ވެލިންޓަން، ނިއު ޒީލެންޑް (ޖުލައި 25) - މިހާރު ކުރިއަށްދާ ފީފާ ވިމެންސް ވޯލްޑް ކަޕްގެ އެއް ހޯސްޓް ކަަމަށްވާ ނިއު ޒިލޭންޑް އަތުން 1-0 އިން މޮޅުވެ، މުބާރާތުގައި ފުރަތަމަ ފަހަރަށް ބައިވެރިވާ ފިލިޕީންސް އިން ތާރީހީ މޮޅެއް މިއަދު ހޯދައިފި އެވެ.
ނިއު ޒިލޭންޑްގެ އަމިއްލަ ސަޕޯޓަރުން ކުރިމަތީގައި ކުޅުނު މެޗުން ފިލިޕީންސް މޮޅުވީ މެޗުގެ ފުރަތަމަ ހާފުގައި ސަރީނާ ބޯލްޑަން ޖެހި ލަނޑުންނެވެ.
މެޗުގެ ދެ ވަނަ ހާފުގައި ނިޒު ޒީލެންޑް އިން ފިލިޕީންސްގެ ފަހަތަށް ބާރު ބޮޑުކުރިޔަސް، ފިލިޕީންސް އިން ވަނީ އެ ޓީމުގެ ލީޑު ދިފާއުކޮށްފަ އެވެ.
މިއީ، ފީފާ ވޯލްޑް ކަޕެއްގައި ފިލިޕީންސް އަށް ލިބުނު ފުރަތަމަ މޮޅެވެ ފިލިޕީންސްގެ ކޯޗު އެލަން ސްޓަޖްޗިޗް މި މޮޅު ސިފަކުރީ "ފިލިޕީންސްގެ ކުޅިވަރުގެ ތާރީހުގައި ވެސް ލިބުނު އެންމެ ބޮޑު އެއް މޮޅު"ގެ ގޮތުގަ އެވެ.
"ފިިލިޕީންސްގެ ކުޅިވަރުގެ ތާރީހުގައި މިއަށްުވުރެ ވަކި ބޮޑު މޮޅެއް ލިބުނުހެން ހިޔެއް ނުވޭ،" އޮސްޓްރޭލިއާ އަށް ނިސްބަތްވާ ސްޓަޖްޗިޗް ބުންޏެވެ.
"މިއީ ފިލިޕީންސްގެ ކުޅިވަރުގެ ތާރީހުގައި އެންމެ ބޮޑު އެއް މޮޅަށް ވެދާނެ."
ފީފާ ރޭންކިންގައި ފިލިޕީންސް އަށް ވުރެ 20 ދަރަޖަ ކުރީގައި އޮތް ނިއު ޒިލޭންޑަށް މިއީ ގަބޫލްކުރަން ދަތި ނަތީޖާއެކެވެ.
ނިއު ޒީލެންޑްގެ ކޯޗު ޖިޓްކާ ކްލިމްކޯވާ ބުނީ މި ނަތީޖާއާ މެދު ކުޅުންތެރިން ވަރަށް ހިތާމަކުރާ ކަމަށެވެ.
"ކުޅުންތެރިންގެ ލޮލުން ކަރުނަ ފޭބި. އެކަމަކު އަހަރަމެން އަދި މުބާރާތުން ނުކަޓާ. ރެސްޓްކޮށްފައި، ސްވިޓްޒަލޭންޑާ ދެކޮޅަށް ކުޅެން ތައްޔާރުވާން ވަގުތު އެބައޮތް." ކްލިމްކޯވާ ބުންޏެވެ.
ގުރޫޕް އޭގައި ކޮންމެ ޓީމަކަށް ވެސް ބާކީ އެއް މެޗު އޮތްއިރު، ތާވަލްގެ އެއްވަނައިގައި ހަތަރު ޕޮއިންޓާއެކު އޮތީ ސްވިޓްޒަލޭންޑެވެ. ނިއު ޒީލެންޑާއި ފިލީޕީންސް އަށް ތިން ޕޮއިންޓް ލިބިފައިވާއިރު، ނޯވޭ އަށް ލިބިފައިވަނީ އެއް ޕޮއިންޓެވެ.
