މުމްބާއީ، އިންޑިއާ (ސެޕްޓެމްބަރު 30) -އިންޑިއާގައި ވިދަމުން އަންނަ ތަރި، ޝުބްމަން ގިލް ވެގެންދާނީ އިންޑިއާ ކްރިކެޓްގެ ދެ ވަނަ ވިރާތު ކޯލީ އަށް ކަމަށް ކްރިކެޓް ލެޖެންޑް ސުރޭޝް ރައިނާ ބުނެފި އެވެ.
ދާދި ފަހުން އިންޑިއާ އިން އޭޝިއާ ކަޕްގެ ޗެމްޕިއަންކަން ހޯދިއިރު، އެ މުބާރާތުގައި ތަރި އަކީ ޝުބްމަން, 24, އެވެ. ފަސް މެޗުން 302 ލަނޑު އެއްކޮށް މުބާރާތުގައި އެންމެ ސްކޯރިން ރަނގަޅު ކުޅުންތެރިއަކަށް ހޮވުނު ޝުބްމަން އަކީ އިންޑިއާގައި އަންނަ މަހުގެ ފަސް ވަނަ ދުވަހު ފަށާ ވަން ޑޭ އިންޓަނޭޝަނަލް (އޯޑީއައި) ކްރިކެޓް ވޯލްޑް ކަޕްގައި އެންމެ ގިނަ ބަޔެއްގެ ލޯ އަމާޒުވާނެ ކުޅުންތެރިޔާ އެވެ.
"ޔަގީންކަމެއް، އޭނަ (ޝުބްމަން) ވާނެ މި ފަހަރުގެ ވޯލްޑް ކަޕްގައި އަހަރެމެންގެ އެންމެ މުހިންމު ކުޅުންތެރިޔާ އަށް. އަހަންނަށް ހީވާ ގޮތުގައި އޭނާ ބޭނުންވޭ، އިންޑިއާ ކްރިކެޓްގައި ވިރާތު ކޯލީ ލެވަލްގެ ސުޕަ ސްޓާރަކަށް ވާން، އަހަންނަށް ފެންނަ ގޮތުގައި އޭނާ އަކީ އެ ކުޅުންތެރިޔާ،" ޖިއޯސިނަމާގައި ވާހަކަ ދައްކަމުން ސުރޭޝް ރައިނާ ބުންޏެވެ.
އިންޑިއާ އިން އަންނަ މަހު ފަސް ވަނަ ދުވަހު އޯޑީއައި ފުރަތަމަ މެޗުގައި ކުޅޭނީ އޮސްޓްރޭލިއާއާ އެވެ. މި މެޗު ކުޅޭނީ ޝުބްމަންގެ އުފަން ސަރަހައްދު ކަމަށްވާ ޗެންނާއީގެ ޗިދަމްބަރަމް ސްޓޭޑިއަމްގަ އެވެ. މިއީ ވެސް ވޯލްޑް ކަޕް ރަނގަޅު ފޯމެއްގައި ފަށަން ބަލާއިރު، ޝުބްމަން އަށް ފައިދާކުރާނެ ކަމެއް ކަމަށް ރައިނާ ގަބޫލުކުރެ އެެވެ.
ޝުބްމަން އަކީ އިންޑިއާ އިން 2018 ވަަނަ އަހަރު 19 އަހަރުން ދަށުގެ ކްރިކެޓް ވޯލްޑް ކަޕްގެ ޗެމްޕިއަންކަން ހޯދިއިރު މުބާރާތުގެ މޮޅު ކުޅުންތެރިޔާ އެވެ. މި ފަހަރުގެ އޯޑީއައި ވޯލްޑް ކަޕަށް އިންޑިއާ އިން ނެގި ސްކޮޑުގައި ޝުބްމަން ހިމެނި އެންމެ ބޮޑު ސަބަބަކީ މިދިިޔަ ދެ އަހަރެއްހާ ދުވަސްތެރޭ ފޯމު ނުގެއްލި އޭނާ ދަށްކަމުން އައި މޮޅު ކުޅުމުގެ ސަބަބުންނެވެ.
