ލަންޑަން (އޮގަސްޓް 28) - ބަދަލު ކުޅުންތެރިއެއްގެ ގޮތުގައި ކުޅެން އަރައި، ޑާވިން ނޫނޭޒް ޖެހި ދެ ގޯލުން، އެއް ކުޅުންތެރިއަކު މަދުކޮށް ކުޅުނު ލިވަޕޫލުން 2-1 އިން ނިއުކާސަލް ޔުނައިޓެޑް އަތުން މޮޅުވެއްޖެ އެވެ.
ލިވަޕޫލްގެ ޑިފެންޑަރު ޓްރެންޓް އަލެކްސަންޑާ އާނޯލްޑް ހެދި ގޯހެއްގެ ފައިދާނަގައި، މެޗުގެ 25 ވަނަ މިނިޓްގައި ނިއުކާސަލަށް ލީޑުނަގައިދިނީ އެންތަނީ ގޯޑަން އެވެ. އޭގެ ތިން މިނިޓް ފަހުން، ނިއުކާސަލްގެ އަލެކްސަންޑަ އިސާކަށް ލިވަޕޫލްގެ ކެޕްޓަން ވާޖިލް ވެން ޑައިކް ފައުލުކުރި ކަމަށް ނިންމައި، އޭނާ އަށް ސީދާ ރަތް ކާޑެއް ދެއްކި އެވެ.
އެއް ކުޅުންތެރިއަކު މަދުކޮށް ކުޅުނު ލިވަޕޫލް ކައިރިން ދެ ވަނަ ގޯލެއް ޖަހަން، ނިއުކާސަލް އިން ކުރި މަސައްްކަތުގައި އެ ޓީމުގެ މިގޭލް އަލްމިރޯން ޖެހި ޝޮޓެއް ގޯލުގެ ދަނޑިއަށް އަމާޒުވިއިރު، ލިވަޕޫލްގެ ކީޕަރު އެލިސަން ބެކާ ވެސް ވަނީ ރަނގަޅު ބޯޅަތަކެއް ހުއްޓުވައިފަ އެވެ.
ލިވަޕޫލް ކޮޅަށް ނަތީޖާ އެނބުރުނީ 77 ވަަނަ މިނިޓްގައި އަލެކްސިސް މެކް އަލިސްޓާގެ ބަދަލުގައި ނޫނޭޒް ކުޅެން އެރުވި ހިސާބުންނެވެ. ކުޅެން އެރިތާ ހަތަރު މިނިޓް ތެރޭ ނޫނޭޒް ވަނީ އޭރިއާ ތެރެއަށް ބޯޅަ ހިފައިގެން ލިބުނު ވަގުތުގެ ބޭނުންހިފައި ތިރިތިރިން ގޯލުގެ ދުރު ކަނަށް ފޮނުވާލައިފަ އެވެ. ނޫނޭޒް، ލިވަޕޫލް މޮޅުކޮށްދިން ލަނޑު ޖެހީ އިތުރު ވަގުތުގެ ތިން ވަނަ މިނިޓްގަ އެވެ. މިއީ މުހައްމަދު ސަލާހު ދިން ބޯޅައަކަށް އަރައި ނޫނޭޒް ޖެހި ގޯލެކެވެ.
އެންމެ ފަހުގެ ޗެމްޕިއަން، މެންޗެސްޓާ ސިޓީން ވަނީ 2-1 އިން ޝެފީލްޑް ޔުނައިޓެޑް ބަލިކޮށްފަ އެވެ. އާލިން ބްރައުޓް ހާލަންޑް އަތުން ޕެނަލްޓީއެއް ނާކާމިޔާބުވި ނަމަވެސް ފަހުން ގޯލެއް ޖަހައި އޭނާ ސިޓީ އަށް ލީޑުނަގައިދިނެވެ. އެކަމަކު، މެޗުގެ 85 ވަނަ މިނިޓްގައި ޖޭޑަން ބޮގްލް ޝެފީލްޑަށް އެއްވަރުކޮށްދިން ފަހުން ސިޓީ މޮޅުކޮށްދިން ގޯލު ޖެހީ ރޮޑްރީ އެވެ.
