ޕެރިސް (ޖުލައި 9) - މި ފަހަރުގެ ޓްރާންސްފާ މާކެޓްގައި ޕީއެސްޖީއާ ގުޅުނު ފަސް ވަނަ ކުޅުންތެރިއަކަށް ބަޔާން މިއުނިކަށް ކުޅެމުން އައި ފުލްބެކް، ލޫކަސް ހެނާންޑޭޒް ވެއްޖެ އެވެ.
ކޯޗަކަށް ލުއިސް އެންރީކޭ ހަމަޖައްސައި، ޕީއެސްޖީ ވަރުގަދަ ކުރަން މަސައްކަތްތަކެއް ކުރަމުން އަންނައިރު، އެ ޓީމުން ވަނީ މިހާތަނަށް ސްޕޯޓިން ލިޒްބަންގެ މެނުއަލް އުގާޓޭ، އިންޓަ މިލާންގެ މިލާން ސްކްރިނިއޭ، ރެއާލް މެޑްރިޑްގެ މާކޯ އަސެންސިއޯ އަދި ރެއާލް މަޔޯކާ އަށް ކުޅޭ ދެކުނު ކޮރެއޭގެ ލީ ކަންގް-އިންގެ ސޮއި ހޯދައިފަ އެވެ.
އަނިޔާގެ ސަބަބުން މިދިޔަ ސީޒަނުގެ ފަހު ބައި ގެއްލުނު، ލޫކަސް ހެނާންޑޭޒް، ޕީއެސްޖީއާ އެކު ސޮއިކޮށްފައިވަނީ 2028 ވަނަ އަހަރުގެ ޖޫން މަހުގެ ނިޔަލަށް ހަދާފައިވާ ކޮންޓްރެކްޓެކެވެ. ހެނާންޑޭޒް، 27، ގެ ކަކުލަށް އަނިޔާވީ މިދިޔަ އަހަރުގެ ފީފާ ވޯލްޑް ކަޕްގައި ފްރާންސް އިން ކުޅުނު ފުރަތަމަ މެޗުގައި އޮސްޓްރޭލިއާއާ ދެކޮޅަށެެވެ.
މީޑިއާ ރިޕޯޓްތައް ބުނާގޮތުން ޕީއެސްޖީން މި ޑީލަށް ޖުމްލަ އެކު ދައްކާނީ 44 މިލިއަން ޑޮލަރެވެ. މީގެ ހަތަރު އަހަރު ކުރިން، ބަޔާނުން ލޫކަސް ހެނާންޑޭޒް ގަތީ އެތުލެޓިކޯ މެޑްރިޑަށް 80 މިލިއަން ޑޮލަރު ދައްކައިފަ އެވެ.
ޕީއެސްޖީން އަންނަނީ އެ ޓީމުގައި ތިބި ބައެއް ތަރިންގެ މުސްތަގުބަލާ ގުޅޭ މުހިންމު ނިންމުންތަކެއް ނިންމަން މަޝްވަރާތަކެއް ވެސް ކުރަމުންނެވެ. އެ ގޮތުން، ޕީއެސްޖީގެ ފްރާންސް ތަރި، ކީލިއަން އެމްބާޕޭ، އަންނަ އަހަރުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރިއިރު، އެ ޓީމާ އެކު އޭނާ މި ފަަހަރު އާ އެއްބަސްވުމެއްގައި ސޮއިނުކޮށްފިނަމަ ވިއްކާލުމުގެ ފުރުސަތު ބޮޑެވެ.
