ކްލަބް މޯލްޑިވްސް ކަޕްގެ މި ފަހަރުގެ މުބާރާތުގައި ކްލަބް އާބަންކޯ އާއި އެމްޕީއެލް އަދި ގޭސް ކްލަބުން ފުރަތަމަ މެޗުތަކުގައި ބޮޑު ތަފާތަކުން މޮޅުވެއްޖެ އެވެ.
ގްރޫޕް ސީގައި އެލައިޑް އަތުން އިއްޔެ ހަވީރު އެމްޕީއެލް މޮޅުވީ 5-0 އިންނެވެ. އެ ގްރޫޕްގައި ރޭ ކުޅުނު މެޗުން ގޭސް ކްލަބުން ވަނީ 6-2 އިން ކްލަބް ޓީޓީއެސް ބަލިކޮށްފަ އެވެ. ގްރޫޕް ސީގައި އިއްޔެ ހަވީރު، އެމްއޭސީއެލް އަތުން އާބަންކޯ ވަނީ ފަހަތުން އަރައި، 3-1 އިން މޮޅުވެފަ އެވެ. މި ގްރޫޕްގެ އަނެއް މެޗުން ކްލަބް އިމިގްރޭޝަން ވަނީ 3-2 އިން ޕޮލިސް ކްލަބް އަތުން މޮޅުވެފަ އެވެ.
އިއްޔެ ހަވީރުގެ މެޗުގައި އެމްޕީއެލްގެ ގޯލުތައް ޖެހީ އީރާންގެ ކުޅުންތެރިޔާ މަހުދީ ބަހުމާނީ އާއި އަލީ ހައިޝަމް (ޗުމްޕު) އަދި އަހުމަދު ނިޒާމް (ނިޒާމްބެ) އެވެ. ގޭސް ކްލަބުން ރޭގެ މެޗުގައި ލަނޑުތައް ޖެހީ އަހުމަދު ރަޝީދު (އައްމަޑޭ) ހަތަރު ގޯލާއި ނާއިފް ޝަފީގު އަދި މުހައްމަދު އަނޫފް އެވެ. ޓީޓީއެސްގެ ލަނޑުތައް ކާމިޔާބުކޮށްފައިވަނީ ވިޖާޒު އީސާ ފުޅު އަދި ހުސެއިން ސާމިލް އެެވެ.
އެމްޕީއެލް ޓީމުގެ ހައިޝަމް (ކ) އެލައިޑްގެ ކުޅުންތެރިއަކު ކައިރިން ބޯޅަ ހިިފައިގެންދާން މަސައްކަތް ކުރަނީ.--- ފޮޓޯ: އަބްދުﷲ އިޔާން/ އަދަދު
އެމްއޭސީއެލްގެ އަލީ ސަޖަން އެ ޓީމަށް ލީޑުނަގައިދީފައިވަނިކޮށް، އާބަންކޯ އިން ވަނީ ފަހަތުން އަރައި ތިން ގޯލު ޖަހައިފަ އެވެ. އާބަންކޯ އަށް އެއްވަރުކޮށްދިނީ ފުރަތަމަ ހާފުގައި ބަދަލަކަށް އަރައި، ޔާމީން މުހައްމަދު އެވެ. އާބަންކޯ މޮޅުވި ގޯލުތައް ޖެހީ މި ފަހަރު އެ ޓީމަށް ގެނައި ދެ ކުޅުންތެރިން ކަމަށްވާ ހުސެއިން ޝަރީފް (އޮންލީ) އާއި އަބްދުﷲ ޝައްފާން (ޝާކާ) އެވެ.
މި ގްރޫޕްގައި ރޭ ކުޅުނު މެޗުގައި އިމިގްރޭޝަން އިން ފުރަތަމަ ހާފު ނިންމާލީ ތިން ގޯލުގެ ލީޑެއްގައި އޮވެ އެވެ. އެ ގޮތުން، އިމިގްރޭޝަނަށް ގޯލުތައް ޖަހަައިދިނީ ސައިފާން އަހުމަދު މަނިކް، އަހުމަދު ޔައިޝް ޔޫޝައު އަދި ހުސެއިން ނިޔާޒް އެވެ. ދެ ވަނަ ހާފުގައި ޕޮލިހުގެ ގޯލުތައް ޖެހީ އަހުމަދު ލޫތު އާއި އަހުމަދު ރިފްޝާން އެވެ.
ގޭސް ކްލަބްގެ ނާއިފް ރޭގެ މެޗުގެ ތެރެއިން ބޯޅަ ފޮނުވާލަނީ.--- ފޮޓޯ: އަބްދުﷲ އިޔާން/ އަދަދު
ކްލަބް މޯލްޑިވްސް ކްލަސިކް މުބާރާތުގައި ރޭ ޕީއެސްއެމް އަތުން ހޯމް އެފެއާޒް ވަނީ 4-1 އިން މޮޅުވެފަ އެވެ. އަދި ރައްޔިތުންގެ މަޖިލީހުގެ ރެކްރިއޭޝަން ކްލަބް، ޓީމު ޕެމާ އިން ވަނީ 7-1 އިން ޔޫތު މިނިސްޓްރީ ބަލިކޮށްފަ އެވެ. ޕީއެސްއެމް ކޮޅަށް ހޯމްއެފެއާޒްގެ ޔައިޝް މުސްތަފާ ހެޓްރިކެއް ހެދިއިރު، އަނެއް ގޯލު ޖެހީ އަހުމަދު ޝަފްރާޒް މުހައްމަދު އެވެ. ޕީއެސްއެމްގެ ލަނޑު ޖެހީ ހުސެއިން އަމީން ނަސީރު އެވެ. ޓީމު ޕެމާ އިން ޔޫތު މިނިސްޓްރީ ކޮޅަށް ޖެހި ގޯލުތަކުގެ ތެރެއިން ހަތަރު ގޯލު ޖެހީ އައިމަން ތައުފީގު އެވެ. އަނެއް ތިން ގޯލުގެ ތެރެއިން ދެ ލަނޑު ޖެހީ ހަސަން އަދުހަމް އެވެ. ޔޫތު މިިނިސްޓްރީގެ ލަނޑު ޖެހީ އިސްމާއިލް ރިޔާޒު އެވެ.
ކްލަބް މޯލްޑިވްސް ކަޕްގައި މިއަދު ތިން މެޗެއް އަދި 18/30 ކްލަސިކް ޑިިވިޝަނުގައި މެޗެއް ކުޅޭނެ އެވެ. އެ ގޮތުން، މިއަދު ހަވީރު ކުޅޭ މެޗުގައި ބައްދަލުކުރަނީ ދިވެހި ސިފައިންގެ ކްލަބާއި ފެން ކްލަބް އެވެ. މިރޭ، 20:05 ގައި ފަށާ ދެ މެޗަކީ ޔުނައިޓެޑް ބީއެމްއެލް އާއި ޓްރީޓޮޕްގެ މެޗާއި އާސަންދަ އާއި ޕްރިޒަން ކްލަބް ކުޅޭ މެޗެވެ. އެ އަށް ފަހު، 21:30 ގައި ކުޅޭނީ 18/30 ކްލަސިކް ޑިވިޝަނުގައި ހުޅުމާލެ ހޮސްޕިޓަލް އާއި ޕްރިޒަން ކްލަބް އެވެ.
