މިލާން (ޖޫން 3) - އޭސީ މިލާނަށް ކުޅެމުން އަންނަ ފްރާންސް ވިންގް، ރަފައެލް ލެއާއޯ އިތުރު ފަސް އަހަރަށް އެ ޓީމުގައި މަޑުކުރަން ކޮންޓްރެކްޓްގައި ސޮއިކޮށްފި އެވެ.
ސްޕޯޓިން ލިޒްބަން އިން ކެރިއަރު ފެށި ލެއާއޯ، 23، މިދިޔަ ހަތަރު ސީޒަން ހޭދަކުރީ މިލާނުގަ އެވެ. ލެއާއޯ ހޯދަމުން އަންނަ ކުރިއެރުން ފެނި، ގިނަ ކްލަބްތަކެއްގެ އޮފާ އޭނާ އަށް ލިބުނު ނަމަވެސް، މިލާނުން މި ވަނީ 2028 ވަނަ އަހަރުގެ ޖޫން މަހުގެ ނިޔަލަށް ލެއާއޯގެ ކޮންޓްރެކްޓް އާ ކޮށްފަ އެވެ.
އެންމެ ފަހުން ލެއާއޯ ހުރި ކޮންޓްރެކްޓް ހަމަވާން އޮތީ އަންނަ އަހަރުގެ ޖޫން މަހުގަ އެވެ. އެހެންވެ، މިލާނުން މި ވަނީ އަހަރެއްހާ ދުވަސް ކުރިން ލެއާއޯގެ ކޮންޓްރެކްޓް ކަންކަން ހަމަޔަކަށް އަޅުވައިފަ އެވެ.
ލެއާއޯ ގެންދަން އެންމެ ބޮޑަށް މަސައްކަތް ކުރީ ޗެލްސީންނެވެ. ޗެލްސީން ލެއާއޯގެ ސޮއި ހޯދަން 100 މިލިއަން ޑޮލަރުގެ ބިޑެއް ކުރި ކަަމަށް ވެސް އިޓަލީ މީޑިއާތަކުން ވަނީ ރިޕޯޓްކޮށްފަ އެވެ. ލެއާއޯ ވަނީ ޕޯޗުގީސް މީޑިއާ އަކަށް ދިން އިންޓަވިއުއެއްގައި އިނގިރޭސި ކްލަބަކަށް ކުޅޭނަމަ އޭނާ އެންމެ ބޮޑަށް ޝައުގުވެރިވާ ޓީމަކީ އާސެނަލް ކަމަށް ބުނެފަ އެވެ.
ހަތް ފަހަރު ޔޫރަޕްގެ ޗެމްޕިއަންކަން ހޯދާފައިވާ މިލާން އަށް ލެއާއޯ ސޮއިކުރީ 2019 ވަނަ އަހަރު ފްރާންސް ލިލް އިންނެވެ. އެ ފަހުން، ލެއާއޯ ވަނީ މިލާނަށް ކުޅެދިން 162 މެޗުން 41 ލަނޑު ޖަހައިފަ އެވެ.
މިލާނުން 2011 ވަނަ އަހަރުގެ ފަހުން ފުރަތަަމަ ފަހަރަށް މިދިޔަ ސީޒަނުގައި އިޓާލިއަން ލީގުގެ ޗެމްޕިއަންކަން ހޯދިއިރު، ލެއާއޯ އަކީ ލީގުން ހޮވި މޮޅު ކުޅުންތެރިޔާ އެވެ. އަދި މި ސީޒަނުގައި މިލާނުން އިޓާލިއަން ލީގުގެ ގަދަ ހަތަރެއްގައި ނިންމައި، ޗެމްޕިއަންސް ލީގުގެ ސެމީ ފައިނަލަށް ދިއުމުގައި ލެއާއޯގެ ދައުރު ބޮޑެވެ.
