މެލްބާން، އޮސްޓްރޭލިއާ (އޮގަސްޓް 6) - ފީފާ ވިމެންސް ވޯލްޑް ކަޕްގެ އެންމެ ފަހުގެ ޗެމްޕިއަން، އެމެރިކާ މި ފަހަރުގެ މުބާރާތުގެ ގަދަ 16 ބުރުން ސްވިޑެން އަތުން ކަޓައިފި އެވެ.
ސްވިޑެން އިން އެމެރިކާ ބަލިކުރީ މިއަދު ކުޅުނު މެޗު ލަނޑެއް ނުޖެހި އެއްވަރުވެ، ޕެނަލްޓީ ޖަހައިގެން 5-4 އިންނެވެ.
މިއަދުގެ މެޗުގައި 120 މިނިޓް ކުޅުނުއިރު، އެމެރިކާ ހުއްޓުވުމުގައި އެންމެ ރަނގަޅު ކުޅުމެއް ދެއްކީ ސްވިޑެންގެ ކީޕަރު، ޒެސީރާ މުސޯވިޗް އެވެ. މުސޯވިޗް ވަނީ އެމެރިކާ އިން ފޮނުވާލި 11 ހަމަލާއެއް ހުއްޓުވައިފަ އެވެ.
ޕެނަލްޓީގައި ސްވިޑެން އިން ފޮނުވާލި ހަތް ޕެނަލްޓީގެ ތެރެއިން ފަސް ޕެނަލްޓީ ވަނީ ކާމިޔާބުކޮށްފަ އެވެ. އެމެރިކާ އިން ޖެހި ހަތް ޕެނަލްޓީގެ ތެރެއިން ހަތަރު ޕެނަލްޓީ ކާމިޔާބުކުރިއިރު، ތިން ޕެނަލްޓީ ވަނީ ނާކާމިޔާބުވެފަ އެވެ.
މިއީ، ފީފާ ވިމެންސް ވޯލްޑް ކަޕްގައި އެމެރިކާގެ އެންމެ ދަށް ނަތީޖާ އެވެ. ފީފާ ވިމެންސް ވޯލްޑް ކަޕްގައި މީގެ ކުރިން އެމެރިކާ އިން ވަނީ ހަތަރު ފަހަރު ޗެމްޕިއަންކަން ހޯދައިފަ އެވެ. އެންމެ ފަހުން، 2015 އާއި 2019 ވަނަ އަހަރު މި މުބާރާތް ބޭއްވިއިރު ވެސް ތަށި އުފުލާލީ އެމެރިކާ އިންނެވެ. ޗެމްޕިއަންކަން ހޯދުމުގެ އިތުރުން އެމެރިކާ އިން ވަނީ އެއް ފަހަރު ރަނަރަޕްކަން ހޯދައި، ތިން ފަހަރު ތިން ވަނަ ހޯދައިފަ އެވެ.
ގަދަ 16 ބުރުގައި މިއަދު ކުޅުނު އަނެއް މެޗުން ދެކުނު އެފްރިކާ އަތުން 2-0 އިން ނެދަލެންޑްސް މޮޅުވެ، ވަނީ ކުއާޓާ ފައިނަލުން ފުރުސަތު ހޯދައިފަ އެވެ. ނެދަލެންޑްސްގެ ގޯލުތައް ޖަހައިިދިނީ ޖިލް ރޫޑް އާއި ފަބިއެން ބީރެންސްޓޭން އެވެ.
