މިހާރު ކުރިއަށްދާ ކްލަބް މޯލްޑިވްސް ކަޕްގެ ގަދަ 16 ބުރުން ރޯޑް ރެކްރިއޭޝަން ކްލަބް (އާރްއާރްސީ) އާއި އެސްޓީއޯ ރެކްރިއޭޝަން ކްލަބް، ޓީމު ފެނަކަ އަދި ޓީމު އެފްއެސްއެމް ފުރުސަތު ހޯދައިފި އެވެ.
އެ ގޮތުން، އާރްއާރްސީން ވަނީ އެމްއޭސީއެލް އަތުން 1-0 އިން މޮޅުވެފަ އެވެ. މޯލްޑިވިއަންގެ މައްޗަށް 3-1 އިން އެސްޓީއޯ ކުރިހޯދިއިރު، އެންމެ ފަހުގެ ޗެމްޕިއަން، ފެނަކަ އިން ވަނީ 5-1 އިން ގޭސް ކްލަބް ބަލިކޮށްފަ އެވެ. އަދި އެފްއެސްއެމް އިން ވަނީ 5-0 އިން ކްލަބް ފެން އަތުން މޮޅުވެފަ އެވެ.
އެމްއޭސީއެލް ކޮޅަށް އާރްއާރްސީގެ ހަމައެކަނި ލަނޑު ޖެހީ އަލީ ހާފިޒް (ހާއްޕެ) ފޮނުވާލި ބޯޅައެއްގައި ހުސެއިން ގައްސާން ލަބީބް އެވެ. އެސްޓީއޯގެ ހުޒައިފަތު ރަޝީދު (ހުޒޭ) ދެ ގޯލު ޖެހިއިރު، އަނެއް ލަނޑު ޖެހީ އަހުމަދު ރިޒްވާން (ރިޒޭ) އެވެ. މޯލްޑިވިއަންގެ ހަމައެކަނި ލަނޑު ޖެހީ ހައްފާފު ސިދްގީ އެވެ.
ފެނަކަ އިން ގޭސް ކްލަބް ކޮޅަށް ލަނޑުތައް ޖެހީ މައްސޫދު މާޖިދު ފަލާހީ ދެ ގޯލާއި އައްޒާމް އަބްދުﷲ (އެޑޫ)، މުހައްމަދު އިޔާދު އަލީ އަދި ހުސެއިން ނާޝިދު (ނާއްޓޯ) އެވެ. ގޭސް ކްލަބްގެ ހަމައެކަނި ލަނޑު ޖެހީ އަހުމަދު ރަޝީދު (އައްމަޑޭ) އެވެ.
އެފްއެސްއެމް ޓީމަށް ރޭގެ މެޗުގައި ލަނޑުތައް ޖަހައިދިނީ އައިހަމް އަހުމަދު (އައިހު) ދެ ގޯލާއި މުހައްމަދު ނާފިއު އަހުމަދު އަދި އަބްދުﷲ ޒިޔާން އެވެ.
ކްލަބް މޯލްޑިވްސްގެ ދެ މުބާރާތެއްގެ މެޗުތައް މިއަދު ކުރިއަށްދާނެ އެވެ. އެ ގޮތުން، 17:00 ގައި ކުޅޭނީ އެއިޓީން ތާޓީ ފުޓްސަލް ފިއެސްޓާގައި ޓީމު ފެނަކަ އަދި ޕޮލިސް ކްލަބް ބައްދަލުކުރާ މެޗެވެ. އަދި މިރޭ އޮންނާނީ ކްލަބް މޯލްޑިވްސް ކްލަސިކް މުބާރާތުގެ ގަދަ 16 ބުރުގެ ފުރަތަމަ ހަތަރު މެޗެވެ. އެ ގޮތުން، 20:15 ގައި ފަށާ ދެ މެޗަށް ބަލާއިރު، ޓީމު ޑީޖޭއޭ ކުޅޭނީ ޓްރޭޑް ކްލަބާ އެވެ. އަދި ޓީމު ބަދަހިން ބައްދަލުކުރާނީ އެމްއެމްއޭ ސޯޝަލް ކްލަބާ އެވެ.
މިރޭގެ ފަހު މެޗުތައް 21:45 ގައި ފަށާއިރު، އެޗްޕީއެސްއެން ނުކުންނާނީ އޭސީސީ ރެކްރިއޭޝަން ކްލަބާ ދެކޮޅަށެވެ. އަދި އޮޑިޓާ ޖެނެރަލް އޮފީސް ކުޅެން ޖެހެނީ ޓްރާންސްޕޯޓް ރެކްރިއޭޝަންއާ އެވެ.
