ރިޔާދު، ސައުދީ އަރަބިއްޔާ (ޖޫން 2) - ދުނިޔޭގެ ވަރުގަދަ ފަސް ލީގު ތެރޭގައި ސައުދީ ޕްރޮފެޝަނަލް (ޕްރޯ) ލީގު ހިމެނުމުގެ ފުރުސަތު އެބައޮތް ކަމަށާއި އެކަމަކު، އެ ކަމަށް ގިނަ މަސައްކަތްތަކެއް ކުރަން ޖެހޭ ކަމަށް މިދިޔަ ޖެނުއަރީ މަހު ސައުދީ ޕްރޯ ލީގުގެ ކްލަބް، އަލް ނަސްރަށް ސޮއިކުރި ޕޯޗުގީސް ތަރި، ކްރިސްޓިއާނޯ ރޮނާލްޑޯ ބުނެފި އެވެ.
މި އަހަރު ކުރީކޮޅުގައި، ދެ އަހަރުގެ ކޮންޓްރެކްޓެއްގައި ރޮނާލްޑޯ، 38، އަލް ނަސްރަށް ބަދަލުވިއިރު، އެ ކްލަބުން އޭނާ އަށް ސީޒަނެއްގެ މައްޗަށް ޖެހޭ މުސާރަ އަކީ މިހާތަނަށް ފުޓްބޯޅަ ކުޅުންތެރިއަކަށް ލިބޭނެ އެންމެ ބޮޑު މުސާރަ އެވެ. ސައުދީ އަރަބިއްޔާގެ މީޑިއާ ރިޕޯޓްތައް ބުނާގޮތުން، އަލް ނަސްރުން ރޮނާލްޑޯއާ އެކު ސޮއިކުރި ދެ އަހަރުގެ ކޮންޓްރެކްޓްގެ ޖުމްލަ އަގު، 200 މިލިއަން ޑޮލަރަށް ވުރެ ބޮޑުވާނެ އެވެ.
ސައުދީގެ ކްލަބް ފުޓްބޯޅަ ފޯރިގަދަ ކުރުމުގެ ގޮތުން އަންނަ ސީޒަނަށް އެ ގައުމުގެ ކްލަބްތަކުން އަންނަނީ ދުނިޔޭގެ ނަން މަޝްހޫރު ކުޅުންތެރިން ހޯދަން މަސައްކަތް ކުރަމުންނެވެ. އެ ގޮތުން، ލިއޮނަލް މެސީ، ލޫކަ މޮޑްރިޗް އަދި ކަރިމް ބެންޒެމާ ވެސް ސައުދީ ލީގަށް ބަދަލުވާން އުޅޭ ކަމުގެ ވާހަކަތައް އަންނަނީ ދެކެވެމުންނެވެ.
އަންނަ ސީޒަނުގައި ވެސް އަލް ނަސްރުން ފެންނާނެކަން ކަށަވަރުކޮށްދެމުން ރޮނާލްޑޯ ބުނީ މަޝްހޫރު ކުޅުންތެރިން ގިނަވުމަކީ ލީގަށް ލިބޭ ސަމާލުކަމާއި ފޯރިގަދަވާނެ ކަމެއް ކަމަށެވެ.
"އެ ވަރުގަދަ ނަންތައް، މަޝްހޫރު ކުޅުންތެރިން، ރަނގަޅު ޒުވާން ކުޅުންތެރިން ޓީމުތަކަށް އަންނަ ނަމަ ފެނިގެންދާނީ ވަރުގަދަ ލީގެއް، މަޝްހޫރު ގިނަ ކުޅުންތެރިން އައި ވަރަކަށް މި ލީގުގެ ފެންވަރު ވެސް ރަނގަޅުވާނެ، އެ މިސްރާބުން ކުރިއަށްދާނަމަ ސައުދީ ލީގަށް ދުނިޔޭގެ ވަރުގަދަ ފަސް ލީގުގެ ތެރެއިން ވެސް ޖާގަ ލިބިދާނެ،" ރޮނާލްޑޯ ބުންޏެވެ.
ކުރިން މެންޗެސްޓާ ޔުނައިޓެޑް، ރެއާލް މެޑްރިޑް އަދި ޔުވެންޓަސް އަށް ކުޅުނު ރޮނާލްޑޯ ބުނީ ސައުދީ ލީގުގެ އިންފްރާސްޓްރަކްޗާ އާއި ރެފްރީންގެ ފެންވަރާއި ޓެކްނޮލޮޖީގެ ކަންކަން ވެސް ރަނގަޅުކުރަން ޖެހޭ ކަމަށެވެ. އެ ގޮތުން، ޒަމާނީ މޮޑެލަށް ފުޓްބޯޅައިގެ ކަންކަން ކުރިއަށްގެންދާނަމަ އެންމެ އަވަހަށް އިސްނަގައިގެން ކުރަން ޖެހޭ އެއް ކަމަކީ ވީޑިއޯ އެސިސްޓަންޓް ރެފްރީ (ވީއޭއާރް)ގެ ކަންކަން ކުރުން ކަމަށް ރޮނާލްޑޯ ވަނީ ބުނެފަ އެވެ.
