މިލާން (މެއި 30) - ތިރީސް ތިން އަހަރުގެ ތެރޭގައި ނަޕޯލީ އަށް އިޓާލިއަން ލީގުގެ ޗެމްޕިއަންކަން ހޯދައިދިން ކޯޗު ލޫޗިއާނޯ ސްޕަލެއްޓީ މި ސީޒަން ނިމުމުން އެ ޓީމުގެ ކޯޗުކަމުން ވަކިވާން ނިންމައިިފިއެވެ.
އިޓަލީގެ ގައުމީ ޓީމުގެ ޓްރެއިނިން ސެންޓަރުގައި އިއްޔެ އޮތް އިވެންޓެއްގައި ވާހަކަދައްކަމުން ކުރިން ރޯމާ އަށް ކޯޗުކޮށްދިން ސްޕަލެޓީ، 64، ބުނީ ނަޕޯލީގެ ކޯޗުކަމުން ވަކިވުމަށް ފަހު، އޭނާ ފުޓްބޯޅައިން "ބްރޭކެއް" ނަގާނެ ކަމަށެވެ. އަދި އަހަރެއްހާ ދުވަހު ފުޓްބޯޅައާ ދުރުގައި ހޭދަކުރަން ނިންމާފައިވާ ކަމަށެވެ.
"އަހަރެން އެބަ ބޭނުންވޭ އަރާމުކޮށްލަން. ހަގީގަތުގައި އަހަރެން ވަރަށް ވަރުބަލިވެއްޖެ،" ސްޕަލެއްޓީ ބުންޏެވެ.
"އަހަރެއްހާ ދުވަސް އަހަރެން ނަޕޯލީ ނުވަތަ އެހެން ކްލަބާ ވެސް ހަވާލުނުވެ ހޭދަކުރަން ބޭނުން. މި ޓީމު މިހާރު މި އޮތް ލެވަލުން އަހަންނަށް ވުރެ ރަނގަޅު ކޯޗަކާ އެކު އިތުރަށް ކުރެވިދާނެ ކަމަށް މި ބަލަނީ."
މި ސީޒަންގެ އިޓާލިއަން ލީގުގައި ބާކީ ފަސް މެޗު އޮއްވައި، ސްޕަލެއްޓީ އިރުޝާދުގެ ދަށުން އެ ޓީމުން ވަނީ އިޓާލިއަން ލީގުގެ ޗެމްޕިއަންކަން ކަށަވަރުކޮށްފަ އެވެ. ނަޕޯލީން މި ސީޒަންގައި ހޯދި ކާމިޔާބީ އަކީ ސްޕަލެއްޓީގެ ދިގު ކޯޗިން ކެރިއަރުގައި ވެސް ހާއްސަ ޖާގައެއް ލިބިގެންދާނެ ކަމެކެވެ.
ސްޕަލެއްޓީ އިރުޝާދުގެ ދަށުން ނަޕޯލީ ކުޅޭ ފަހު މެޗަކަށް ވާނީ އަންނަ އާދިއްތަ ދުވަހު އަމިއްލަ ދަނޑުގައި ސަމްޕްޑޯރިއާއާ ދެކޮޅަށް ކުޅޭ މެޗެވެ.
އިޓަލީގެ އެމްޕޮލީން 1993 ވަނަ އަހަރު ކޯޗިން ކެރިއަރު ފެށި ސްޕަލެއްޓީ ވަނީ ފަހުން، އިޓަލީގެ ސަމްޕްޑޯރިއާ، ވެނެޒިއާ، އުދިނޭޒީ، އަންކޯނާ، ރޯމާ އަދި އިންޓަ މިލާނަށް ކޯޗުކޮށްދީފަ އެވެ. މީގެ ތެރެއިން ރޯމާ އާއި އުދިނޭޒީ އަށް ދެ ފަހަރެއްގެ މަތިން ކޯޗުކޮށްދިން ސްޕަލެއްޓީ އިޓަލީން ބޭރު ޓީމަކަށް އިރުޝާދުދިނީ 2009 އިން 2014 އަށް ރަޝިއާގެ ޒެނިޓު ޕީޓާސްބާގް އަށެވެ.
