މިއުނިކް (އޮކްޓޯބަރު 6) - ކުރު މުއްދަތެއްގެ ކޮންޓްރެކްޓެއްގައި، ބަޔާން މިއުނިކްގެ ކުރީގެ ޑިފެންޑަރު ޖެރޯމް ބޯޓެން އަލުން ސޮއިކުރަން އެ ކުލަބުން ވިސްނަން ފަށައިފި އެވެ.
ބޯޓެން 35، އަކީ 2011 އިން ފެށިގެން 2021 އާ ހަމައަށް ބަޔާންއާ އެކު ކާމިޔާބު ސީޒަންތަކެއް ހޭދަކުރި ކުޅުންތެރިއެކެވެ. އޭނާ ވަނީ އެ ކުލަބަށް 363 މެޗު ކުޅެދީ ޔޫރަޕްގެ އެންމެ ބޮޑު ފުޓްބޯޅަ މުބާރާތް ކަމަށް ޔުއެފާ ޗެމްޕިއަންސް ލީގު ދެ ފަހަރު ކާމިޔާބުކޮށްފަ އެވެ.
ޖަރުމަނުގެ ޗެމްޕިއަން ޓީމުން ދެ ވަނަ ފަހަރަށް ބޯޓެން ސޮއިކުރަން ވިސްނަން ފަށާފައިމިވަނީ އެ ކުލަބުގެ ޑިފެންޑަރު މަތައިސް ޑިލިޓް އަށް އަނިޔާވެ ކުޅުމާ ދުރަށްދާނެ ޖެހިފައިވުމުންނެވެ. މި ވަގުތު އެ ކުލަބުގައި ތިބި ސެންޓްރަލް ޑިފެންޑަރުންނަށް ބަލާއިރު ދިގު ސީޒަނަށް ކުޅުންތެރިން މަދުކަމަށް ކުލަބުން ގަބޫލުކުރެ އެވެ. އެހެންވެ ކުލަބުން އަންނަނީ ކުރު މުއްދަތެއްގެ ކޮންޓްރެކްޓެއްގައި ބޯޓެން ސޮއިކުރަން ވިސްނަމުންނެވެ.
މީގެ ދެ އަހަރު ކުރިން، 2021 ގައި ބަޔާން ދޫކޮށްލުމަށްފަހު ބޯޓެން މިދިޔަ ދެ ސީޒަންގައި ކުޅުނީ ފްރާންސްގެ އޮލިމްޕިކް ލިޔޯން އަށެވެ. މިދިޔަ ސީޒަނަށް ފަހު އެ ކުލަބުން ބޯޓެން ދޫކޮށްލުމުން، އޭނާ ހުރީ ކުޅޭނެ ކުލަބެއް ނެތިފަ އެވެ.
ބަޔާނުގެ އެދުމުގެ މަތިން ބޯޓެން އަންނަނީ އެކުލަބުގެ ފަރިތަކުރުންތަކުގައި ބައިވެރިވަމުންނެވެ. ޖަރުމަންގެ މީޑިއާ ރިޕޯޓްތައް ބުނާގޮތުން ބޯޓެންގެ ފިޓްނަސްއާ މެދު ކުލަބުން ހިތްހަމަޖެހެ އެވެ. އަދި މީގެ އިތުރުން އޭނާއަށް ލިބިފައިވާ ތަޖުރިބާ އާއި މިވަގުތުގެ ފޯމަށް ބަލާއިރު ކޯޗު ތޯމަސް ޓުޗެލް ވެސް ހުރީ ހިތްހަމަޖެހިފަ އެވެ.
ބޯޓެން ސޮއިކުރުމާ މެދު ގޮތެއް ނިންމުން ލަސްވާ ސަބަބަކީ އެ ކުލަބުން ޖެނުއަރީ މަހު ޑިފެންޑަރެއް ގަތުމަށް ނިންމާފައި އޮތުމެވެ. އެހެންކަމުން ކުލަބުން ރަނގަޅަށް ކުޅެމުން އަންނަ ދަނޑިވަޅެއްގައި އިތުރު ކުޅުންތެރިއެއް ޓީމަށް އިތުރުކޮށް ހަރަދުކުރަން ކުލަބުން ބޭނުންނުވެ އެވެ.
ބަޔާން އިން ބޯޓެން ސޮއިކުރާނަމަ އޭނާ ސޮއިކުރާނީ ހަމައެކަނި މި ސީޒަންގެ ނިޔަލަށެވެ. އެ ކުލަބުގެ އަމާޒަކީ ޖެނުއަރީ މަހު ނުވަތަ ހޫނު މޫސުމުގެ ޓްރާންސްފާގައި ކުލަބުން ބޭނުންވާ ފެންވަރުގެ ކުރިމަގު އޮތް ޑިފެންޑަރެއް އެކުލަބަށް ގެނައުމެވެ.
މި ވަގުތު ފުރަތަމަ އެގާރައިގައި ހިމެނިގެން ކުޅޭ ބަޔާންގެ ދެ ސެންޓްރަލް ޑިފެންޑަރުންނަކީ ފްރާންސްގެ ޑަޔޮޓް އުޕަމެކާނޯ އާއި ދެކުނު ކޮރެއާގެ ކިމް މިން ޖޭ އެވެ.
