އޭޝިއަން ކްރިކެޓް ކައުންސިލް (އޭސީސީ)ގެ 16 އަހަރުން ދަށުގެ އިރުމަތީ މުބާރާތުގައި ވާދަކުރަން ރާއްޖޭގެ ޒުވާން ޓީމުން ތައްޔާރުވެއްޖެ އެވެ.
އޭސީސީ 16 އަހަރުން ދަށުގެ މުބާރާތުގައި ރާއްޖެއާ އެކު އޭޝިއާގެ އިރުމަތީ ޒޯންގެ ހަތް ގައުމަކުން ވާދަކުރާނެ އެވެ. ގްރޫޕް އޭގައި ހިމެނެނީ ނޭޕާލް، މެލޭޝިއާ އަދި ތައިލެންޑެވެ. ގްރޫޕް ބީގައި ރާއްޖެއާ އެކު ހިމެނެނީ ސިންގަޕޫރު، އިންޑޮނޭޝިއާ އަދި ހޮންކޮންގް އެވެ.
މި މަހުގެ 24 އިން ޖުލައި 4 އަށް މެލޭޝިއާގައި ކުރިއަށްދާ މުބާރާތަށް ތައްޔާރުވުމުގެ ގޮތުން ޖޫނިއާ ޓީމުން ފަރިތަކުރުންތައް ފެށި މިދިޔަ މަހު އެވެ. ސޯޅަ އަހަރުން ދަށުގެ ގައުމީ ޓީމު އެކުލަވާލުމުގައި ދާދި ފަހުން ނިމުނު ޖޫނިއާ ޗެމްޕިއަންޝިޕާއި އިންޓަ ސްކޫލް މުބާރާތުގައި ކުޅުންތެރިން ދެއްކި ކުޅުމަށް ވަނީ ބަލައިފަ އެވެ.
މި ފަހަރު އެކުލަވާލި 14 ކުޅުންތެރިންގެ ޓީމުގައި ފުވައްމުލަކުގެ ހަތް ކުޅުންތެރިން ހިމެނެ އެވެ. ޓީމުގެ ކެޕްޓަނަކީ ފުވައްމުލަކު ޓީމަށް ޖޫނިއާ މުބާރާތުގައި މޮޅަށް ކުޅުނު މަބްސަރު އެވެ. މީގެ އިތުރުން ޖޫނިއާ ޓީމްގެ ކޯޗު ރިޔާޒު ރަޝީދު އަކީ ވެސް ފުވައްމުލަކުގެ ކޯޗެކެވެ.
މީއީ، 2019 ވަނަ އަހަރުގެ ފަހުން ފުރަތަމަ ފަހަރަށް ބައިނަލްއަގްވާމީ މުބާރާތަކަށްދާ 16 އަހަރުން ދަށުގެ ޓީމްގައި މާލެއިން ބޭރުގެ ގިނަ ކުޅުންތެރިން ހިމެނުމަކީ ބޮޑު ކުރިއެރުމެއްކަމުގައި ކްރިކެޓް ބޯޑް އޮފް މޯލްޑިވްސް އިން ދެކެ އެވެ.
މި މުބާރާތަށް ގައުމީ ޓީމް ފުރުމަށް ހަމަޖެހިފައިވަނީ މި މަހުގެ 23 ވަނަ ދުވަހު އެވެ.
ގައުމީ ޓީމު އިއުލާންކޮށް ޓީމަށް ޖާޒީ ހަވާލްކޮށްދެއްވާފައިވަނީ ރައީސުލްޖުމްހޫރިއްޔާގެ ނައިބް ފައިސަލް ނަސީމް އެވެ. ރައީސް އޮފީހުގައި އޮތް މި ރަސްމިއްޔާތުގައި ނައިބް ރައީސް ވަނީ ގައުމީ ޓީމްގެ ކުޅުންތެރިންނަށް ހިތްވަރުދެއްވައިފަ އެވެ.
އޭސީސީ 16 އަހަރުން ދަށުގެ މުބާރާތުގައި ރާއްޖެ ކުޅޭ ފުރަތަމަ މެޗުގައި މި މަހުގެ 26 ވަނަ ދުވަހު ނިކުންނާނީ ސިންގަޕޫރާ ދެކޮޅަށެވެ. ދެ ވަނަ މެޗުގައި މި 28 ގައި ހޮންގްކޮންގާ ވާދަކުރާއިރު، ގްރޫޕް ސްޓޭޖުގެ ފަހު މެޗުގައި އިންޑޮނޭޝިއާއާ ދެކޮޅަށް ނުކުންނާނީ ޖޫން 29 ގަ އެވެ.
