ވެލިންޓަން، ނިއު ޒީލެންޑް (ޖުލައި 21) - ނިއު ޒީލެންޑާއި އޮސްޓްރޭލިއާގައި އިއްޔެ ފެށި ފީފާ ވިމެންސް ވޯލްޑް ކަޕްގައި ސްޕެއިން ކުޅުނު ފުރަތަމަ މެޗުން މިއަދު، ކޮސްޓަ ރިކާ އަތުން 3-0 އިން މޮޅުވެ، ފެށުން ރަނގަޅުކޮށްފި އެވެ.
ގްރޫޕް ސީގެ ފުރަތަމަ މެޗުގައި ސްޕެއިން އިން ޖެހި ތިން ގޯލު ވެސް ކާމިޔާބު ކުރީ ފުރަތަމަ ހާފުގަ އެވެ. ތިން ގޯލު ޖަހާފައިވަނީ ހަ މިނިޓެއްހާއިރު ތެރޭގަ އެވެ.
އެ ގޮތުން، ސްޕެއިން އިން ލީޑުނެގީ، މެޗުގެ 21 ވަނަ މިނިޓްގައި ކޮސްޓަ ރިކާގެ ވަލެރިއާ ޑި ކަމްޕޯ ޖެހި ބައި ގޯލުންނެވެ. އޭގެ ދެ މިނިޓް ފަހުން، އައިޓާނާ ބޮންމަޓީ ވަނީ ސްޕެއިންގެ ލީޑުފުޅާކޮށްދީފަ އެވެ. އަދި އެ ޓީމުގެ ތިން ވަނަ ގޯލު ޖެހީ، 27 ވަނަ މިނިޓްގައި އެސްތާ ގޮންޒާލޭޒް އެވެ.
މި މެޗުގެ ފަހުކޮޅުގައި ސްޕެއިން އިން ވަނީ ބަދަލަކަށް އެ ޓީމުގެ ތަރި، އަލެކްސިއާ ޕުޓޭޔާސް ކުޅެން ނެރެފަ އެވެ. މިދިޔަ އަހަރުތަކުގައި އަނިޔާގެ ސަބަބުން ޕުޓޭޔާސް އަށް މި ފަަހަރުގެ ވޯލްޑް ކަޕްގައި ނުކުޅެވިދާނެެ ކަމާ މެދު ވެސް ސުވާލު އުފެދުނެވެ.
ސްޕެއިން ގްރޫޕްގެ ދެ ވަނަ މެޗުގައި ޒަމްބިއާ އާއި ޖަޕާން ކުޅޭ މެޗު އޮންނާނީ މާދަމާ އެވެ.
ވިމެންސް ވޯލްޑް ކަޕްގައި މިހާތަނަށް ކުޅެވުނު މެޗުތަކުގެ ނަތީޖާ އަށް ބަލާއިރު، ގްރޫޕް އޭގައި ނިއު ޒީލެންޑުން ވަނީ 1-0 އިން ނޯވޭ ބަލިކޮށް ވޯލްޑް ކަޕެއްގައި ފުރަތަމަ މޮޅު ހޯދައިފަ އެވެ. އެ ގްރޫޕްގެ އަނެއް މެޗުން، ފިލިޕީންސް އަތުން ސްވިޒަލެންޑް 2-0 އިން މޮޅުވިއިރު، ގްރޫޕް ބީގައި އޮސްޓްރޭލިއާ ވަނީ 1-0 އިން އަޔަލެންޑްގެ މައްޗަށް ކުރިހޯދައިފަ އެވެ. އަދި އެ ގްރޫޕްގައި ނައިޖީރިއާ އާއި ކެނަޑާ މިއަދު ކުޅުނު މެޗު ވަނީ ލަނޑެއް ނުޖެހި އެއްވަރުވެފަ އެވެ.
