ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ޗެލެންޖް ކަޕްގައި ރާއްޖޭގެ ގައުމީ އަންހެން ޓީމުން ކުޅުނު ފުރަތަމަ މެޗުގައި މިރޭ ކަޒަކްސްތާން އަތުން ސީދާ ތިން ސެޓުން ބަލިވެއްޖެ އެވެ.
ކަތުމަންޑޫގެ ނެޝަނަލް ސްޕޯޓްސް ކޮމްޕްލެކްސް ވޮލީ ކޯޓުގައި ކުޅުނު މެޗުން ކަޒަކްސްތާނުން ސެޓުތައް ގެންދިޔައީ، 25-16، 25-14 އަދި 25-06 އިންނެވެ.
ކަޒަކްސްތާނަކީ މި ފަހަރުގެ މުބާރާތުގައި ވާދަކުރާ އަށް ގައުމުގެ ތެރެއިން އެންމެ ވަރުގަދަކޮށް އޮތް އެއް ޓީމެވެ. އެ ޓީމާ ދެކޮޅަށް ރާއްޖޭގެ ފެށުން ރަނގަޅު ނަމަވެސް، ސެޓެއް ވެސް ނުގެންދެވެނިސް ކަޒަކްސްތާނުން ވަނީ މެޗުގެ ކޮންޓްރޯލް ނަގައި ކާމިޔާބު ހޯދައިފަ އެވެ.
ރާއްޖެ ޓީމުގެ ހައްވަ ޕޮއިންޓެއް ހޯދުމަށް ފަހު އުފާފާޅުކުރަނީ.--- ފޮޓޯ: އަދަދު
މިރޭގެ މެޗު ފަށައިގެން ފުރަތަމަ ސެޓުގައި ރާއްޖޭން ވަރުގަދަކޮށް ފެށި އެވެ. އެ ގޮތުން 13 ޕޮއިންޓާ ހަމައަށް ރާއްޖޭން ރަނގަޅު ރޫހެއްގައި ކުޅެ، ރަނގަޅު ލީޑެއް ވެސް ނަގައި، ކަޒަކްސްތާން ހާސްކޮށްލި ވަގުުތު ކޮޅެއް ވެސް ދިޔަ އެވެ. އެކަމަކު، ރާއްޖެ ޓީމުގެ ކެޕްޓަން، ހައްވާ ރާޝިދާ (ހައްވަ) ހުންޖެހިގެން ރަނގަޅަށް ރިކަވާވަމުން އައި ދަނޑިވަޅެއްގައި ކުޅެން ޖެހުމުން ފަހު ދެ ސެޓުގައި އެންމެ އެކަށީގެންވާ ވަރަށް ނުކުޅެވުނެވެ.
އަނެއްކޮޅުން، ފުރަތަމަ ސެޓު ފަށައިގެން ރާއްޖެ ޓީމަށް އެންމެ ރަނގަޅު ކުޅުމެއް ދެއްކި އެއް ކުުޅުންތެރިޔާ، އައިޝަތު މާޖިދާ ފަލަމަސްގަނޑަށް އަނިޔާވެގެން ބަދަލުކުރަން ޖެހުން ވެސް އެއީ ފަހު ދެ ސެޓުގައި އެންމެ ރަނގަޅަށް ވާދަނުކުރެވިދިޔަ އެއް ސަބަބެވެ.
މިއީ ގައުމީ އަންހެން ޓީމުގެ ކޯޗުކަމާ މީގެ ދޮޅު މަހެއްހާ ދުވަސްކުރިން ހަވާލުވި ތައިލެންޑްގެ ތަޖުރިބާކާރު ކޯޗު، ވިޗީޕޮން ފޯންޗާޓްޔިންޗީޕްގެ އިރުޝާދުގެ ދަށުން ރާއްޖޭން ކުޅުނު ފުރަތަމަ މެޗުގައި ފަށައިގެން ރަނގަޅަށް ކުޅުނު ކަމަށް އޭނާ ވެސް ވަނީ ބުނެފަ އެެވެ. އެކަމަކު، ފަހުން އަނިޔާގެ ސަބަބުން ޓީމަށް އަސަރުކުރިއިރު، ކަޒަކްސްތާނުން ކުޅެލީ އެ ޓީމުގެ އަސްލު ލެވަލްގައި ކަމަށްވާތީ އުނދަގޫވީކަމަށް ވިޗީފޮން ވަނީ ބުނެފަ އެވެ.
މި ފަަހަރުގެ ކާވާ ޗެލެންޖް ކަޕްގައި ވާދަކުރާ ގައުމީ އަންހެން ވޮލީ ޓީމުގެ ކުޅުންތެރިންނާއި އޮފިޝަލުން ފޮޓޯ އަކަށް ހުއްޓިލައިގެން.
ޕޮޒިޓިވް ކަމެއްގެ ގޮތުގައި ވިޗީފޮން ފާހަގަކުރީ އަނިޔާވެގެން ބަދަލުކުރި މާޖިދާގެ ބަދަލަކަށް އެރި، މާޔާ ހުސެއިން ސޮލާހު ފުރަތަމަ ފަހަރަށް ގައުމީ ޓީމުގެ ޖޯޒީގައި މި ފަދަ މެޗަކަށް އަރައި ދެއްކި އުންމީދީ ކުޅުމުގެ އިތުރުން ގައުމީ އަންހެން ޓީމުގެ ދެ ވަނަ ލިބަރޯ، މައިހާ އަލީ އަށް ވެސް ކުރިއަށްދާން ލިބުނު ތަޖުރިބާ އެވެ.
ކަޒަކްސްތާން ޓީމަށް ރާއްޖެ މެޗުގައި އެންމެ ރަނގަޅު ކުޅުމެއް ދެއްކީ، ބަލާގާޒިނޯވާ އާއި އުއަތަޔޭވާ އެެވެ.
ރާއްޖެ ހިމެނޭ ގްރޫޕް ބީގެ ފުރަތަަމަ މެޗުގައި އުޒްބެކިސްތާނުން ވަނީ މިއަދު ހެނދުނު ކުޅުނު މެޗުން ސްރީ ލަންކާ އަތުން ސީދާ ތިން ސެޓުން މޮޅުވެފަ އެވެ.
މި ގްރޫޕްގައި މާދަމާ ކުޅެން ހަމަޖެހިފައިވަނީ ލަންކާ އާއި ކަޒަކްްސްތާން ކުޅޭ މެޗާއި ރާއްޖެ އާއި އުޒްބެކިސްތާން ބައްދަލުކުރާ މެޗެވެ. ރާއްޖެ އާއި އުޒްބެކިސްތާން ކުޅޭ މެޗު ފަށާނީ ރާއްޖެ ގަޑިން 17:45 ގަ އެވެ.
