ސާފް ބަންގުބަންދު ޗެމްޕިއަންޝިޕް 2023 ގައި ރާއްޖެ އަތުން 1-0 އިން މޮޅުވެ، ލެބަނަން މުބާރާތުގެ ސެމީ ފައިނަލުން ޖާގަ ހޯދައިފި އެވެ.
ސެމީ ފައިނަލުގައި ލެބަނަން ކުޅެން ޖެހޭނީ އިންޑިއާއާ އެވެ. ދާދި ފަހުން އިންޑިއާގައި ކުޅުނު އިންޓަ ކޮންޓިނެންޓަލް ކަޕްގެ ފައިނަލުގައި އިންޑިއާ އިން ވަނީ 2-0 އިން ލެބަނަން ބަލިކޮށްފަ އެވެ.
މި މެޗުން ބަލިވެ، ރާއްޖެ އަށް މިހާރު ސެމީ އަށް ދިއުމުގެ އަމިއްލަ ބާރު ވަނީ ގެއްލިފަ އެވެ. ރާއްޖެ އަށް ސެމީ ފައިނަލުގެ ފުރުސަތެއް އޮތީ މި ގްރޫޕުގައި މިރޭ ބޫޓާނުން ދެ ގޯލު ނޫނީ ތިން ގޯލުގެ ފަރަގުން ބަންގްލަދޭޝް ބަލިކޮށްފިނަމަ އެވެ. ސާފް ޗެމްޕިއަންޝިޕް ފުޓްބޯޅަ މުބާރާތެއްގައި މިހާތަނަށް ރާއްޖެ ގްރޫޕް ސްޓޭޖުން ކަޓާފައެއް ނުވެ އެވެ.
ލެބަނަން ގްރޫޕް ބީގެ އެއް ވަނަ ހޯދީ ކުޅުނު ތިން މެޗުން މޮޅުވެ، ނުވަ ޕޮއިންޓާ އެކު އެވެ. ދެ ވަނައިގައި އޮތް ބަންގްލަދޭޝާއި ތިން ވަނައިގައި އޮތް ރާއްޖެ އަށް ވަނީ ތިން ޕޮއިންޓް ލިބިފަ އެވެ. ފުލުގައި އޮތް ބޫޓާން އަށް އަދި ޕޮއިންޓެއް ނުލިބެ އެވެ.
ރާއްޖޭން މި މެޗަށް ނެރުނު ފުރަތަމަ އެގާރަ އަަށް ވަނީ ތިން ބަދަލެއް ގެނެސްފަ އެވެ. އެ ގޮތުން، ނާއިޒު ހަސަން (ދާދު) އާއި އަލީ ފާސިރު (ސެންޓޭ) އަދި ސަސްޕެންޝަންގެ ސަބަބުން މި މެޗުގައި ނުކުޅެވުނު މުހައްމަދު އިރުފާން (އިރޭ)ގެ ބަދަލުގައި، ފުރަތަމަ އެގާރައިގައި ހިމަނައިފައިވަނީ، ހަސަން ޝިފާޒް (ޑުންގާ) އާއި އިބްރާހިމް ވަހީދު ހަސަން (އިއްބެ) އަދި ހަސަން ރާއިފް އަހުމަދު (ހަންނަ) އެވެ. ހަންނަ މި މެޗުގައި ކުޅުނީ ސަސްޕެންޝަނަކަށް ފަހު އެވެ. އެއީ ފުރަތަމަ މެޗުގައި ބޫޓާން އަތުން މޮޅުވި މެޗުގައި ދެއްކި ރަތް ކާޑުގެ ސަބަބުން، އައި އެއް މެޗުގެ ސަސްޕެންޝަނަކާ ހެދި ބަންގްލަދޭޝް މެޗު ގެއްލުމަށް ފަހު އެވެ.
ބެންގަލޫރުގެ ސްރީ ކަންޓީރަވާ ސްޓޭޑިއަމްގައި މިއަދު ކުޅުނު މެޗު ފަށައިގެން ރާއްޖޭން ކުރިއަށް ޖެހިގެން އެޓޭކްތަކެއް ކުރެވޭތޯ ބެލި އެވެ. އެ ގޮތުން، ރާއްޖޭގެ އިބްރާހިމް އައިސަމް އާއި ޑުންގާ އަދި ކެޕްޓަން، ސަމޫހު އަލީ (ސަމުއްޓެ)، އޭރިއާބޭރުން ޖެހި ބޯޅަތައް ދިޔައީ ހުރަސްދަނޑިމަތިންނެވެ.
ލެބަނަން އިން ލީޑުނެގީ މެޗުގެ 23 ވަނަ މިނިޓްގަ އެވެ. މި ލަނޑު ޖެހީ އެ ޓީމުގެ ކެޕްޓަން، ހަސަން މާތޫކް އެވެ. އޭރިއާ ރޮނގުމަތިން ލިބުނު ހިލޭ ޖެހުމެއްގައި މާތޫކް ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ. އޭގެ ފަހުން، ލެބަނަން އިން އިތުރު ގޯލެއް ޖަހަން ގާތްގާތުގައި ލިބުނު ދެ ފުރުސަތެއް ނަގާލި އެވެ.
ރާއްޖޭން ދެ ވަނަ ހާފަށް ނުކުތީ އިއްބެގެ ބަދަލުގައި ދާދު ކުޅެން އަރުވައިގެންނެވެ.
ދެ ވަނަ ހާފުގައި ރާއްޖޭން ލެބަނަން ހާފުގެ ތެރޭގައި ބޯޅަ ހިފަހައްޓައިގެން ކުޅެ ފުރުސަތެއް ލިބޭތޯ މަސައްކަތް ކުރަމުންދިޔަ އެވެ. އެ ގޮތުން މެޗުގެ 76 ވަނަ މިނިޓްގައި ރާއްޖޭގެ ހަމްޒާ މުހައްމަދު (ހަމްޕު) ޖެހި ޝޮޓެއް ބްލޮކްވެގެން އޭރިއާތެރެއިން ދާދު އަށް ލިބުމުން އޭނާ ޖާގައެއް ހޯދާފައި ޖެހި ބޯޅަ ދިޔައީ ހުރަސްދަނޑިމަތިންނެވެ.
މެޗުގެ 80 ވަނަ މިނިޓްގައި ރާއްޖޭގެ ހަމްޕު، ލެބަނަންގެ އޮފްސައިޑް މަޅިން ސަލާމަތްވެ، ހުސްކޮށް ބޯޅަ ހިފައިގެން ދާން މަސައްކަތް ކުރި ވަގުތު އޭނާ އަތުގައި ބޯޅަ ޖެހުމުން ލައިންސްމަން ވަނީ އެކަން ރެފްރީގެ ސަމާލުކަމަށް ގެނެސްފަ އެވެ.
