މިހާރު ކުރިއަށްދާ ކްލަބް މޯލްޑިވްސް ކަޕްގައި ޔުނައިޓެޑް ބީއެމްއެލް އިން ކުޅުނު ފުރަތަމަ މެޗުގައި 12-0 އިން ޓްރީޓޮޕް ހޮސްޕިޓަލް ބަލިކުރިއިރު، 18/30 ކްލަސިކް މުބާރާތުގައި ޕްރިޒަން ކްލަބްގެ އަންހެން ޓީމުން ހުޅުމާލެ ހޮސްޕިޓަލްގެ މައްޗަށް 12-0 އިން ކުރިހޯދައިފި އެވެ.
ކްލަބް މޯލްޑިވްސް ކަޕްގެ ގްރޫޕް އީގައި ވާދަކުރަން އޮތް ކްލަބް އެއާޕޯޓްސް މުބާރާތުން ވަކިވުމާ އެކު، އެ ގްރޫޕްގައި އޮތީ އެސްޓީއޯ އާއި ބީއެމްއެލް އަދި ޓްރީޓޮޕް ހޮސްޕިޓަލް އެވެ. ރޭ ޓްރީޓޮޕް އަތުން ހޯދި ބޮޑު މޮޅާ އެކު ބީއެމްއެމް ވަނީ ގަދަ 16 ބުރާ ގާތަށް ޖެހިލައިފަ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި ބީއެމްއެލްގެ އިބްރާހިމް ހަމްދާން ވަނީ ފަސް ގޯލު ޖަހައި މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. އެ ޓީމުގެ ކެޕްޓަން އިޝާން އިބްރާހިމް (ސައްޓު) ހެޓްރިކެއް ހެދިއިރު، އަނެއް ގޯލުތައް ޖެހީ އިސްމާއިލް އަލީފް އަހުމަދު ދެ ގޯލާއި ހައިޝަމް ރަޝީދު އަދި ހުސެއިން އަލީ (އަޗޭ) އެވެ.
ކްލަބް ފެން ޓީމުގެ މާޒިން (ކ) ސިފައިންގެ ކްލަބްގެ އަލާއު ކައިރިން ބޯޅަ ހިފައިގެންދަނީ.--- ފޮޓޯ: އަބްދުﷲ އިޔާން / އަދަދު
އިއްޔެ ހަވީރާއި ރޭ ވަނީ ގްރޫޕް އެފްގެ ދެ މެޗެއް ކުޅެފަ އެވެ. އެ ގޮތުން ހަވީރު ކުޅުނު މެޗުން ކްލަބް ފެން އިން ވަނީ 3-0 އިން ދިވެހި ސިފައިންގެ ކްލަބް ބަލިކޮށްފަ އެވެ. ފެން ޓީމަށް މި މެޗުގައި ގޯލުތައް ޖަހައިދިނީ އިބްރާހިމް ޝަނޫން، ރައްޒާން ޖައުފަރު އަދި އަހުމަދު މާޒިން އެވެ. މި ގްރޫޕްގެ އަނެއް މެޗުގައި ރޭ ކްލަބް އާސަންދަ އަތުން ޕްރިޒަން ކްލަބް މޮޅުވީ 4-3 އިންނެވެ. ޕްރިޒަންގެ ލަނޑުތައް ޖެހީ އަހުމަދު ހުސާމް (ހުސާންކޮ) ދެ ގޯލާއި މުހައްމަދު ޝާއިން ދެ ގޯލެވެ. އާސަންދަ ޓީމުގެ ލަނޑުތައް ޖެހީ އަހުމަދު އަބްދުﷲ (ލިލީ) ދެ ގޯލާއި އާދަމް ޝިޔާން މުހަައްމަދު އެވެ.
ޕްރިޒަންގެ އަންހެން ޓީމުން 18/30 ކްލަސިކްގައި ތަފާތު ބޮޑު މޮޅެއް ހުޅުމާލެ ހޮސްޕިޓަލް އަތުން ހޯދިއިރު، ޕްރިޒަންގެ ކެޕްޓަން، އައިމިނަތު ފަޒްލާ ވަނީ ފަސް ގޯލު ޖަހައި، މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. އެ ޓީމުގެ ހަދީޖާ އަފްނާން ހެޓްރިކެއް ހެދިއިރު، އަނެއް ގޯލުތައް ޖެހީ އައިޝަތު ވިޝާމާ، ފާތިމަތު އަފާ އިބްރާހިމް އަދި ރުގިއްޔާ މާއިލާ އެވެ.
މިއަދު ހަވީރު ކުޅެން ހަމަޖެހިފައިވަނީ 18/30 ކްލަސިކްގެ ދެ މެޗެވެ. އަދި މިރޭ ކްލަބް މޯލްޑިވްސް ކަޕްގެ ހަތަރު މެޗެއް ކުޅެން ވަނީ ޝެޑިއުލްކޮށްފަ އެވެ.
