ޔުނައިޓެޑް ވިކްޓްރީ އަތުން އުނދަގޫ މޮޅެއް ހޯދައި، ކުލަބު އީގަލްސް އެމްޑަބްލިއުއެސްސީ ދިވެހި ޕްރިމިއާ ލީގުގެ އެއް ވަނަ އަށް ޖެހިލައިފި އެވެ.
ލީގުގައި މިއަދު ހަވީރު 2-1 އިން އީގަލްސް މޮޅުވުމުން އެ ޓީމަށް ވަނީ 13 ޕޮއިންޓް ލިބިފަ އެވެ. އެއް މެޗު މަދުން ކުޅެފައިވާ މާޒިޔާއަށް ލިބިފައިވަނީ 12 ޕޮއިންޓެވެ.
މިއަދުގެ މެޗުގެ ކުރީކޮޅު އީގަލްސް އަށް ލީޑު ނަގާނެ ރަނގަޅު ފުރުސަތެއް ލިބުނެވެ. އިބްރަހިމް މަހުދީ ހުސައިން ނަގައިދިން ހުރަހަކުން އަހުމަދު ރިޒުވާން (ރިޒޭ) ހުސްކޮށް ހުރެ ފޮނުވާލި ބޯޅަ ދިޔައީ ގޯލުގެ ގޯލުގެ ހުރަސް ދަނޑިމަތިން ބޭރަށެވެ. ރިޒޭ މަސައްކަތްކުރީ ޔޫވީގެ ކީޕަރު ބޯ މަތިން ބޯޅަ ގޯލަށް އޮއްސާލާށެވެ. އޭގެ މިނެޓެއް ފަހުން އިސްމާއިލް އީސަ (މެސީ) ނަގައިދިން ހުރަހަކުން ކުޑަ އޭރިއާ ކަނާ ދިމާލުގައި ހުރެފައި ރިޒޭ ފޮނުވާލި ބޯޅަ ކީޕަރު އަލީ ނާޖިހު ދިފާއުކުރި އެވެ.
ފުރަތަމަ ދިހަ މިނެޓުގެ ތެރޭގައި އީގަލްސް އިން ފޮނުވާލި ތިން ވަނަ ހަމަލާއަކީވެސް ރިޒޭ ފޮނުވާލި ބޯޅައެކެވެ. މަހުދީ އާއި ރިޒޭގެ ރަނގަޅު ކޮމްބިނޭޝަނެއް ފެނުނު މި ހަމަލާ ދިފާއުކޮށް ކޯނަރަކަށް ބޭރުކޮށްލީ ކީޕަރު ނާޖިހު އެވެ. އޭގެ ފަހުން ނެގި ކޯނަރުން އޭރިއާާ ތެރޭގައި ހުރެ ބޮލުން ރިޒޭ ފޮނުވާލި ބޯޅަވެސް ނާޖިހު މަތަކުރި އެވެ.
ގާތް ގާތުގައި އީގަލްސް އިން ފޮނުވާލި ގިނަ ހަމަލާތަކަށްފަހު ޔޫވީ އިން ކުރިއަށް ޖެހިލައި އެޓޭކްތައް ކުރެވޭތޯ ބެލި އެވެ. ނަތީޖާއެއްގެ ގޮތުން ފޯވާޑް ޝަނާން ރަޝާދު އަށް ދެ ފުރުސަތު ލިބުނެވެ. އޭރިއާ ތެރެއިން އަހުމަދު ބައްސާމް ދިން ބޯޅައެއް އޭނާ ފޮނުވާލަން އުޅެނިކޮށް އީގަލްސްގެ ޑިފެންޑަރުން މަތަކުރިއިރު، އޭރިއާ ބޭރުން ޝަނާން ފޮނުވާލި ބާރު ހަމަލާ ދިޔައީ ހުރަސް ދަނޑިމަތިން ބޭރަށެވެ.
އަނެއްކާވެސް އީގަލްސް އިން ނުރައްކާތެރި ހަމަލާއެއް ފޮނުވާލި އެވެ. މިފަހަރު އޭރިއާ ރޮނގުމަތީގައި ކަހަލަ ގޮތަކަށްހުރެ މަހުދީ ފޮނުވާލި ބޯޅަ ދިޔައީ އަރިމަތީ ދަނޑިކައިރިން ބޭރަށެވެ. އޭގެ ފަހުން ބިދޭސީ ކުޅުންތެރިޔާ ޖަހަންގީރް ފޮނުވާލި ބޯޅަ ދިޔައީ ކީޕަރު އަތަށެވެ.
މިއަދުގެ މެޗު އިތުރަށް ފޯރިގަދަވީ އީގަލްސް އިން 35 ވަނަ މިނެޓުގައި ޖެހި ގޯލު ރެފްރީ އޮފްސައިޑް ކަމަށް ނިންމުމުންނެވެ. ލިބުނު ކޯނަރަކުން އެޓީމުން ތަނަވަސްކުރި ފުރުސަތެއްގައި އޭރިއާ ރޮނގުމަތީގައި ކަހަލަ ގޮތަކަށްހުރެ ރިޒޭ ބޯޅަ ކޮންޓްރޯލްކުރުމަށްފަހު ކައިރިއަށް އައި ޑިފެންޑަރު ކައިރިން ނައްޓާފައި ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. އެ ބޯޅަ ގޯލަށް ދިޔައިރު ކީޕަރު ކުރިމަތީގައި އީގަލްސްގެ އިމްރާން ނަޝީދު އޮފްސައިޑް މަގާމެއްގައި ހުރުމުން ރެފްރީ ނިންމީ އެ ގޯލު އޮފްސައިޑް ކަމަށެވެ. މި ނިންމުމަށް އީގަލްސްގެ ބެންޗުންނާ ކުޅުންތެރިން ވަރަށް ބޮޑަށް ހިތްހަމަނުޖެހުން ފާޅުކުރި އެވެ.
އީގަލްސް އިން މެޗުގެ ލީޑު ނެގީ 43 ވަނަ މިނެޓުގަ އެވެ. މަހުދީ އަރިމަތިން ނަގައިދިން ބޯޅައަކުން މި ގޯލު ޖަހައިދިނީ ރިޒޭ އެވެ.
ރިޒޭގެ ގޯލަށްފަހު އޭނާއަށް ލީޑު ފުޅާކުރަން ހުސް ފުރުސަތެއް ލިބުނެވެ. ޔޫވީގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި ރިޒޭ ހުސްކޮށްހުރެ ފޮނުވާލި ބޯޅަ ކީޕަރު ނާޖިހު ދިފާއުކުރި އެވެ.
ޔޫވީ އިން ފުރަތަމަ ހާފު ނިމުމުގެ ކުރިން ނަތިޖާ ހަމަހަމަކުރި އެވެ. އޭރިއާ ބޭރުން ޝަނާން އަށް ލިބުނު ބޯޅައެއް ކޮންޓްރޯލްކުރުމަށްފަހު އޭނާ ފޮނުވާލި ބާރު ހަމަލާގޮސް އަމާޒުވީ ގޯލުގެ ކަނަށެވެ.
ދެވަނަ ހާފަށް އީގަލްސް ނުކުތީ ޖަހަންގީރުގެ ބަދަލުގައި ބިދޭސީ ފޯވާޑް އިވާން ކާލޯސް ކުޅެން އަރުވައިގެންނެވެ. މިހާފު ފެށިގޮތަށް އީގަލްސްގެ ކާލޯސް އާއި އީސައަށް ރަނގަޅު ފުރުސަތެއް ލިބުނެވެ. ކާލޯސް ބޮލުން ފޮނުވާލި ބޯޅަ ހުރަސް ދަނޑިމަތިން ބޭރަށް ދިޔައިރު އީސަ އޭރިއާ ތެރޭގައި ހުރެ ފޮނުވާލި ބޯޅަ ބްލޮކް ކުރީ ޔޫވީގެ ޑިފެންޑަރުންނެވެ.
އޭގެ ފަހުން މަހުދީ ދިން ޕާހަކުން ރިޒޭ ފޮނުވާލި ބޯޅަ ދިޔައީ ކީޕަރު ނާޖިހު އަތަށެވެ. ކާލޯސް އާއި އީސައަށް މިހާފުގައި ލިބުނު އިތުރު ފުރުސަތުތަކުގެ ބޭނުންވެސް ނުކުރެވުނީ އެބޯޅަތައް ގޯލާ އަމާޒުނުވުމުންނެވެ.
ކީޕަރު ނާޖިހު ގިނަ ސޭވްތަކެއް ކުރި މި މެޗުގެ 72 ވަނަ މިނެޓުގައިވެސް މަހުދީ ބާރު ހަމަލާއެއް ފޮނުވާލި އެވެ. އަރިމަތިން ލިބުނު ބޯޅައަކާއިއެކު އޭރިއާ ތެރެއަށް ވަދެ ފޮނުވާލި ހަމަލާ ކީޕަރު ނާޖިހުވަނީ ގޯލުގެ ކަނަށް ވަންނަން ދަނިކޮށް ދިފާއުކޮށްފަ އެވެ. އޭގެ ފަހުން އޭރިއާ ތެރޭގައި ހުސްކޮށް ހުރެ އީސަ ފޮނުވާލި ބޯޅަވެސް ދިޔައީ ހުރަސް ދަނޑިމަތިން ބޭރަށެވެ.
އީގަލްސްއިން މެޗުގައި ދެވަނަ ފަހަރަށް ލީޑު ނެގީ މެޗު ނިމެން ދިހަ މިނެޓަށްވެފައިވަނިކޮށެވެ. ނިޝާމް މުހައްމަދު ދިން ބޯޅައަކުން މި ގޯލު ޖަހައިދިނީ މަހުދީ އެވެ.
އީގަލްސްގެ ގޯލަށްފަހު ދެ ޓީމަށްވެސް ގޯލު ޖަހާނެ މާ ރަނގަޅު ފުރުސަތުތައް ނުލިބެ އެވެ. އަނެއްކޮޅުން އީގަލްސްގެ ކުޅުންތެރިންނަށް ފަރުވާ ދިނުމަށް ގިނަ ވަގުތު މެޗު މެދު ކަނޑާލަން ޖެހުނެވެ.
ޔޫވީ އިން މެޗު ނިންމާލަން ޖެހުނީ ދިހަ ކުޅުންތެރިންނާއިއެކުގަ އެވެ. އެއީ އެޓީމްގެ މުހައްމަދު ރީހަނަށް މެޗުގެ އިތުރު ވަގުތުގައި ދެވަނަ ރީނދޫ ކާޑާއިއެކު ރަތްކާޑެއް ދެއްކުމުންނެވެ.
