މިދިޔަ ފެބްރުއަރީ މަހު މާލޭގައި ބޭއްވި ފޯ ނޭޝަންސް ކަޕްގައި ރާއްޖޭގެ ގައުމީ އަންހެން ޓީމުން ރިހި މެޑަލް ހޯދިއިރު، ދިން ވަރުގެ ސަޕޯޓެއް، މިއަދު ނޭޕާލްގައި ފެށި ކާވާ ޗެލެންޖް ކަޕްގައި ވެސް ގައުމީ އަންހެން ޓީމުން ބޭނުންވާ ކަމަށް ޓީމުގެ ކެޕްޓަން ހައްވާ ރާޝިދާ (ހައްވަ) ބުނެފި އެވެ.
މިދިޔަ ފެބްރުއަރީ މަހު މާލޭގައި ބޭއްވި ފޯ ނޭޝަންސް ކަޕް ވޮލީބޯޅަ މުބާރާތުގައި މެލޭޝިއާ އާއި ސިންގަޕޫރާ ވާދަކޮށް ރާއްޖޭން ވަނީ ރިހި މެޑަލް ހޯދައިފަ އެވެ. ފައިނަލުގައި ރާއްޖެ ބަލިވީ ފަސް ސެޓު ކުޅެގެން ސިންގަޕޫރު އަތުންނެވެ. އެ މުބާރާތުގައި ގައުމީ އަންހެން ޓީމަށް ވަނީ ވަރަށް ބޮޑު ތަރުހީބެއް ލިބިފަ އެވެ.
ޓީމުގެ ކެޕްޓަން، ހައްވަގެ އުންމީދަކީ ގައުމުން ބޭރުގައި ކުޅުނަސް ޓީމަށް ސަަޕޯޓަރުންނަށް ދެވުނު އެންމެ ބޮޑު ސަޕޯޓެއް ދިނުމަށެވެ.
"އެންމެ ފަހުން ފޯ ނޭޝަންސް (ކަޕް)ގައި ރާއްޖޭގައި ކުޅުނު މެޗަށް ބަލާއިރު، ހަމަ އެ ރޫހުގައި އަދިވެސް މި އޮތީ ޓީމު ހަމަ ވަރަށް ފޯމުގައި، ހުރިހާ ޕްލޭޔަރުން ވެސް ބޭނުންވަނީ މެޑަލެއް. ހަމަ އިރާދަކުރެއްވިއްޔާ އެ ހިސާބަށް ދެވޭތޯ މަސައްކަތް ކުރާނީ،" އިއްޔެ، ނޭޕާލަށް އައިސް ގައުމީ އަންހެން ޓީމުން ބޭއްވި ފަރިތަކުރުންތަކަށް ފަހު ހައްވަ ބުންޏެވެ.
"ބުނެވޭނީ ހަމަ ފޯ ނޭޝަންސްގައި އެ ދިން ސަޕޯޓް އަޅުގަނޑުމެންނަށް ވަރަށް ބޮޑަށް ފެނި، އޭގެއިންނޭ އަޅުގަނޑުމެން ހިތްވަރު ހޯދައިގެން މި މުބާރާތަށް (ކާވާ ޗެލެންޖް ކަޕް އަށް) އައީ،"
ފޯ ނޭޝަންސް ކަޕްގައި ރާއްޖޭން ނުކުތީ ތަޖުރިބާކާރު ދިވެހި ކޯޗު، އިބްރާހިމް ނިޒާރު (ބޮޑޭ)ގެ ކޯޗުކަމުގަ އެވެ. ފޯ ނޭޝަންސް ކަޕަށް ފަހު ގައުމީ އަންހެން ޓީމުގެ ކޯޗިން ސްޓާފުންނަށް ބަދަލުގެނައިއިރު، ކޯޗަކަށް ހަމަޖެއްސީ ތައިލެންޑް ގައުމީ ޔޫތު އަންހެން ޓީމުގެ ހެޑް ކޯޗުކަމާއި ވިއެޓްނާމްގެ ގައުމީ އަންހެން ވޮލީ ޓީމުގެ ހެޑް ކޯޗުކަން ކޮށްފައިވާ ތަޖުރިބާކާރު ކޯޗު، ވިޗީޕޮން ފޯންޗާޓްޔިންޗީޕް އެވެ.
ޗެލެންޖް ކަޕަށް ދެ ކޯޗުންނާ އެކު، އަންހެން ޓީމުން މި އަހަރު ތެރޭ ގެންދިޔަ ޓްރެއިނިން ރަނގަޅުކަން ހައްވަ ފާހަގަކުރި އެވެ.
"މިހާރު ތިން މަހުގެ ޓްރެއިނިން އަށް ފަހު މުބާރާތަށް މިއައީ. މާދަމާ (މިއަދު) މި އޮތީ މެޗެއް، ކަޒަކްސްތާނާ އެކީގައި، ޓީމު އޮތީ ވަރަށް ރެޑީގައި، އުންމީދުކުރަން ޓީމު ވަރަށް ރަނގަޅަށް ޕާފޯމްކުރާނެ ކަމަށް،" މިއަދު ކަޒަކްސްތާނާ ކުޅޭ މެޗާ ބެހޭގޮތުން ހައްވަ ބުންޏެވެ.
ރާއްޖޭން މިއަދު ކަޒަކްސްތާނާ ކުޅުމަށް ފަހު، ގްރޫޕް ދެ ވަނަ މެޗުގައި މާދަމާ ކުޅޭނީ އުޒްބެކިސްތާނާ އެވެ. އަދި ބުދަ ދުވަހު ގްރޫޕްގެ ފަހު މެޗުގައި ސްރީ ލަންކާއާ ކުޅޭނެ އެވެ.
"ޓީމުތައް ބަލާއިރު، ވާދަކޮށްލެވޭ ޓީމުތައް މި އުޅެނީ، އަޅުގަނޑުމެން ސައިޑްގައި މި އުޅެނީ ލަންކާ، ލަންކާ، އަޅުގަނޑުމެން ކުޑަ ހިތްވަރެއް ކޮށްލައިފިއްޔާ އަޅުގަނޑު ބުނާނީ ވާނެއޭ، އަޅުގަނޑު ބުނާނީ ޓީމު މި އޮތީ މީގެ ދެތިން އަހަރު ކުރިއަށް ވުރެ، ރަނގަޅަށް ވަރަށް ފިޓްކޮށް އޮތީ،" ގައުމީ އަންހެން ޓީމަށް ފާއިތުވި 13 އަހަރު ކުޅެފައިވާ ހައްވަ ބުންޏެވެ.
ކަޒަކްސްތާނާ ދެކޮޅަށް ރާއްޖޭން ކުޅޭ މެޗު ފަށާނީ ރާއްޖެ ގަޑިން މިއަދު އިރުއޮއްސި 18:15 ގަ އެވެ.
