މިހާރު ކުރިއަށްދާ ކްލަބް މޯލްޑިވްސް ކްލަސިކް މުބާރާތުގައި ކުޅުނު ދެ ވަނަ މެޗުން ވެސް މޮޅުވެ، އެމްއެމްއޭ ސޯޝަލް ކްލަބާއި މީރާ ރެކްރިއޭޝަން ކްލަބް މުބާރާތުގެ ގަދަ 16 ބުރުން ފުރުސަތު ހޯދައިފި އެވެ.
ގްރޫޕް އެފްގައި އިއްޔެ ފެހިފަހި ކްލަބް އަތުން މީރާ މޮޅުވީ 3-0 އިންނެވެ. އެ ގްރޫޕްގެ އަނެއް މެޗުން، އެމްއެމްއޭ އިން ވަނީ އުމްރާނީ ކްލަބް އަތުން 4-1 އިން މޮޅުވެފަ އެވެ. މި ނަތީޖާތަކާ އެކު، އެމްއެމްއޭ އާއި މީރާ އިން ފުރަަތަމަ ދެ މެޗުން މޮޅުވެ، ނޮކައުޓް ބުރުގެ ޖާގަ ޔަގީންކުރީ އެވެ.
އިއްޔެ ހަވީރު ކުޅުނު މެޗުގައި މީރާ ޓީމުގެ ލަނޑުތައް ޖެހީ ހަސަން މާހިރު އާއި ނާހިލް ނައީމް އަދި އިމްހާން އިބްރާހިމް އެވެ. އެމްއެމްއޭ ޓީމުގެ ލަނޑުތައް ޖަހާފައިވަނީ ނާއިފް މުހައްމަދު، މުހައްމަދު މުބީން، މުހައްމަދު އައްފާން އަދި އަލީ ޔަޒީދު އެވެ. އުމްރާނީ ޓީމުގެ ހަމައެކަނި ލަނޑު ޖެހީ އައްމާރު ބިން މުހައްމަދު މުސްތަފާ އެވެ.
ކްލަބް މޯލްޑިވްސް ކްލަސިކް މުބާރާތުގައި އިއްޔެ ވަނީ ގްރޫޕް އީގައި އޮޑިޓާ ޖެނެރަލް އޮފީހުން 1-0 އިން ހަޔާ އެޑިއުކޭޝަން ބަލިކޮށްފަ އެވެ. މި މެޗުގެ ހަމައެކަނި ލަނޑުޖެހީ އަލީ ސިޔާޒު އެވެ.
ކްލަބް މޯލްޑިވްސްގެ މުބާރާތްތަކުގެ މެޗުތައް ދެން އޮންނާނީ މާދަމާ ހަވީރާއި ރޭގަނޑު އެވެ.
