ލެވަކޫސެން (އޮކްޓޫބަރު 9) - ޖަރުމަނު ލީގުގައި މި ފަހަރު މޮޅު ކުޅުމެއް ދައްކަމުން އަންނަ ބަޔާ ލެވަކޫސަން އިން 3-0 އިން ކޮލޯން ބަލިކޮށް ފޯމު ދެމެހެއްޓިއިރު، ބަޔާން މިއުނިކުން 3-0 އިން ފްރެއިބާގު ބަލިކޮށްފި އެވެ.
ޖަރުމަނު ލީގުގެ އެއް ވަނައިގައި މިވަގުތު 19 ޕޮއިންޓާ އެކު އޮތީ ލެވަކޫސަން އެވެ. ދެ ވަނައިގައި 18 ޕޮއިންޓް ހޯދައިގެން ސްޓުޓްގާޓް އޮތްއިރު ތިން ވަނައިގައި އޮތީ 17 ޕޮއިންޓާ އެކު ބަޔާން އެވެ. ހަތަރު ވަނައިގައި އޮތް ބޮރޫޝިއާ ޑޯޓްމުންޑަށް ވެސް ލިބިފައިވަނީ 17 ޕޮއިންޓެވެ.
ކޯޗު ޒަބީ އަލޮންސޯއާ އެކު ރަނގަޅު ނަތީޖާތަކެއް ނެރެމުން އަންނަ ލެވަކޫސަން މޮޅުވި މެޗުގައި އެ ޓީމުގެ ގޯލުތައް ޖަހައިދިނީ ޖޯނަސް ހޮފްމަން، ޖެރެމީ ފްރިންޕޮންގް އަދި ވިކްޓާ ބޮނިފޭސް އެވެ. މި މެޗު ޖެހި ގޯލާ އެކު ބޮނިފޭސް ވެފައިވަނީ ލެވަކޫސެން އަށް ކުޅުނު ފުރަތަމަ ހަތް މެޗުގައި ހަތް ގޯލު ޖެހި ހަތަރު ވަނަ ކުޅުންތެރިޔާ އަށެވެ.
ބަޔާނުން ފްރެއިބާގު އަތުން މޮޅުވި މެޗުގައި ކިންގްސްލީ ކޯމަން ދެ ގޯލު ޖެހި އެވެ. އެ ޓީމުގެ އަނެއް ގޯލު ޖަހައިދިނީ ލެރޮއީ ސާނޭ އެވެ.
ބުންޑަސް ލީގާގައި ރޭ އައިންޓްރެކްޓް ފްރެންކްފާޓުން ވަނީ ހެއިޑެންހެއިމް 2-0 އިން ބަލިކޮށްފަ އެވެ. މެޗުގައި އެ ޓީމުގެ ދެ ގޯލު ޖަހައިދިނީ ހޫގޯ ލާސަން އާއި އަންސްގާ ނައުފް އެވެ.
މިދިޔަ ހަފްތާ ބަންދަކީ ބުންޑަސް ލީގާގެ ކުރީގައި އުޅޭ ޓީމްތަކަށް ކާމިޔާބު ހަފްތާ އެކެވެ. މި ގޮތުން މިދިޔަ ހޮނިހިރު ދުވަހު ޑޯޓްމުންޑާއި ސްޓުޓްގާޑު ވެސް ވަނީ މޮޅުވެފަ އެވެ. ޑޯޓްމުންޑް މޮޅުވީ 4-2 އިން ޔޫނިއަން ބާލިން އަތުންނެވެ. ސްޓުޓްގާޑް މޮޅުވީ 3-1 އިން ވުލްފްސްބާގުންނެވެ.
