ލަންޑަން (ޖޫން 4) - އިނގިރޭސި އެފްއޭ ކަޕްގެ ފައިނަލުގައި ރޭ އިލްކާއި ގުންޑޮގާންގެ ދެ ގޯލާ އެކު، 2-1 އިން މެންޗެސްޓާ ޔުނައިޓެޑް ބަލިކޮށް މެންޗެސްޓާ ސިޓީން އެފްއޭ ކަޕްގެ ޗެމްޕިއަންކަން ހޯދައިފި އެވެ.
މިއީ ސިޓީން އެފްއޭ ކަޕް ކާމިޔާބުކުރި ހަތް ވަނަ ފަަހަރެވެ.
މި ކާމިޔާބާ އެކު މި ސީޒަނުގައި ތިން ތަށި ހޯދުމަށް ސިޓީން ކުރާ އުންމީދުތަކަށް ވަނީ އިތުރު ހިތްވަރެއް ލިބިފަ އެވެ. ސިޓީން ޖެހިޖެހިގެން ތިން ވަނަ ފަހަރަށް އިނގިރޭސި ޕްރިމިއާ ލީގު ކާމިޔާބުކުރިއިރު، އެފްއޭ ކަޕްގެ ތަށި ވެސް މި ވަނީ ހޯދައިފަ އެވެ. ޔުނައިޓެޑުން 1999 ވަނަ އަހަރު ސީޒަނުގެ ތިން މުބާރާތް ކާމިޔާބު ކޮށްގެން ހެދި ރެކޯޑާ ހަމަކުރަން ސިޓީން ދެން ނުކުންނާނީ ޗެމްޕިއަންސް ލީގުގެ ފައިނަލުގައި އިންޓަ މިލާނާ ދެކޮޅަށެވެ. އެ މެޗު އޮތީ މި މަހު 10 ވަނަ ދުވަހު އެވެ.
ލަންޑަންގެ ވެމްބްލީ ސްޓޭޑިއަމްގައި ރޭ ކުޅުނު ފައިނަލް މެޗު ފަށައިގެން 13 ސިކުންތު ތެރޭގައި ސިޓީން ލީޑުނެގި އެވެ. މި ލަނޑު ޖެހީ ސިޓީގެ ކެޕްޓަން، ގުންޑޮގާން އެވެ. އެފްއޭ ކަޕްގެ ފައިނަލެއްގައި މިހާތަނަށް ފެނުނު އެންމެ އަވަސް ގޯލު ޖަހާފައިވަނީ ރޭގެ މެޗުގައި ގުންޑޮގާން އެވެ. އެ ގޮތުން، ގުންޑޮގާން ވަނީ އޭރިއާބޭރުން ލިބުނު ބޯޅަ ގޯލުގެ މަތީ ކަނަށް އަމާޒުކޮށްލައިފަ އެވެ. މީގެ ކުރިން އެފްއޭ ކަޕް ފައިނަލެއްގައި އެންމެ އަވަސް ގޯލެއް ޖެހީ 2009 ވަނަ އަހަރު އެވަޓަންގެ ފޯވާޑް ލުއީސް ސަހާ، 25 ވަނަ ސިކުންތުގައި ޗެލްސީ ކޮޅަށެވެ.
ލަނޑު ޖެހުމަށް ފަހު ގުންޑޮގާން އުފާފާޅުކުރަނީ.--- ފޮޓޯ: އޭއެފްޕީ
ޔުނައިޓެޑުން އެއްވަރުުކުރީ 33 ވަނަ ސިކުންތުުގައި ލިބުނު ޕެނަލްޓީ އަކުން ބްރޫނޯ ފެނާންޑޭސް ވައްދާލި ގޯލުންނެވެ. މިއީ ސިޓީގެ ޖެކް ގްރީލިޝް އަތުގައި އޭރިއާތެރެއިން ބޯޅަ ޖެހުނު ކަމަށް ބަލައިފައި ދިން ޕެނަލްޓީ އެކެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން މި ޕެނަލްޓީގެ ނިންމުމަށް ގިނަ ފާޑުކިޔުންތަކެއް އަމާޒުވި އެވެ.
މި މެޗުން ސިޓީ މޮޅުކޮށްދިން ގޯލު ޖެހީ 51 ވަނަ މިނިޓްގައި ގުންޑޮގާން އެވެ. ހިލޭ ޖެހުމަކުން ސިޓީގެ ކެވިން ޑި ބްރޭނާ ނަގައިދިން ބޯޅަ އޭރިއާ ރޮނގުކައިރީގައި ހުރެފައި، ގުންޑޮގާން ވަނީ ގޯލުގެ ކަނަށް ފޮނުވާލައިފަ އެވެ. ބޯޅައިގައި މާ ބޮޑު ބާރެއް ނެތް ނަަމަވެސް، ރަނގަޅު ތަނަށް ފޮނުވާލުމުން ޔުނައިޓެޑްގެ ކީޕަރު ޑޭވިޑް ޑެހެއާ އަށް އެ ބޯޅަ ނުހުއްޓުވުނެވެ.
