މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މިދިޔަ އަހަރު ފެށި ގައުމީ ބޮޑީބޯޑިން ލީގުގެ ސަބަބުން ރާއްޖޭގައި ބޮޑީބޯޑަރުންގެ ވާދަވެރިކަން ކުރިއަށް ވުރެ ބޮޑުވެއްޖެ ކަމަށް ގައުމީ ޖޫނިއާ ޗެމްޕިއަން، އާމިން އުމަރު މޫސާ ބުނެފި އެވެ.
ގައުމީ ބޮޑީބޯޑިން ލީގުގެ ފުރަތަމަ މުބާރާތް، ބުރުނު ޝިކާރު ބޮޑީބޯޑިން ޗެލެންޖުގެ ޕޯސްޓަރު ލޯންޗް ކުރުމާއި ބޮޑީބޯޑިން ލީގުގެ މައުލޫމާތު ގެނެސްދިނުމަށް ބޭއްވި އިވެންޓްގައި ވާހަކަ ދައްކަމުން އާމިން ބުނީ މި އަހަރުގެ ގައުމީ ބޮޑީބޯޑިން ލީގު މިދިޔަ އަހަރަށް ވުރެ ފޯރިގަދަވާނެ ކަމަށެވެ.
"މާ ވާދަވެރިވާނެ ކަމަށް ހިތަށް އަރާ. އެއީ ވަރަށް ގިނަ އެތުލީޓުން އެބަ ފެނޭ ކުރިން އަހަރާ ބަލާއިރު ވަރަށް ބޮޑުތަން ތަފާތު މަސައްކަތް ކުރާ ރޭޓާ އެއްޗެހި، ދެން ވެސް ތިބީ ވަރަށް މޮޅުވާން ހިފާ ކުޑަ އެތުލީޓުން އިޔަން މެން ކަހަލަ، ޖޫނިއާ ޑިވިޝަން ވެސް ދެން މެންސް އޯޕަންސް ވެސް މި އޮތީ ވަރަށް ވާދަވެރިކޮށް،" މިދިޔަ އަހަރުގެ ގައުމީ މުބާރާތުގެ ޖޫނިއާ ބައިގެ ޗެމްޕިއަންކަން ހޯދި އާމިން ބުންޏެވެ.
"ލީގެއް ގޮތުގައި އޮންނާތީ، އެންމެން ވެސް ހުރިހާ އިވެންޓެއްގައި ބައިވެރިވެގެން. މޮޅުވެވޭނެކަން އެނގޭ ދެން އިވެންޓް ވެސް މަދުވީމަ، ކޮމްޕެޓިޓިވް، ލީގު ތައާރަފް ކުރީމަ ބޮޑީބޯޑިން ފެންނަ ގޮތް ވަރަށް ކޮމްޕެޓިޓިވް،"
މިދިޔަ އަހަރު ރާއްޖޭގައި ބޭއްވި ބައިނަލްއަގުވާމީ ބޮޑީބޯޑިން މުބާރާތް، ވިޒިޓް މޯލްޑިވްސް ޕްރޯގެ ޖޫނިއާ ފައިނަލުގައި ވާދަކުރި އާމިން ބުނީ ބޮޑީބޯޑިން ސީޒަން ލީގެއްގެ ފޯމެޓްގައި އިންނާތީ އެތުލީޓެއް ގޮތުގައި މި އިންނަނީ މުޅި އަހަރުގެ ޗެމްޕިއަންކަން ނެގުމުގެ ވިސްނުން ކަމަށެވެ.
ނޫސްވެރިންގެ ބައްދަލުވުމުގެ ތެރެއިން އާމިން ވާހަކަ ދައްކަނީ.--- ފޮޓޯ: މުހައްމަދު ޝާބިން/ އަދަދު
"ވާގޮތަކީ ހުރިހާ އިވެންޓަކަށް ވެސް އެއްވަރަކަށް އެބަޖެހޭ މަސައްކަތްކުރަން، ފޯކަސް ކުރަން. ހުރިހާ އެތުލީޓުން ވެސް އެ މެންޓާލިޓީ އިންނާތީ ވަރަށް ވާދަވެރިކޮށް ކޮންމެ މުބާރާތެއް ވެސް ދަނީ، އެހެންވީމަ އެއްބައި އެތުލީޓުން ވަކި މުބާރާތަކަށް ފޯކަސް ކުރުން މިހާރު ނެތް، ހުރިހާ މުބާރާތަކަށް ވެސް އެންމެން ވަރަށް ފޯމުގައި މި ތިބެނީ،" ދުނިޔޭގެ ޖޫނިއާ ރޭންކިންގެ ތިން ވަނަ އަށް ޖެހިލި އާމިން ބުންޏެވެ.
ގައުމީ ބޮޑީބޯޑިން ލީގުގެ ދެ މުބާރާތެއް ވަނީ ޏ. ފުވައްމުލަކާއި ކ. ތުލުސްދޫގައި ބާއްވަން ތާވަލުކޮށްފަ އެވެ. އާމިން ބުނީ ތަފާތު ސަރަަހައްދުތަކަށް މި ގޮތަށް މުބާރާތް ގެންދިއުމުން އޭގެ ފައިދާކުރާނެ ކަމަށެވެ.
"މި ފަހަރު ފުވައްމުލަކާއި ތުލުސްދޫ އިންނާތީ ވަރަށް ތަފާތުވާނެ ކަމަށް މި ބަލަނީ. ފުވައްމުލަށް އެއީ ރާއްޖޭގައި އިންނަ އެހެން ރާޅުތަކާ ބަލާފައި ތަފާތު ރާޅެއް، އަދި އެ ރާޅުގައި ނުއެއް އެޅޭ އެހެންވީމަ އޭގަ އަޅަން ވަރަށް ލުކް ފޯވާޑް ކުރެވޭ. ދެން ތުލުސްދޫގަ އިންނަނީ ރާއްޖޭގެ އެންމެ ރީތި ރާޅުކަމަށްވާތީ ވަރަށް ތަފާތު ޕާފޯމަންސް ފެންނާނެ ކަމަށް މި ބަލަނީ،" ރާޅާއެޅުމުގެ އިތުރުން ފުޓްބޯޅައިގައި ވެސް ކާމިޔާބީތަކެއް ހާސިލްކުރަމުން އަންނަ އާމިން ބުންޏެވެ.
ބޮޑީބޯޑިން ލީގުގެ ފުރަތަމަ މެޗު އޮންނާނީ މި މަހު 17-23 އަށް މާލޭ ރާޅުގަނޑު ސަރަހަައްދުގަ އެވެ. ބޮޑީބޯޑިން ލީގުގެ ދެ ވަނަ މުބާރާތް ކަމަށްވާ ފުވައްމުލަކު ޗެލެންޖު މިހާރު ބާއްވަން ނިންމާފައިވަނީ 21-29 ސެޕްޓެމްބަރުގަ އެވެ. ފުވައްމުލަކުގައި ބާއްވާ މި މުބާރާތް ކުރިން މިމުބާރާތް ބާއްވަން ހަމަޖެހިފައި އޮތީ ޖޫން 21-30 އަށެވެ. ގައުމީ ލީގުގެ ތިން ވަނަ މުބާރާތް ކ. ތުލުސްދޫގައި ބާއްވަން ނިންމާފައިވަނީ އޮކްޓޯބަރު 13-21 އަށެވެ. ލީގުގެ ފަހު މުބާރާތް ކަމަށްވާ ގައުމީ ބަނޑުފިލާ ޗެލެންޖު ބާއްވަން ނިންމާފައިވާ އާ ތާރީހަކީ ނޮވެމްބަރު 12 އިން ޑިސެމްބަރު އެކަކަށެވެ. ދުނިޔޭގެ އެންމެ މަތީ ފަންތީގެ ބޮޑީބޯޑަރުން ވާދަކުރާ މޯލްޑިވްސް ޕްރޯ މުބާރާތް އޮންނާނީ އޮގަސްޓް 3-12 އަށެވެ.
