ލަންޑަން (ޖުލައި 25) - ޓޮޓެންހަމް ފޯވާޑް ހެރީ ކޭން އެކުލަބުގެ އާ ކޮންޓްރެކްޓްގައި ސޮއިނުކޮށްފި ނަމަ އޭނާ ވިއްކާލަން ޖެހިލުން ނުވާނެ ކަމަށް އެ ކުލަބުން ބުނެފި އެވެ.
ޓޮޓެންހަމްގެ ފޯވާޑް ހެރީ ކޭން އަކީ މި ވަގުތު ޕްރިމިއާ ލީގުގައި ހުރި އެންމެ ވަރުގަދަ އެއް ފޯވާޑެވެ. އެކުލަބަށް އެންމެ ގިނަ ގޯލު ޖަހައިދިން ކުޅުންތެރިޔާގެ ރެކޯޑު އޮންނަ ކޭން ބޭނުންވަނީ މިހާރު ބޮޑު މުސާރައެއް ލިބޭ ކުލަބަކަށް ބަދަލުވާށެވެ.
މުސާރައިގެ ގޮތުގައި މިހާރު ކޭން އަށް ހަފްތާ އަކު ދެ ލައްކަ ޕައުންޑް ލިބޭއިރު އޭނާ ބޭނުންވަނީ އޭނާ އަށް ކުލަބުން މިހާރު ހުށަހަޅާފައިވަނީ ހަފްތާއަކު ތިން ލައްކަ ޕައުންޑް ލިބޭ ކޮންޓްރެކްޓެެކެވެ. ނަމަވެސް ކޭން އާ ކޮންޓްރެކްޓްގައި ސޮއިކުރަން ބޭނުމެއް ނުވެ އެވެ. އޭނާ ބޭނުންވަނީ އެހެން ކުލަބަކަށް ބަދަލުވާށެވެ.
ކޭން ހޯދުމަށް ޖަރުމަންގެ ޗެމްޕިއަން ބަޔާން މިޔުނިކާއި، ފްރާންސްގެ ޕީއެސްޖީ އަދި އިނގިރޭސި ކުލަބު ޔުނައިޓެޑުން ޝައުގުވެރިވާކަމަށް ބެލެވެ އެވެ. މިހާތަނަށް އޭނާއަށް ބިޑުކޮށްފައިވަނީ ބަޔާން މިޔުނިކުން އެކަންޏެވެ.
29 އަހަރުގެ ފޯވާޑް ވިއްކާލަން ބޭނުން ނުވާކަމަށް ޓޮޓެންހަމުން މީގެ ކުރިން ބުނެފައިވީ ނަމަވެސް މިހާރު އެކުލަބުގެ ވިސްނުން އަންނަނީ ބަދަލުވަމުންނެވެ. ސަބަބަކީ މިހާރު އެކުލަބުން ކޭން ވިއްކާލައިފި ނަމަ ރަނގަޅު އަގެއް ލިބޭނެތީ އެވެ. އަންނަ އަހަރަށް މަޑުކޮށްފިނަމަ ކޭން އެކުލަބު ދޫކޮށްލާނީ ފްރީ ޓްރާންސްފާއެއްގަ އެވެ.
ޓޮޓެންހަމްގެ ޗެއާމަން ޑެނިއެލް ލެވީ ވިދާޅުވީ އާ ކޮންޓްރެކްޓްގައި ސޮއިނުކޮށްފި ނަމަ ކޭން ވިއްކާލާނީ އެކުލަބުން ބޭނުންވާ ޓީމަކަށް ކަަމަށާއި، އެކަން މިހާރު ކޭންއަށް އަންގާފައިވާނެކަމަށެވެ. އާ ކޮންޓްރެކްޓްގައި ސޮއިނުކުރާނަމަ އަންނަ ސީޒަންގައި ޓޮޓެންހަމުން ކޭން ނުފެންނާނެކަމަށްވެސް ލެވީ ވަނީ ވިދާޅުވެފަ އެވެ.
ޖަރުމަންގެ މީޑިއާތަކުން ބުނާ ގޮތުން ބަޔާން މިޔުނިކަށް ބަދަލުވުމާ ގުޅޭގޮތުން އެކުލަބުން ވަނީ ކުޅުންތެރިޔާއާއިއެކު އެއްބަސްވުމަކަށް އައިސްފަ އެވެ. އެކަމަކު ޓޮޓެހަމުން ވަނީ ބަޔާނުން ކުރި ދެ ބިޑަށްވެސް ނޫނެކޭ ބުނެފަ އެވެ.
ކޭން ހޯދުމަށް ޕީއެސްޖީ އިން މަސައްކަތް ފަށާނެކަމަށް ބެލެވެނީ އެކުލަބުގެ މިހާރުގެ ތަރި ކިލިއަން އެމްބާޕޭ ވިއްކާލާފަ އެވެ. އަނެއްކޮޅުން ޔުނައިޓެޑުންވެސް އާ ސީޒަނަށް ފޯވާޑެއް ގެންދާނެކަމަށް ބެލެވެ އެވެ.
ކުލަބުގެ މެނޭޖުމަންޓާ ހިޔާލުތަފާތުވުންތަކެއް ހުރި ކަމުގައިވިޔަސް އާ ސީޒަނަށް ކުލަބުން ވަމުން އަންނަ ތަައްޔާރީތަކުގައި ކޭން އަންނަނީ ބައިވެރިވަމުންނެވެ.
