އިސްތަންބޫލް (ޖޫން 10) - ޗެމްޕިއަންސް ލީގުގެ ފައިނަލްގައި މިރޭ އިންޓަ މިލާނާ ދެކޮޅަށް ނުކުންނަ މެންޗެސްޓާ ސިޓީ އަކީ ހުރިހާ ގޮތަކުން ވެސް އިންޓަ އަށް ވުރެ ވަރުގަދަ ޓީމެއް ކަމަށާއި އިންޓަ އިން ބަލަނީ ޓީމެއްގެ ގޮތުގައި ކާމިޔާބު ހޯދަން ކަމަށް އެ ޓީމުގެ ކޯޗު ސިމޯން އިންޒާގީ ބުނެފި އެވެ.
އިންޓަ އިން މިރޭގެ ފައިނަލަށް ނުކުންނާނީ އެ ކްލަބުގެ ތާރީހުގައި ހަތަރު ވަނަ ފަހަރަށް ޔޫރަޕްގެ އެންމެ ޝަރަފުވެރި ކްލަބު މުބާރާތް ކާމިޔާބު ކުރުމަށެވެ. އެންމެ ފަހުން އިންޓަ އިން ޗެމްޕިއަންސް ލީގު ކާމިޔާބުކުރީ 2010 ވަނަ އަހަރެވެ. އިންޓަ އިން ވަނީ މި ސީޒަންގައި އިޓާލިއަން ކަޕް ވެސް ކާމިޔާބުކޮށްފަ އެވެ.
އެކަމަކު، މިރޭ އިންޓަ އަށް އޮތީ ވަރުގަދަ އިމްތިހާނެކެވެ. އެ ޓީމާ އިދިކޮޅަށް ނުކުންނަ ސިޓީ އަކީ މި ވަގުތު ޔޫރަޕްގައި އެންމެ ރަނގަޅު ފޯމެއްގައި އޮތް އެއް ކްލަބެވެ. ފައިނަލަށް ނުކުންނައިރު، ސިޓީން ވަނީ އިނގިރޭސި ޕްރިމިއާ ލީގާއި އެފްއޭ ކަޕް ކާމިޔާބުކޮށްފަ އެވެ. ސިޓީގެ އަމާޒަކީ މި ސީޒަންގައި ތިން ތަށި ހަމަކުރުމެވެ.
ސިޓީ އަކީ އިންޓަ އަށް ވުރެ "ހުރިހާ ގޮތަކުން ވެސް ވަރުގަދަ" ޓީމެއްކަން އިންޒާގީ ވެސް ގަބޫލުކުރެ އެވެ. އެކަމަކު މިރޭގެ ފައިނަލް ކާމިޔާބުކުރުމަށް އިންޒާގީ ކުރަމުންދާ އުންމީދުތައް ގުޅިފައިވަނީ ޓީމެއްގެ ގޮތުގައި އިންޓަ އިން ކުރާ މަސައްކަތަށެވެ.
"އިންޓަ އަށް މި އޮތީ ތާރީހުން ސޮފުހާއަކަށް އެރުމުގެ ފުރުސަތު ލިބިފައި،" އިންޒާގީ ބުންޏެވެ.
"އަހަރަމެންނަށް އެނގޭ މިރޭގެ މެޗު ފަސޭހައެއްނުވާނެ ކަމަށް. އެކަމަކު، އަހަރަމެން މަސައްކަތްކުރާނަން. ޓީމެއްގެ ގޮތުގައި ކުރި މަސައްކަތުން މި ހިސާބަށް މި އާދެވުނީވެސް. ފައިނަލްގައި ކުޅެންޖެހޭނީ ކޮން ކަހަލަ ގޭމެއްކަން އަހަރަމެންނަށް އެނގޭ."
މިރޭގެ ފައިނަލް އަކީ މި ސީޒަންގައި ސިޓީން ކުޅޭ 60 ވަނަ މެޗެވެ. އަދި އިންޓަ އިން ކުޅޭ 57 ވަނަ މެޗެވެ.
އިންޒާގީ ބުނީ ގިނަ މެޗުތަކެއް ކުޅެންޖެހުނު ދިގު ސީޒަނެއްގައި، ގިނަ އުނދަގޫތަކާ ކުރިމަތިލާންޖެހިފައިވާ ކަމަށެވެ. އެކަމަކު، މުޅި ޓީމު ވެސް އޮތީ މިރޭގެ ފައިނަލަށް އެންމެ ރަނގަޅަށް ތައްޔާރުވެފައި ކަމަށެވެ.
ސިޓީ އާއި އިންޓަ ބައްދަލުކުރާ ޗެމްޕިއަންސް ލީގުގެ ފައިނަލް މެޗު ފަށާނީ މިރޭ ރާއްޖެ ގަޑިން 12 ޖަހާއިރު އެވެ.
