މި މަހު 25 އިން އަންނަ މަހު ހަތަރަކަށް މަޑަގަސްކަރާގައި ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ސްރީ ލަންކާއާ ދެކޮޅަށް ކުޅޭ އެކުވެރިކަމުގެ މެޗުތަކުގެ ތެެރެއިން ފުރަތަމަ މެޗުގައި ގައުމީ އަންހެން ޓީމު ލަންކާ އަތުން ބަލިވެއްޖެ އެވެ.
މިއަދު ހަވީރު ޒުވާނުންގެ މަރުކަޒު އެތެރެ ކޯޓުގައި ކުޅުނު މެޗުން ލަންކާ މޮޅުވީ ސީދާ ތިން ސެޓުންނެވެ. ލަންކާ އިން ސެޓުތައް ގެންދިޔައީ 25-19، 25-18 އަދި 25-17 އިންނެވެ.
ފުރަތަަމަ ސެޓު ފަށައިގެން ލަންކާ އިން ލީޑުނަގައިގެން ކުޅެމުން ދިޔަ ނަމަވެސް ރާއްޖޭން ކުޅުން ރަނގަޅުކޮށް ލަންކާ އަށް ފައިޓެއް ދެވޭތޯ މަސައްކަތް ކުރި އެވެ. މެދުކެނޑުމަކަށް ފަހު، ގައުމީ ވޮލީ ޓީމަށް މި ފަހަރު އައިމިނަތު އަރީޝާ ވެސް އަންނަނީ ކުޅެމުންނެވެ. އަރީޝާ އާއި ހައްވާ ރާޝިދާ (ހައްވަ) އަދި ޝަހާ ޝާމިން ކުރި އެޓޭކްތަކާ އެކު ފުރަތަމަ ހާފުގެ ފަހުކޮޅުގައި ރާއްޖޭން ފަރަގު ކުޑަކުރި އެވެ.
ރާއްޖެ ޓީމުގެ ހައްވަ (ކ) ޝޮޓެއް ފޮނުވާލަނީ: މި މެޗުގައި ލަންކާ އިން ވަނީ ރާއްޖޭގެ ގިނަ އެޓޭކްތަކެއް ބްލޮކްކޮށްފައި.---- ފޮޓޯ: އަބްދުﷲ އިޔާން/ އަދަދު
ރާއްޖެ އަށް ފުރަތަމަ ސެޓު ގެއްލުނު ނަމަވެސް މި ސެޓުގެ ފަހުކޮޅުގައި ދެއްކި ރަނގަޅުކުޅުން ދެ ވަނަ ސެޓު ފެށިގެން ތަކުރާރުކުރި އެވެ. އެގޮތުން ރާއްޖެ، 0-3 އިން ލީޑު ވެސް ކުރި އެވެ. އެކަމަކު، މެޗުގެ ސްކޯ، 4-5 އިން ރާއްޖެ ކުރީގައި އޮއްވައި، ޓީމުގެ ސެންޓަ ކުޅުންތެރިޔާ، ނަރީމާ އިދުރީސް (ނަންނި)ގެ ކަކުލަށް އަނިޔާވެގެން ބަދަލުކުރަން ޖެހުމުން އޭގެ ސަބަބުން ޓީމަށް އަސަރުކޮށް، ކުރިން ދައްކަމުން އައި ކުޅުން ނުދެއްކި ލަންކާ ކޮޅަށް ނަތީޖާ އެނބުރުނީ އެވެ. ލަންކާ އިން ލީޑުގައި އޮވެ، ސެޓު ނިންމާލީ އެވެ.
ލަންކާ އިން ތިން ވަނަ ސެޓުގައި ރަނގަޅު ރޫހެއްގައި ކުޅެ، މާ ބޮޑު ޕްރެޝަރެއް ނެތި، މި ސެޓު ގެންގޮސްގެން މެޗުން މޮޅުވީ އެވެ. ލަންކާ ޓީމަށް މި މެޗުގައި އެންމެ ރަނގަޅު ކުޅުމެއް ދައްކައިދިނީ ރާއްޖޭގެ އެކި ޓީމުތަކަށް ކުޅެފައިވާ ތިލިނީ އެވެ.
ލަންކާ އާއި ރާއްޖޭގެ ފްރެންޑްލީ ވޮލީ ސީރީސްގައި މިރޭ 20:30 ގައި ގައުމީ ފިރިހެން ވޮލީ ޓީމުން ލަންކާއާ ބައްދަލުކުރާނެ އެވެ.
މީގެ ކުރިން ވެސް ދެ ފަަހަރެއްގެ މަތިން ލަންކާ ޓީމު ވަނީ މާލެ އައިސް ރާއްޖޭގެ ފިރިހެން ޓީމާ އެކު މެޗުތަކެއް ކުޅެފަ އެވެ. އެ ގޮތުން، 2019 ވަނަ އަަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ ކުރިންނާއި 2021 ވަނަ އަހަރުގެ ސެންޓްރަލް ޒޯން ވޮލީބޯޅަ މުބާރާތުގެ ކުރިން ލަންކާ ޓީމުން ވަނީ މާލޭގައި މެޗުތަކެއް ކުޅެފަ އެވެ.
