މިއުނިކް (ސެޕްޓެމްބަރު 30) - މިދިޔަ ޓްރާންސްފާގައި އިނގިރޭސި ގައުމީ ޓީމްގެ މިޑްފިލްޑަރު ޑެކްލަން ރައިސް ނުގަތީ އޭނާ އަގުބޮޑުވުމުން ކަމަށް ބަޔާން މިއުނިކުން ބުނެފި އެވެ.
ރައިސް 24، އަކީ ޖަރުމަންގެ ޗެމްޕިއަން ބަޔާން މިއުނިކުން މިދިޔަ ހޫނު މޫސުމުގެ ޓްރާންސްފާގައި ގަންނަން އެންމެ ބޮޑަށް ބޭނުންވި އެއް ކުޅުންތެރިޔާ އެވެ. އެކުލަބުގެ ކޯޗު ތޯމަސް ޓުކެލް ބޭނުންވެގެން ރައިސް ގަތުމަށް ބަޔާނުން ވަނީ ވެސްޓްހަމް ޔުނައިޓެޑާ މަޝްވަރާވެސްކޮށްފަ އެވެ.
ނަމަވެސް 105 މިލިއަން ޕައުންޑުގެ ފީއަކަށް ރައިސް ބަދަލުވާން ނިންމީ އިނގިރޭސި ކުލަބު އާސެނަލް އަށެވެ.
ރައިސްއާ ގުޅޭގޮތުން ބަޔާންގެ ރައީސް ހާބާޓް ރައިނާ ވިދާޅުވީ އެކުލަބަށް ލިބިފައިއޮތް ބަޖެޓަށް ބަލާއިރު 100 މިލިއަން ޕައުންޑު ދީފައި މިޑްފިލްޑަރެއް ގަނެފި ނަމަ، ފޯވާޑެއް ގަންނަން އެކަށީގެންވާ ބަޖެޓެއް ނޯންނާނެތީ، ރައިސް ނުގަންނަން ނިންމީ ކަމަށެވެ.
"އަހަރުމެން ގަންނަން ބޭނުންވި ކުޅުންތެރިއެއް ރައިސް އަކީ. އެކަމަކު އޭނާގެ ވިއްކަން ވެސްޓް ހޭމް އިން ކީ އަގު މާބޮޑު. އެވަރު ދީފައި ކުލަބަށް މިޑްފިލްޑަރެއް ގަންނަން މާލީގޮތުން ގޮންޖެހުންތަކެއް ހުރި" ރައީސް ރައިނާ ވިދާޅުވި އެވެ.
ރައިސްގެ ބަދަލުގައި އެކުލަބުން މިޑްފިލްޑް ލައިން ވަރުގަދަކުރުމަށް ގެނައީ ލެއިޕްޒިގްގެ ކޮންރަޑް ލައިމާ އެވެ. އޭނާ ގެނައީ ހިލޭ ޓްރާންސްފާއެއްގަ އެވެ. މީގެ އިތުރުން ލޯން އުސޫލުން މެންޗެސްޓާ ޔުނައިޓެޑުގައި ހުރި މާސެލް ސަބިޓްޒާ ވެސް އެނބުރި ކުލަބަށް އައިސްފައިވުމުން ބަޔާނުން ބޮޑު އަގުގައި މިޑްފިލްޑަރެއް ގަންނަން ބޭނުން ނުވީ އެވެ.
ޖަރުމަނުން ޓްރާންސްފާގައި ގެނައި އެންމެ އަގުބޮޑު ކުޅުންތެރިއަކީ ފޯވާޑް ހެރީ ކޭން އެވެ. ކޭން 110 މިލިއަން ޕައުންޑު އެ ކުލަބުން ހޭދަކުރި އެވެ.
ރައިސް ނުލިބުމުން ޓްރާންސްފާގެ ފަހު ދުވަހު ބަޔާނުން ވަނީ އިނގިރޭސި ޕްރިމިއާ ލީގުގެ ފުލަމް އަށް ކުޅެމުން އަންނަ ޕަލީނިއާ ގަންނަން ވެސް މަސައްކަތްކޮށްފަ އެވެ. އެކަމަކު އެ ޑީލް ވެސް ފަހު ވަގުތު ކާމިޔާބުކުރެވޭ ގޮތެއް ނުވި އެވެ.
