އިއްޔެ ކުޅެވިގެންދިޔަ މޯލްޑިވްސް ޓީ20 ޕްރެޒިޑެންޓް ކަޕް ކްރިކެޓް މުބާރާތުގެ ޗެމްޕިއަންކަން މިލާން ކްރިކެޓް އެކެޑަމީ އިންނެވެ.
ދެ ވަނަ ފަހަރަށް ބޭއްވި ޕްރެޒިޑެންޓް ކްރިކެޓް މުބާރާތުގެ ފައިނަލުގައި މިލާން ކްރިކެޓް އެކެޑަމީން މާލެ ވެޓެރަންސް ބަލިކުރީ އަށް ވިކެޓުންނެވެ.
އިއްޔެ މެންދުރު ކުޅިވަރު އެކުވެނި އެއް ނަމްބަރު ދަނޑުގައި ކުޅުނު މެޗުގައި ގުރުދިމާވުމުން މިލާނުން ނިންމީ ހޮވުމަށެވެ. އެ ގޮތުން، މާލޭ ވެޓްރަންސް އިން ކުޅެންރައި ހަ ކުޅުންތެރިން ނުބައިވެގެން 20 އޯވަރުގެތެރޭގައި ހެދިފައިވަނީ 122 ލަނޑެވެ. އެ ޓީމުން އެންމެ ރަގަޅަށް ކުޅުނީ 40 ބޯޅައިން 43 ލަނޑުހެދި ޗަންދަނާ އާއި 26 ބޯޅައިން 24 ލަނޑުހެދި ޕިޔާލް އެވެ.
މި އިންނިންގްސްގައި މިލާން ކްރިކެޓް އެކެޑަމީގެ އަހުމަދު އަމީލް ދެ ވިކެޓް އަދި ލީމް އާއި ރިޒާން ކޮންމެ ކުޅުންތެރިއަކު ވަނީ އެއް ވިކެޓް ނަގައިފަ އެވެ.
ޖަވާބުގައި މިލާނުން ކުޅެންއަރައި 18 ވަނަ އޯވަރުގައި 2 ކުޅުންތެރިން ނުބައިވެގެން 125 ލަނޑުހަދާ މެޗުން މޮޅުވި އެވެ.
މި މެޗުގައި މިލާނަށް އެންމެ ރަނގަޅު ކުޅުމެއް ދައްކައިދިނީ އަނިޔާއިން ރަނގަޅުވެގެން ކުޅުމަށް އެނބުރި އައިސް ރަނގަޅު ކުޅުމެއް ދައްކަމުން އަންނަ ޔޫސުފް އަޒްޔާން އެވެ. ފައިނަލް މެޗުގެ މޮޅު ކުޅުންތެރިއަކަށް ހޮވުނު، އަޒްޔާން ވަނީ 48 ބޯޅައިން 58 ލަނޑު ހަދައިފަ އެވެ. ދެން އެ ޓީމުގތެ ވިރަންދީޕް ސިންގް ވަނީ 27 ބޯޅައިން 39 ލަނޑު ހަދައިފަ އެވެ.
ފައިނަލް މެޗަށް ފަހު ބޭއްވި ރަސްމިއްޔާތުގައި ވަަނަތަކަށް ހޮވުނު ޓީމުތަކާއި ކުުޅުންތެރިންނަށް އިނާމް ދެއްވީ ކްރިކެޓް ބޯޑުގެ ރައީސް މުހައްމަދު ފައިސަލް އާއި އިއްޔެގެ މެޗުގެ ޝަރަފްވެރި މެހެމާން ކުރީގެ ކްރިކެޓް ކުޅުންތެރިޔާ، އަލްފާޝިލް ހަސަން ހަބީބު އެވެ.
