އިސްތަންބޫލް، ތުރުކީ (ޖުލައި 25) - ކްރިސްޓަލް ޕެލަސް އަށް ކުޅެމުން އައި ވިލްފްރިއެޑް ޒަހާ ތުރުކީގެ ގަލަސަތަރާއި އަށް ބަދަލުވިއިރު، މިދިޔަ ސީޒަނުގައި ލޯން އެއްބަސްވުމަކުން މެންޗެސްޓާ ޔުނައިޓެޑަށް ކުޅުނު، މާސެލް ސަބިޓްޒާ، ބަޔާން މިއުނިކް ދޫކޮށް ވާދަވެރި ބޮރޫޝިއާ ޑޯޓްމަންޑަށް ބަދަލުވެއްޖެ އެވެ.
ޒަހާ، 30، ޕެލަސްއާ އެކު ހަދާފައިވާ ކޮންޓްރެކްޓް މިދިޔަ ސީޒަނުގެ ނިޔަލަށް ވަނީ ހަމަވެފަ އެވެ. އޭނާ އަށް ސައުދީ އަރަބިއްޔާ އާއި އިޓަލީގެ ކްލަބްތަކުގެ ހުށަހެޅުން ލިބިފައިވަނިކޮށް ގަލަސަތަރާއިއާ އެކު، ތިން އަހަރުގެ ކޮންޓްރެކްޓެއްގައި ސޮއިކޮށްފައިމިވަނީ ތިން މިލިއަން ޑޮލަރުގެ ބޯނަހަކާއި އަހަރަކު ފަސް ވަރަކަށް މިލިއަން ޑޮލަރުގެ މުސާރަ އަކަށެވެ.
ޒަހާ ވަނީ ޕެލަސްގެ ކުރިން ކާޑިފް ސިޓީ އާއި މެންޗެސްޓާ ޔުނައިޓެޑަށް ވެސް މީގެ ކުރިން ކުޅެފަ އެވެ.
ބަޔާނުން ސަބިޓްޒާ، ޑޯޓްމަންޑަށް ވިއްކާލީ 21 މިލިއަން ޑޮލަރުގެ ފީ އަކަށެވެ. މެންޗެސްޓާ ޔުނައިޓެޑުން ސަބިޓްޒާގެ ކޮންޓްރެކްޓް ދާއިމީ ކުރަން ލިބިފައި އޮތް ފުރުސަތު ދޫކޮށްލުމާ އެކު، ޑޯޓްމަންޑުން މި ވަނީ އޮސްޓްރިއާ ގައުމީ ޓީމުގެ ވައިސް ކެޕްޓަން، ސަބިޓްޒާގެ ސޮއި ހޯދައިފަ އެވެ.
ޖަރުމަނުގެ އާރްބީ ލައިޕްޒިގަށް ވެސް ކުޅެފައިވާ ސަބިޓްޒާ، 29، ޑޯޓްމަންޑާ އެކު ސޮއިކޮށްފައިވަނީ ހަތަރު އަހަރުގެ ކޮންޓްރެކްޓެއްގަ އެވެ.
