ދަށުން ޗެންނާއީގައި މަޑުކޮށްފައިވާ ކަމަށެވެ.
އިންޑިއާގެ ހެޑް ކޯޗު ރާހުލް ޑްރާވިޑް ބުނީ ޝުބްމަންގެ ހާލު ކުރިއަށްވުރެ ރަނގަޅު ކަމަށެވެ. އެކަމަކު މެޗު ކުޅެވޭވަރަށް އޭނާ އަދި ފިޓުނުވާ ކަމަށެވެ.
ޝުބްމަން އަކީ އިންޑިއާ އިން 2018 ވަަނަ އަހަރު 19 އަހަރުން ދަށުގެ ކްރިކެޓް ވޯލްޑް ކަޕްގެ ޗެމްޕިއަންކަން ހޯދިއިރު މުބާރާތުގެ މޮޅު ކުޅުންތެރިޔާ އެވެ. މި ފަހަރުގެ އޯޑީއައި ވޯލްޑް ކަޕަށް އިންޑިއާ އިން ނެގި ސްކޮޑުގައި ޝުބްމަން ހިމެނި އެންމެ ބޮޑު ސަބަބަކީ މިދިިޔަ ދެ އަހަރެއްހާ ދުވަސްތެރޭ ފޯމު ނުގެއްލި އޭނާ ދަށްކަމުން އައި މޮޅު ކުޅުމުގެ ސަބަބުންނެވެ.
