ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ޗެލެންޖް ކަޕްގައި ރާއްޖޭން މިހާތަނަށް ކުޅުނު ދެ މެޗުން ކަޒަކްސްތާނާއި އުޒްބެކިސްތާން އަތުން ބަލިވިއިރު، އެންމެ ބޮޑަށް ޓީމުން ފާހަގަކުރެވެނީ އަނިޔާ އާއި ކޮންފިޑެންސް ދަށްވުމުގެ މައްސަލަތައް ކަމަށް ޓީމުގެ އެސިސްޓަންޓް ކޯޗު މުހައްމަދު ފައިސަލް ބުނެފި އެވެ.
ފުރަތަމަ ދެ މެޗުން ބަލިވެ، ރާއްޖެ އަށް ވަނީ މުބާރާތުގެ ސެމީ ފައިނަލަށް ދިއުމުގެ ދޮރު ބަންދުވެފަ އެވެ. ކަޒަކްސްތާން އަތުން ރާއްޖެ ފުރަތަމަ މެޗުގައި ބަލިވިއިރު، އުޒްބެކިސްތާން އަތުން ވަނީ ދެ ވަނަ މެޗުގައި ބަލިވެފަ އެވެ. ދެ މެޗުން ވެސް ރާއްޖެ ބަލިވީ ރަނގަޅަށް ފަށައި، އެއް ފެންވަރެއްގައި ކުޅުން ނުދެމެހެއްޓި، ސީދާ ތިން ސެޓުންނެވެ.
ރާއްޖޭން ކަޒަކްސްތާނާ ކުޅުނު މެޗުގެ ސެޓުތައް ދިޔައީ، 25-16، 25-14 އަދި 25-06 އިންނެވެ. އަދި އިއްޔެ އުޒްބެކިސްތާނުން ރާއްޖެ ބަލިކުރިިއިރު، ސެޓުތައް ގެންދިޔައީ 25-18، 25-14 އަދި 25-04 އިންނެވެ.
"އެންމެ ފުރަތަމަ ވެސް ފާހަގަކޮށްލަން ޖެހޭ ކަމަކީ ފުދޭ ވަރަކަށް އިންޖަރީސް މައްސަލަ އެބައުޅޭ. އެ ގޮތުން އެންމެ މުހިންމު އެއް ކުޅުންތެރިއަކު މާޖީ (އައިޝަތު މާޖިދާ ކަޒަކްސްތާން މެޗުގައި އަނިޔާވެގެން ބަދަލުކުރިއިރު، އުޒްބެކިސްތާން މެޗުގައި ނުކުޅެވުނު) ވަރަށް ބޮޑު އިންޖަރީއެއްގައި އެ ހުރީ،" އިއްޔެ އުޒްބެކިސްތާން މެޗަށް ފަހު ދިން އިންޓަވިއުގައި ފައިސަލް ބުންޏެވެ.
ފުރަތަމަ ދެ މެޗަށް ބަލާއިރު، ރާއްޖޭން އެންމެ ރަނގަޅުކުރަން ޖެހޭނެ ކަމަކީ، ޕްރެޝަރުގައި ކުޅެން ޖެހުނު ކަމުގައި ވިޔަސް ކޮންފިޑެންސާ އެކު ކުޅުން ކަމަށް ފައިސަލް ވަނީ ބުނެފަ އެވެ.
"އެންމެ ފުރަތަަމަ ވެސް އެ ލިބޭ ބޯޅަ ކޮންފިޑެންސާ އެކު ޖަހަންވީ، ބްލޮކްވަންޏާ ޓަޗް އައުޓް ހަދަންވީ، ބޭރުގައި ތިބެގެން އެބަ ކިޔައިދެން ބްލޮކްވީމަ މިހެން ހަދާށޭ. ހައްވަ (ޓީމުގެ ކެޕްޓަން، ހައްވާ ރާޝިދާ)، އަޅުގަނޑުމެންނަށް އެބަފެނޭ ކޮންފިޑެންސާ އެކު އެ ބޯޅަ ކުޅެމުންދާތަން. ދެން، ބުނެވޭނީ އަދި ބައެއް ކުޅުންތެރިން އެހާ އެކްސްޕީރިއަންސް ނެތީއޭ،" 2019 ވަނަ އަހަރު ސެންޓްރަލް ޒޯން މުބާރާތުން ރިހި މެޑަލް ރާއްޖޭން ހޯދިއިރު، ޓީމުގެ ކޯޗިން ޓީމުގައި ހިމެނުނު ފައިސަލް ބުންޏެވެ.
ކަޒަކްސްތާނާއި އުޒްބެކިސްތާނާ ދެކޮޅަށް ވެސް ރާއްޖޭން ފަށައިގެން ފުރަތަމަ ސެޓުގައި ވަރަށް ރަނގަޅަށް ކުޅުނު ކަމަށް ފައިސަލް ވެސް ވަނީ ފާހަގަކޮށްފަ އެވެ.
"ވަކި ހިސާބަކުން އަޅުގަނޑުމެންނަށް މި ދަނީ، ހަމަ ބުނެވޭނީ ހަމަ ނިންމައި ނުލެވިގެންނޭ. ހަމަ އެޓޭކް ދަށްވެގެން ފުރަތަމަ ސެޓު ވެސް ގެއްލިގެން ދިޔައީ،" ފައިސަލް ބުންޏެވެ.
ޓީމުގައި ހިމެނޭ ޒުވާން ކުޅުންތެރިން ދައްކާ ކުޅުމުން ރާއްޖޭގެ ވޮލީގެ ކުރިމަގު ފެންނަނީ ރަނގަޅަށް ކަމަށް ވެސް ފައިސަލް ވަނީ ބުނެފަ އެވެ. އެ ގޮތުން، މި މުބާރާތުގެ ސްކޮޑުގައި ހިމެނިގެން މުޅިން އަލަށް ކުޅެމުން އަންނަ، ލިބަރޯ، މައިހާ އަލީ އާއި މާޔާ ހުސެއިން ސޮލާހަށް މި ލިބޭ ތަޖުރިބާގެ ބޭނުންހިފައި، އެ ކުޅުންތެރިންނަށް "ކުރިއަށްދިއުމުގައި ފަސޭހަތަކެއް ވެގެންދާނެ" ކަމަށް ފައިސަލް ގަބޫލުކުރެ އެވެ.
"ޒުވާން ކުޅުންތެރިން ކުޅެން ނުކުތުމަކީ ޓީމަށް ލިބޭ ކުރިއެރުމެއް. އަޅުގަނޑުމެންގެ ޓީމުން މިއަދު (އިއްޔެ) ގިނައިން ކުޅެމުން އެ ދަނީ ދެ ވަނަ ލިބަރޯ މައިހާ. ޒުވާން ކުޅުންތެރިން، މާޔާ ވެސް އިއްޔެގަ (ކަޒަކްސްތާން ކޮޅަށް) ރަނގަޅު ކުޅުމެއް ދައްކާފައިވަނީ، ޒުވާން ކުޅުންތެރިންނަށް މި ލިބޭ ފުރުސަތަކީ ކުރިއަށްދާން ލިބޭ ވަރަށް ބޮޑު ފުރުސަތެއް،" ފައިސަލް ބުންޏެވެ.
ގްރޫޕްގެ ފަހު މެޗުގައި ރާއްޖޭން މިއަދު ހަވީރު ލަންކާއާ ބައްދަލުކުރާނެ އެވެ. މި ދެ ޓީމު ވެސް އަމާޒުހިފާނީ މޮޅެއް ހޯދައިގެން، މުބާރާތް ނިންމާލުމަށެވެ.
"އަޅުގަނޑުމެންގެ އުންމީދަކީ ލަންކާ އަތުން މޮޅުވުން، މި ކުޅުނު ދެ މެޗުގައި އަޅުގަނޑުމެންނަށް ހެދުނު މިސްޓޭކްތައް ރަނގަޅުކޮށްގެން އެ މެޗުން މޮޅުވާން އުންމީދުކުރަނީ،" ފައިސަލް ބުންޏެވެ.
ލަންކާ އާއި ރާއްޖެ ކުޅޭ މެޗު ފަށާނީ މިއަދު ހަވީރު ރާއްޖެ ގަޑިން 17:30 ގަ އެވެ.
