ކްލަބް މޯލްޑިވްސް ކްލަސިކް މުބާރާތުގެ ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ، ފުރިހަމަ ރެކޯޑަކާ އެކު ޓީމު ޑީޖޭއޭ އާއި ކްލަބް 220 އިން ގަދަ 16 ބުރަށް ދަތުރުކޮށްފި އެވެ.
ގްރޫޕް ސީގެ ފަހު މެޗުތަކަށް ބަލާއިރު، ޑީޖޭއޭ އިން ވަނީ ރޭ އައިޖީއެމްއެޗް ކްލަބް އަތުން 4-2 އިން މޮޅުވެފަ އެވެ. އެ ގްރޫޕްގެ އަނެއް މެޗުން ޓްރާންސްފޯޓް ރެކްރިއޭޝަން ކްލަބް އަތުން ތައުލީމީ ގުޅުން ބަލިވީ 2-1 އިންނެވެ. އެ ގްރޫޕްގެ އެއް ވަނަ ޑީޖޭއޭ އިން ހޯދީ ނުވަ ޕޮއިންޓާ އެކު އެވެ. ދެ ވަނަ ހޯދި ޓްރާންސްޕޯޓަށް ހަ ޕޮއިންޓް ލިބުނުއިރު، ތިން ވަަނަ ހޯދި ތައުލީމީ ގުޅުމާއި ހަތަރެއްގައި ނިންމި އައިޖީއެމްއެޗް ކްލަބްގެ އޮތީ އެއް ޕޮއިންޓެވެ.
ކްލަބް 220 އިން ވަނީ ރޭ ގްރޫޕް ޑީގައި ކުޅުނު ފަހު މެޗުން ފޯރިގަދަ ކުޅުމަކަށް ފަހު 4-3 އިން ޓީމު ބަދަހި ބަލިކޮށް، ނުވަ ޕޮއިންޓާ އެކު ގްރޫޕްގެ އެއް ވަނަ ހޯދައިފަ އެވެ. މި ގްރޫޕްގެ ދެ ވަނަ ލިބުނީ ރޭ މެޓް އޮފީސް އަތުން 4-0 އިން މޮޅުވި ރައީސް އޮފީހަށެވެ. އެ ޓީމަށް ލިބުނީ ހަ ޕޮއިންޓެވެ. ބަދަހި ޓީމުން ގްރޫޕް ނިންމާލީ ތިން ޕޮއިންޓާ އެކު ތިން ވަނައިގަ އެވެ. ފުލަށް ދިޔަ މެޓް އޮފީހަށް ޕޮއިންޓެއް ނުލިބެ އެވެ.
ޑީޖޭއޭ އަށް ރޭގެ މެޗުގައި ލަނޑުތައް ޖަހައިދިނީ އަބްދުﷲ ރިމާހާއި ސައުދުﷲ އަހުމަދު، ކޮންމެ ކުޅުންތެރިއަކު ދެ ގޯލެވެ. އައިޖީއެމްއެޗްގެ ގޯލުތައް ޖެހީ މުހައްމަދު މުނާޒް އާއި އިބްރާހިމް ސޯލިހު އެވެ. ތައުލީމީ ގުޅުމުގެ އަހުމަދު ޝަދީދު އެ ޓީމުގެ ލަނޑު ޖެހިއިރު، ޓްރާންސްޕޯޓް މޮޅުވީ އަލީ މޫނިސް އާއި އިބްރާހިމް ނުހާމްގެ ގޯލުތަކުންނެވެ.
ރޭ ކްލަބް 220 ކުޅުނު މެޗުގައި އެ ޓީމުގެ ލަނޑުތައް ޖެހީ އަލީ އިކްރާމް (އައްޔަ) އާއި އަހުމަދު ސާމިހު ދެ ގޯލުގެ އިތުރުން، ބަދަހި ޓީމުގެ އިބްރާހިމް މޫނިސް އަތުން ބައިކޮޅަށް ވަން ގޯލެކެވެ. ބަދަހި ޓީމަށް މޫނިސް ދެ ގޯލު ޖަހައިދިންއިރު، އެ ޓީމުގެ ކެޕްޓަން، އާސިފް ހަނީފް ވެސް ވަނީ ލަނޑެއް ޖަހައިފަ އެވެ. މެޓް އޮފީސް ކޮޅަށް ރައީސް އޮފީހުގެ ގޯލުތައް ޖެހީ މުހައްމަދު އަޝްރަފް ދެ ގޯލާއި އާދަމް ރިޝާދު އަދި މުހައްމަދު ޝަފްރާން އިގްބާލް ގޯލެކެވެ.
ކްލަބް މޯލްޑިވްސް މުބާރާތްތަކުގައި މިއަދު ވެސް ފަސް މެޗެއް ކުޅެވިގެންދާނެ އެވެ. އެ ގޮތުން، ހަވީރު، 17:00 ގައި ކުޅޭނީ އަންހެން ޑިވިޝަނުގެ އެއިޓީން ތާޓީ ފިއެސްޓާ މުބާރާތުގައި ދިވެހި ސިފައިންގެ ކްލަބާއި ޕޮލިސް ކްލަބް އެވެ. މިރޭ ކުޅޭނީ ކްލަސިކް ޑިވިޝަނުގެ ހަތަރު މެެޗެވެ. އެ ގޮތުން، 20:15 ގައި ފަށާނީ އެޓާނީ ޖެނެރަލް އޮފީހާއި ހެލްތު ރެކްރިއޭޝަން ކްލަބްގެ މެޗާއި ހާރިޖީ އާއި ހަޔާ އެޑިއުކޭޝަން ބައްދަލުކުރާ މެޗެވެ. އަދި 21:45 ގައި ކުޅޭނީ ފެހިފަހި ކްލަބާއި އުމްރާނީގެ މެޗާއި މީރާ އާއި އެމްއެމްއޭ ބައްދަލުކުރާ މެޗެވެ.
