ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ވިމެންސް ޗެލެންޖް ކަޕްގައި މިއަދު ސްރީ ލަންކާއާ ދެކޮޅަށް ކުޅޭ މެޗުގައި ރަނގަޅު ފައިޓެއް ދީގެން ރާއްޖެ އަށް މޮޅުވެވޭނެ ކަމަށް ރާއްޖެ ޓީމުގެ އަރަމުން އަންނަ ތަރި، ނަރީމާ އިދުރީސް (ނަންނި) ބުނެފި އެވެ.
ނޭޕާލުގެ ކަތުމަންޑޫގައި މިހާރު ކުރިއަށްދާ މުބާރާތުގެ ގްރޫޕް ބީން ވަނީ ސެމީ އަށް ދާ ދެ ޓީމެއް ޔަގީންވެފަ އެވެ. އެއީ ރާއްޖެ އާއި ލަންކާ އަތުން ފުރަތަމަ ދެ މެޗުން މޮޅުވި، އުޒްބެކިސްތާނާއި ކަޒަކްސްތާން އެވެ. ރާއްޖެ އާއި ލަންކާ އަށް މިހާރު މުބާރާތުގައި ހޯދެން އޮތް ހިތްހަމަޖެހުމަކީ މޮޅެއް ހޯދައިގެން، ރަނގަޅު ރޫހެއްގައި މުބާރާތް ނިންމައިލުމެވެ.
ރާއްޖޭން މި ފަހަރުގެ މުބާރާތުގައި މިހާތަނަށް ކުޅުނު ދެ މެޗުގައި ވެސް ފަށައިގެން ރަނގަޅަށް ކުޅެފައި، ދެން މެޗުގެ ކޮންޓްރޯލް ގެއްލި ސީދާ ތިން ސެޓުން ބަލިވަނީ އެވެ.
"އަސްލު ދެ މެޗަށް ބަލާއިރު ވެސް ފުރަތަމަ ފައްޓާއިރު ރަނގަޅު ފައިޓެއް ދެވޭ ހަމަ. 14 އާއި 15 އާ ހަަމައަށް ވަކި ހިސާބަކުން ދެ ޕޮއިންޓެއް ތިން ޕޮއިންޓެއް ނަގާއިރަށް ޓީމު ޑައުންވާތަން މި ފެންނަނީ،" ސީނިއާ ގައުމީ ޓީމުގައި ހިމެނިގެން ތިން ވަނަ މުބާރާތުގައި ކުޅެމުން އަންނަ ނަންނި، އިއްޔެ އުޒްބެކިސްތާން މެޗަށް ފަހު ބުންޏެވެ.
"ފުރަތަމަ މެޗަށް (ކަޒަކްސްތާން މެޗަށް) ބަލާއިރު ބުނެވޭނީ އެންމެން ވެސް ވަރަށް ވީކްކޮށްނޭ ދިޔައީ. ދެން، ޑައުންވާ ގަޑީގައި އެ އެފޯޓް ނުލެވި، ދޫކޮށްލެވެނީ މާ ބޮޑަށް، ދެން މި މެޗުގައި (އުޒްބެކިސްތާން މެޗު) ވެސް ފެއްޓިއިރު ފައިޓެއް ދެމުން ދިޔައީ. ހަމަ ލީޑުނެގިއިރަށް އޭތި ދިޔައީ. ދެން ފަހު ސެޓު، އޭނީ ވަރަށް ބޮޑަށް ޑައުންވެފައި،"
ނަންނި ބުނީ ބައެއް ކުޅުންތެރިންގެ އަނިޔާގެ މައްސަލަތައް ވެސް އެބަހުރި ކަމަށާއި މިހާ ދަށްކޮށް ދާ ސަބަަބެއް ސީދާކޮށް ބުނަން އުނދަގޫ ކަމަށެވެ.
"ބުނެވޭނީ އިންޝާﷲ ދެން އިން މެޗުގައި ރަނގަޅުކުރާނަމޭ،" ނަންނި ބުންޏެވެ.
ރާއްޖެ ކުޅުނު ދެ މެޗުގައި ވެސް ބަލިވީ ސެޓެއް ނުލިބި އެވެ. އެކަމަކު، ލަންކާ އިން ވަނީ ކަޒަކްސްތާން މެޗުގައި ސެޓެއް ހޯދައިފަ އެވެ. ގްރޫޕްގެ ފަހު މެޗަށް ނުކުންނައިރު، ދެ ޓީމު ވެސް އަމާޒުހިފާނީ މޮޅަކާ އެކު ފިޔަވަޅެއް ކުރިއަށް ޖެހިލުމަށެވެ.
"އަސްލު ލަންކާ ވެސް ބަލިވެފައި އެ އޮތީ، ދެ ޓީމު (ރާއްޖެ އާއި ލަންކާ) ވެސް ކުޅޭނީ މޮޅުވާން، ދެން ފާހަގަކޮށްލަން ބޭނުންވަނީ، ލަންކާ ކުޅުމަށް ބަލާފައި މި ދެ ޓީމާ އެކު (ރާއްޖޭން އުޒްބެކިސްތާނާއި ކަޒަކްސްތާން ކޮޅަށް) ފުރަތަމަ ދެ ސެޓު އެ ގޮތަށް ފައިޓެއް ދެވިފައި އިނީމަ، އެ ފައިޓް އެ ގޮތަށް ދީގެން ލީޑުގައި ހިފަހައްޓައިގެން ކުރިއަށް ދެވިއްޖިއްޔާމު އަޅުގަނޑުމެންނަށް ތިން ސެޓުން ލަންކާ ބަލިކުރެވޭނެއޭ،" ނަންނި ބުންޏެވެ.
ފ. ފީއަލީ އަށް އުފަން ނަންނި އެންމެ ފުރަތަމަ ގައުމީ ޖޯޒީގައި ކުޅުނީ 2019 ވަނަ އަހަރު 23 އަހަރުން ދަށުގެ މުބާރާތުގަ އެވެ. ސީނިއާ ގައުމީ ޓީމުން އެންމެ ފަހުން ކުޅުނު ތިން މުބާރާތުގައި ވެސް ނަންނި ވަނީ ފަހަރަކަށް ވުރެ ފަހަރެއް ރަނގަޅުކޮށްފަ އެވެ.
މި އަހަރުގެ ފެބްރުއަރީ މަހު މާލޭގައި ބޭއްވި ފޯ ނޭޝަންސް ކަޕް ވޮލީބޯޅަ މުބާރާތުގައި ވެސް އެންމެ ގިނަ ބަޔެއްގެ ލޮލުގައި އަޅައިގަތް އެއް ކުޅުންތެރިއަކީ ނަންނި އެވެ.
ފަހަކަށް އައިސް ގައުމީ ސީނިއާ ޓީމުގައި ހިމެނޭ ޒުވާން ކުޅުންތެރިން އިތުރުވަމުން އަންނައިރު، މިއީ ވަރަށް ބޮޑު ޕޮޒިޓިވް ކަމެއްގެ ގޮތުގައި ނަންނި ދެކެ އެވެ.
"އަސްލު ސީނިއާ ޕްލޭޔަރުން މި ތިބި މީހުން ވަރަށް މޮޅު. މި އަރައިގެން އަންނަ ޔަންގް ކުޅުންތެރިންގެ ތެރެއިން މި ޓީމުގައި އެބައުޅޭ ވަރަށް ޔަންގް ދެ ކުއްޖެއް. އަސްލު ވަރަށް މޮޅު އެ މީހުން ވެސް. ޕްރެކްޓިސް ގަޑީގައި އެ މީހުން ދެކޮޅަށް ލާފައި، ސީިނިއާ ޓީމު އެއްކޮށް އަރުވައިގެން މި ކިޔަނީ ހަޔަކަށް ކުޅޭ މީހުން އަރުވައިގެން ކުޅޭއިރު ވަރަށް ބޮޑު ޗޭންޖެއް ފެނޭ، ހަމަ ޔަންގް ކޮށް އަރުވާފައި ތިބި ދެ މީހުން ވަރަށް މޮޅޭ ބުނެވޭނީ،" ގައުމީ ލެވަލްގައި ކުރު މުއްދަތެއްގެ ތެރޭގައި ބޮޑު ކުރިއެރުމެއް ހޯދި ނަންނި ބުންޏެވެ.
ލަންކާ އާއި ރާއްޖެ ކުޅޭ މެޗު ފަށާނީ މާލެ ގަޑިން 16:45 ގަ އެވެ.
