ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ޗެލެންޖް ކަޕްގައި ފަހަތުން އަރާ ބަންގްލަދޭޝް ބަލިކޮށް ރާއްޖެއިން މުބާރާތުގެ ހަތް ވަނަ ހޯދައިފި އެވެ.
ކާވާ އަންހެން ޗެލެންޖު ކަޕްގައި ރާއްޖެއިން ގްރޫޕް ސްޓޭޖުގައި ކުޅުނު ތިން މެޗުން ބަލިވެފައިވާއިރު ރޭންކިންގެ ފުރަތަމަ މެޗުގައި ކިރިގިސްތާން އަތުން ވެސް ވަނީ ބަލިވެފަ އެވެ.
ނަމަވެސް, މިއަދު ރާއްޖެ އިން ވަނީ ބަންގްލަދޭޝުން ސެޓެއް ހޯދާފައިވަނިކޮށް ފަހަތުން އަރާ ތިން ސެޓު ހޯދައި 3-1 ސެޓުން މެޗުން މޮޅުވެފަ އެވެ. މެޗުގެ ފުރަތަމަ ސެޓު ބަންގްލަދޭޝް އިން 21-25 އިން ކާމިޔާބުކުރިއިރު، ރާއްޖެއިން ޖެހިގެން އައި ތިން ސެޓު ހޯދީ 25-14، 25-23 އަދި 25-15 އިންނެވެ.
މެޗުގެ ފުރަތަމަ ސެޓު ފެށިގޮތަށް ބަންގްލަދޭޝުން ރަނގަޅު ލީޑެއް ނެގި އެވެ. ދިވެހި ކުޅުންތެރިންނަށް ގާތް ގާތުގައި ހެދުނު ގޯސްތަކެއްގެ ފައިދާ ނަގައި 1-6 އިން ބަންގްލަދޭޝް ލީޑު ނެގި އެވެ. މި ދަނޑިވަޅުގައި ދިވެހި ޓީމުން ޓައިމްއައުޓެއް ނަގައި ހަމަޖެހިލަން މަސައްކަތްކުރި އެވެ. ނަތީޖާއެއްގެ ގޮތުން 7-8 އަށް ސްކޯ ކައިރި ކުރި އެވެ. ދިވެހި ޓީމަށް މައްސަލަތައް ދިމާވީ އަނެއްކާވެސް ކެޕްޓަން ހައްވާ ރާޝިދާ (ހައްވަ) އާއި އާމިނަތު ޝަހާ ޝާމިން އަށް ރަނގަޅު ހަމާލާތަކެއް ފޮނުވާ ނުލެވިގެންނެވެ.
ބަންގްލަދޭޝުން 10-14 ގައި ނެގި ހަތަރު ޕޮއިންޓްގެ ލީޑު އެޓީމުން ސެޓުގެ ފަހުކޮޅާ ހަމައަށް ދެމެހެއްޓި އެވެ. އެ ގޮތުން. 18-22 ގައި ސްކޯ އޮއްވައި ހައްވަގެ ރަނގަޅު ދެ ހަމަލާއަކުން ރާއްޖެ އިން ދެ ޕޮއިންޓަށް ސްކޯ ކައިރިކުރި ނަމަވެސް ބަންގްލަދޭޝުން ކުޅުން ރަނގަޅުކޮށް 21-25 އިން ސެޓު ކާމިޔާބުކުރި އެވެ.
ދެ ވަނަ ސެޓު ފަށައިގެން ދެ ޓީމުވެސް ފެނުނީ ވާދަވެރިކޮށެވެ. އެ ގޮތުން 8-8 އިން ސްކޯ އެއްވަރުވެފައި އޮއްވާ ރާއްޖެއިން ކުޅުން ވަރުގަދަކޮށް ގިނަ ޕޮއިންޓްތަކެއް ހޯދި އެވެ. ފާތިމަތު ޝަމްހާގެ މޮޅު ސާވިސްތަކާއި ޝަހާގެ ބާރު ހަމަލާތަކުން ރާއްޖެއިން ހަތް ޕޮއިންޓުގެ ލީޑެއް ނެގި އެވެ. ބަންގްލަދޭޝްއަށް މި ސެޓުގައި އިތުރު ފުރުސަތުތަކެއް ނުދީ 11 ޕޮއިންޓްގެ ލީޑަކާއި 25-14 އިން ރާއްޖެއިން މި ސެޓު ކާމިޔާބުކުރި އެވެ.
ތިން ވަނަ ސެޓުވެސް ރާއްޖެއިން ފެށީ އިތުބާރާއެކުގަ އެވެ. އެ ގޮތުން ކެޕްޓަން ހައްވަ ވަނީ ސެޓުގެ ކުރީކޮޅު ރަނގަޅު ހަމަލާތަކެއް ފޮނުވާލައި ފަސް ޕޮއިންޓްގެ ލީޑު ނަގައިދީފަ އެވެ. ދިވެހި ކުޅުންތެރިންގެ ރަނގަޅު ޑިފެންސްތަކާ އެކު ލީޑު ހިފަހައްޓައި ސެޓުގެ ފަހުކޮޅުން ރާއްޖެއިން ލީޑު ފުޅާކުރި އެވެ. ސެޓުގެ ފަހުކޮޅު ރާއްޖޭގެ ޓީމުން ބަދަލުތަކެއް ގެނައި ދަނޑިވަޅުގައި ބަންގްލަދޭޝުން ކުޅުން ވަރުގަދަކޮށް ޕޮއިންޓަކަށް ކައިރިކުރި އެވެ. 24-23 ގައި ސްކޯ އޮއްވާ ރާއްޖެއިން ސެޓު ކާމިޔާބުކުރީ ޝަހާގެ ބާރު ހަމަލާއަކުންނެވެ.
ޖެހިގެން އައި ސެޓުވެސް ރަނގަަޅަށް ފަށައި ރާއްޖެއިން ހަ ޕޮއިންޓްގެ ލީޑެއް ނެގި އެވެ. ނިސްބަތުން މޮޅު ކުޅުމެއް ރާއްޖެއިން ދެއްކި މި ސެޓުގައި ރާއްޖޭގެ ހުރިހާ ޑިޕާޓްމެންޓަކުންވެސް އިތުބާރާއެކު ކުޅުނެވެ. ރާއްޖެއިން މި ސެޓު ކާމިޔާބުކުރީ 25-15 އިންނެވެ.
މިއީ ގައުމީ ޓީމުގެ ކޯޗުކަމާ މީގެ ދޮޅު މަހެއްހާ ދުވަސްކުރިން ހަވާލުވި ތައިލެންޑްގެ ކޯޗު ވިޗީޕޮން ފޯންޗާޓްޔިންޗީޕްގެ ކޯޗުކަމުގައި ރާއްޖޭން ހޯދި ފުރަތަމަ މޮޅެވެ.
މި މެޗާ އެކު ރާއްޖެ އަށް ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ޗެލެންޖް ކަޕް ނިމުނީ އެވެ. މި މުބާރާތުގެ ފައިނަލް މެޗުގައި މާދަމާރޭ އިންޑިއާ ނިކުންނާނީ ކަޒަކިސްތާނާ ދެކޮޅަށެވެ.
