ލަންޑަން (ޖޫން 6) - ބްރައިޓަން އަށް ކުޅެމުން އައި އާޖެންޓީނާ ގައުމީ ޓީމުގެ މިޑްފީލްޑަރު، އަލެކްސިސް މެކް އަލިސްޓާ، ލިވަޕޫލަށް ބަދަލުވާން ހުރިހާ ކަމެއް ނިމިފައިވާ ކަމަށް މީޑިއާ ރިޕޯޓްތައް ބުނެފި އެވެ.
ބްރައިޓަންއާ އެކު 2025 ވަނަ އަހަރުގެ ޖޫން މަހުގެ ނިޔަަލަށް ކޮންޓްރެކްޓްގައި ހުރި މެކް އަލިސްޓާ، 24، ގެ ސޮއި ހޯދަން ލިވަޕޫލުން 45-55 މިލިއަން ޑޮލަރުގެ ފީއެއް ދައްކަން ވަނީ އެއްބަސްވެފަ އެވެ. އަދި މެކް އަލިސްޓާ ލިވަޕޫލާ އެކު، ފަސް އަހަރުގެ ކޮންޓްރެކްޓެއްގައި ސޮއިކުރާ ގޮތަށް ހަމަޖެހިފައިވާއިރު، ރިޕޯޓްތައް ބުނާގޮތުން ކުރިއަށް އޮތް 24 ގަޑިއިރު ތެރޭގައި މެޑިކަލް ފުރިހަމަ ކުރާނެ އެވެ.
އާޖެންޓީނޯސް ޖޫނިއާސް އަށް 2016 ވަނަ އަހަރު ކުޅެން ފަށައި، އެ ޓީމު ދޫކޮށް، 2019 ވަނަ އަހަރު ބްރައިޓަން އަށް ބަދަލުވުމަށް ފަހު، މެކް އަލިސްޓާ ވަނީ އަލުން އާޖެންޓީނޯސް ޖޫނިއާސް އާއި ބޮކަ ޖޫނިއާސް އަށް ލޯން އެއްބަސްވުމެއްގެ ދަށުން ކުޅެފަ އެވެ.
މިދިޔަ ނޮވެމްބަރު/ޑިސެމްބަރު މަހު ގަތަރުގައި ބޭއްވި ފީފާ ވޯލްޑް ކަޕްގައި އާޖެންޓީނާ އަށް މޮޅު ކުޅުމެއް ދެއްކި މެކް އަލިސްޓާ ހޯދަން އިނގިރޭސި ކްލަބްތަކާއި އިޓަލީ އަދި ސްޕެއިންގެ ކްލަބްތަކުން ވެސް މަސައްކަތް ކުރި އެވެ.
އެކަމަކު، މެކް އަލިސްޓާ ބޭނުންވީ އޭނާގެ ކެރިއަރުގެ މުހިންމު އަހަރުތައް އިނގިރޭސި ޕްރިމިއާ ލީގުގައި ހޭދަކުރުމަށެެވެ. އަންނަ ސީޒަނުގައި ބްރައިޓަން އަށް ޔޫރޮޕާ ލީގުން ޖާގަ ހޯދައިދިނުމުގައި މެކް އަލިސްޓާ ވަނީ ބޮޑު ދައުރެއް އަދާކޮށް މުހިންމު ވަގުތުތަކުގައި ގޯލު ޖަހައިފަ އެވެ.
އަންނަ ސީޒަނަށް ޓީމު ވަރުގަދަ ކުރުމުގެ ގޮތުން ލިވަޕޫލުން ފުރަތަމަ ސޮއިކުރާ ކުޅުންތެރިއަކީ މެކް އަލިސްޓާ ކަމަށް ގިނަ ރިޕޯޓްތައް ބުނާއިރު، އެ ޓީމުން އަންނަނީ އިތުރު މިޑްފީލްޑަރުންނަށް ވެސް ފާރަލަމުންނެވެ. އެ ގޮތުން، ލިވަޕޫލުން އަންނަނީ ފްރާންސްގެ ނީސް އަށް ކުޅޭ ކެޕްރެން ތުރާމް އާއި ޖަރުމަނުގެ ބޮރޫޝިއާ މުންޗެންގްލަޑްބެކްގެ މަނޫ ކޯނޭ ހޯދަން މަސައްކަތް ކުރަމުންނެވެ.
ލިވަޕޫލުން ވަނީ ކޮންޓްރެކްޓް ހަމަވުމުން އެ ޓީމުގެ ތިން މިޑްފީލްޑަރުން ކަމަށްވާ ޖޭމްސް މިލްނާ، އަލެކްސް އޮކްސްލޭޑް ޗަމްބަލެއިން އަދި ނަބީ ކެއިޓާ ދޫކޮށްލައިފަ އެވެ.
