މެޑްރިޑް (މެއި 25) - ނަސްލީ ގޮތުން ދިމާކޮށްލި ވިނީޝިއުސް ޖޫނިއާ އަށް ރެއާލް މެޑްރިޑްގެ ސަޕޯޓަރުންގެ މެދުގައި އޮތް ލޯބި ދައްކާލި މެޗުގައި ރޭ ސްޕެނިޝް ލީގުގައި ރެއާލުން 2-1 އިން ރަޔޯ ވަޔެކާނޯ ބަލިކޮށް ލީގުގެ ދެ ވަނަ އަށް ޖެހިލައިފި އެވެ.
އެންމެ ފަހުން ރެއާލް ކުޅުނު މެޗުގައި ވެލެންސިއާ ސަޕޯޓަރުންގެ ބަޔަކު ވަނީ ވިނީޝިއުސްއާ ނަސްލީ ގޮތުން ދިމާކޮށްލައިފަ އެވެ. އެ މެޗުގައި ވިނީޝިއުސްއާ ކެނޑިނޭޅި ދިމާކުރާތީ ކެތްތެރިކަން ކޮޅުންލައި، އޭނާ އަށް ކުރެވުނު ފައުލަކަށް ވަނީ ރަތް ކާޑެއް ވެސް ދައްކައިފަ އެވެ. އެކަމަކު، ސްޕެނިޝް ލީގުގެ ޑިސިޕްލިނަރީ ކޮމިޓީން ވަނީ އެ ކާޑު ސަސްޕެންޝަނެއްގެ ގޮތުގައި ނުގުންނަން ނިންމައިފަ އެވެ.
ވިނީޝިއުސްއާ ދިމާކުރި ވެލެންސިއާ ސަޕޯޓަރުންނަށް އެ ކްލަބުން ވަނީ އުމުރު ދުވަހުގެ ސަސްޕެންޝަނެއް ދީފަަ އެވެ. ރޭ ރެއާލް ދަނޑުގައި ކުޅުނު މެޗުގައި ވިނީޝިއުސް އަށް އޮތް ލޯބި ދައްކާލުމުގެ ގޮތުން ބޮޑު ބެނާއެއް ދަމާފައި ހުރިއިރު، މެޗުގެ 20 ވަނަ މިނިޓްގައި ވިނީޝިއުސް އަށް ހާއްސަ ކުރުމުގެ ގޮތުން އިހުތިރާމްގެ ވަގުތެއް ހޭދަކުރި އެވެ. ވިހި ވަނަ މިނިޓްގައި އެކަން ކުރީ ވިނީޝިއުސްގެ ޖޯޒީ ނަމްބަރާ ގުޅުވުމުގެ ގޮތުންނެވެ. އެ މަންޒަރުތައް ފެނި ޝުކުރު އަދާކުރުމުގެ ގޮތުން ވިނީޝިއުސް ވަނީ ކޮޅަށް ތެދުވެ، އިޝާރާތުން ސަޕޯޓަރުންގެ އެކަންކަން ބަލައިގަތް ކަމަށް ބުނެފަ އެވެ.
ރެއާލް ދަނޑުގައި ކުޅުނު މެޗުގެ 31 ވަނަ މިނިޓްގައި އެ ޓީމަށް ލީޑުނަގައިދިނީ ކެޕްޓަން ކަރިމް ބެންޒެމާ އެވެ. ރެއާލްގެ އުރުގުއޭ މިޑްފީލްޑަރު، ފެޑެރީކޯ ވަލްވޭޑޭ އޭރިއާތެރެއަށް ދިން ބޯޅަ އަށް އަރައި، ބެންޒެމާ މި ގޯލު ޖެހީ ރަޔޯގެ ކީޕަރު، ސްޓޯލް ޑިމްޓްރިއޭވްސްކީ ކައިރިން ނައްޓައިފަ އެވެ.
ރަޔޯ އަށް އެެއްވަރުކޮށްދިން ގޯލު ޖަހައިދިނީ މެޗުގެ 84 ވަަނަ މިނިޓްގައި ރައުލް ޑެ ޓޯމާސް އެވެ. މިއީ ރެއާލްގެ އޭރިއާތެރެއިން ލިބުނު ބޯޅައަކުން ގޯލުގެ ކައިރީ ކަނަށް ފޮނުވާލައިގެން ޑެ ޓޯމާސް ޖެހި ގޯލެކެވެ. ރަޔޯ އިން އެއްވަރުކުރިތާ ހަތަރު މިނިޓް ފަހުން ރެއާލް މޮޅުކޮށްދިން ގޯލު ޖެހީ ރޮޑްރީގޯ އެވެ. ރޮޑްރީގޯ މި ގޯލު ޖެހީ އޭރިއާބޭރުން ގޯލުގެ ތިރީ ކަނަށް ބޯޅަ ފޮނުވާލައިގެންނެވެ.
ރެއާލް ލީގުގެ ދެ ވަނަ އަށް އެރީ 36 މެޗުން 74 ޕޮއިންޓް ހޯދައިގެންނެވެ. ރޭ އެސްޕަންޔޯލާ 3-3 އިން އެއްވަރުވި އެތުލެޓިކޯ މެޑްރިޑް ލީގުގެ ތިން ވަނައިގައި އޮތީ 36 މެޗުން 73 ޕޮއިންޓާ އެކު އެވެ.
