މިއާމީ (ޖުލައި 23) - އެމެރިކާގެ އިންޓަ މިއާމީ އަށް ކުޅުނު ފުރަތަމަ މެޗުގައި އޭނާ ޖެހި ލަނޑާ އެކު އެމެރިކާގެ ލީގު ކަޕްގައި ކްރޫޒް އަޒުލް އަތުން 2-1 އިން އިންޓަ މަޔާމީ މޮޅުވިއިރު، މިއީ ސީޒަންގައި ކުރިއަށް ދިއުމަށް އެ ޓީމަށް މުހިންމު މޮޅެއް ކަމަށް ލިއޮނަލް މެސީ ބުނެފި އެވެ.
އިންޓަ މިއާމީ އަށް ކުޅުނު ފުރަތަމަ މެޗުގައި ރޭ ކްރޫޒް އަޒުލްއާ ދެކޮޅަށް މެސީ ،36، ނުކުތީ ބަދަލު ކުޅުންތެރިއެއްގެ ގޮތުގައެވެ. ލީގު ކަޕްގެ މެޗުގައި ދެ ޓީމު 1-1 އިން އެއްވަރުވެފައިވަނިކޮށް، މެސީ ވަނީ މެޗުގެ އިތުރު ވަގުތުގައި ލިބުނު ހިލޭޖެހުމެއް ގޯލުގެ މަތީ ކަނަށް އަމާޒުކޮށްލައި، އިންޓަ މަޔާމީ މޮޅުކޮށްދީފައެވެ.
"އަހަރަމެން ބޭނުންވީ މި މެޗަށްވަދެ ތިބި ސަޕޯޓަރުންނަށްޓަކައި މި މެޗުން މޮޅުވާން،" އިންޓަ މިއާމީގެ ދަނޑަށް ވަދެތިބި 20،000 ސަޕޯޓަރުންނަށް ނިސްބަތްކޮށް މެސީ ބުންޏެވެ.
"އަހަރަމެންނަށް އެނގޭ މި މި މެޗުން މޮޅުވުން ވަރަށް މުހިންމުކަން. އެހެންވެ މި މެޗުން މޮޅުވީމަ ވަރަށް އުފަލުން މިހުރީ."
އިންޓަ މިއާމީ އޮތީ މޭޖާ ލީގު ސޮކާ (އެމް.އެލް.އެސް)ގެ ތާވަލްގެ ފުލުގަ އެވެ. އެހެންކަމުން، މެސީ އުންމީދުކުރަނީ މި މޮޅާ އެކު، އިންޓަ މިއާމީގެ "ކޮންފިޑެންސް" ރަނގަޅުވެ، ލީގުގެ ނަތީޖާތައް ރަނގަޅުކުރެވޭނެ ކަމަށެވެ.
"މިއީ އެހެން މުބާރާތަކަށްވިޔަސް، ވަރަށް މުހިންމު މޮޅެއް ހޯދުން. މިއީ ޓީމަށް ވެސް ލިބޭނެ އިތުރު ކޮންފިޑަންސްއެއް،" މެސީ ބުންޏެވެ.
މި މެޗުގައި ބާސެލޯނާގެ ކުރީގެ މިޑްފީލްޑަރު ސާޖިއޯ ބުސްކެޓްސް ވެސް އިންޓަ މިއާމީގެ ޓީމަށް ކުޅުނެވެ. ބާސެލޯނާގައި ކުރިން އެއްކޮށް ކުޅުނު މެސީ އާއި ބުސްކެޓްސްގެ "ކޮމްބިނޭޝަންސް"ތައް މި މެޗުގައި ވެސް ފެނުނެވެ.
މެސީ އިންޓަ މިއާމީއާ ގުޅުމަކީ އެމް.އެލް.އެސްގެ ޕްރޮމޯޝަނަށް ވެސް ލިބުނު އިތުރު ކުރިއެރުމެވެ. މެސީގެ ފުރަތަމަ މެޗު ބެލުމަށް އެމެރިކާގެ ގިނަ ސެލެބްރިޓީންތަކެއް ދަނޑަށް ވަނެވެ. އޭގެ ތެރޭގައި ބާސްކެޓްބޯޅައިގެ ތަރި ލެބްރޯން ޖޭމްސް އާއި ޓެނިހުގެ ތަރި ސެރީނާ ވިލިއަމްސް ހިމެނެ އެވެ.
