ލަންޑަން (ސެޕްޓެމްބަރު 8) - އަންނަ އަހަރުގެ ޔޫރޯ ފުޓްބޯޅަ މުބާރާތަށް ފަހު އިންގްލެންޑްގެ ކޯޗަކަށް ހުރި ގަރެތު ސައުތުގޭޓްގެ ކޮންޓްރެކްޓް ހަމަވުމުން އެ މަގާމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ހަމަޖައްސަން އިނގިރޭސި އެފްއޭ އިން މަަސައްކަތް ކުރަމުން އަންނަ ކަމަށް ރިޕޯޓްތައް ބުނެފި އެވެ.
ސައުތުގޭޓް، 52، އިންގްލެންޑްގެ ކޮންޓްރެކްޓްގައި ހުރީ 2024 ވަނަ އަހަރުގެ ޑިސެމްބަރު މަހުގެ ނިޔަލަށެވެ. މިދިޔަ އަހަރުގެ ވޯލްޑް ކަޕްގެ ކުއާޓާ ފައިނަލުން އިންގްލެންޑް ކެޓުމާ އެކު ސައުތުގޭޓް މަގާމުން ވަކިކުރަން ޖެހޭ ކަމަށް ބުނެ، ގިނަ ސަޕޯޓަރުން އަޑުއުފުލި އެވެ. އެކަމަކު، އޭރު އިނގިރޭސި އެފްއޭ އިން ނިންމީ ކޮންޓްރެކްޓްގެ ނިޔަލަށް ސައުތުގޭޓް ބެހެއްޓުމަށެވެ.
އިނގިރޭސި އެފްއޭގެ އޮފިޝަލަކާ ހަވާލާދީ ދާދި ފަހުން ބައެއް މީޑިއާތަކުން ރިޕޯޓްކޮށްފައިވާ ގޮތުގައި އަންނަ އަހަރުގެ ޔޫރޯ އަށް ފަހު ސައުތުގޭޓް މަގާމުން ދުރުވާނެ އެވެ. އެއާ އެކު، އިންގްލެންޑްގެ ޓީމަށް އާ ކޯޗެއް ގެންނަން މިހާރު ވެސް އެފްއޭ އިން މަސައްކަތް ކުރަމުން އަންނަ ކަމަށާއި އާ ކޯޗެއް ހޯދާއިރު ލިސްޓުގެ އެންމެ ކުރީގައި އޮތީ ގާޑިއޯލާގެ ނަން ކަމަށެވެ.
ބާސެލޯނާ އާއި ބަޔާން މިއުނިކަށް މީގެ ކުރިން ކޯޗުކޮށްދިނުމަށް ފަހު، 2016 ވަނަ އަހަރުން ފެށިގެން މެންޗެސްޓާ ސިޓީ އަށް އިރުޝާދުދެމުން އަންނަ ގާޑިއޯލާއާ މީގެ ކުރިން ވެސް އިނގިރޭސި ކޯޗުކަމާ ގުޅުވައިގެން ސުވާލުތަކެއް އަމާޒުވި އެވެ. ގާޑިއޯލާ އެ ސުވާލުތަކަށް ޖަވާބުދިންއިރު، ސައުތުގޭޓަށް ތައުރީފުކޮށް ވާހަކަ ދައްކާފައިވެ އެވެ. އެކަމަކު، އިނގިރޭސި ގައުމީ ޓީމުގެ ކޯޗުކަމާ ހަވާލުވެދާނަންތޯ އެހި އެއްވެސް ސުވާލަކަށް ގާޑިއޯލާގެ ޖަވާބެއް ނުލިބުނެވެ.
މީގެ ކުރިން އެކި ފޯރަމްތަކުގައި ގާޑިއޯލާ ވަނީ ގައުމީ ޓީމަކާ ހަވާލުވުމަކީ ކެރިއަރުގެ ފަހުކޮޅުގައި ކުރާނެ ކަމެއް ކަމަށް ވަނީ ބުނެފަ އެވެ.
ގާޑިއޯލާ މި ވަގުތު ސިޓީގެ ކޮންޓްރެކްޓްގައި ހުރީ 2025 ވަނަ އަހަރުގެ ޖޫން މަހުގެ ނިޔަލަށެވެ. ރިޕޯޓްތައް ބުނާގޮތުން އެ ކޮންޓްރެކްޓް އާ ކުރުމުގެ ވިސްނުމެއް ގާޑިއޯލާގެ އަދި ނެތެވެ.
