ނޭޕާލުގައި މިއަދު ފެށި ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ޗެލެންޖް ކަޕަށް ރާއްޖޭގެ ގައުމީ އަންހެން ޓީމުގެ ތައްޔާރީތައް މިހާރު ނިމިފައިވާ ކަމަށާއި ދެން އޮތީ މުބާރާތުގައި ހާސިލްކުރަން ބޭނުންވާ ކަންކަމަށް ފޯކަސް ދަމަހައްޓައިގެން މަސައްކަތް ކުރުން ކަމަށް އަންހެން ޓީމުގެ ކޯޗު، ތައިލެންޑްގެ ވިޗީޕޮން ފޯންޗާޓްޔިންޗީޕް ބުނެފި އެވެ.
ތައިލެންޑްގެ ތަޖުރިބާކާރު ކޯޗު، ވިޗީފޮން ޓީމާ ހަވާލުވެ، މަސައްކަތް ފެށިތާ ދޮޅު މަސްތެރޭ ފުރަތަމަ މުބާރާތާ ކުރިމަތިލާއިރު، މިހާތަނަށް ޕްރެކްޓިހުގައި ފެނުނު ކަންކަމާ މެދު އޭނާ ހިތްހަމަޖެހެ އެވެ.
"ޓީމެއް ތައްޔާރުކޮށް، އެކުލަވާލަން ބެލިއިރު އަހަންނަށް އެންމެ މުހިންމު ކަމަކަށް ފެނުނީ ފިޓްނަސް ރަނގަޅުކުރުން. ކުޅުންތެރިން ފިޒިކަލީ މި ބޭނުންވާ ލެވަލަށް ގެންދިއުން. އެކަން ކުރެވޭ، ދެން އޮތީ މެޗަށް ތައްޔާރުވުން، އެކަން މެންޓަލީ ވެސް ފިޒިކަލީ ވެސް ރަނގަޅުކުރަން އަހަރެން މި އަންނަނީ މަސައްކަތް ކުރަމުން،" ތައިލެންޑްގެ ގައުމީ ލެވަލްގެ މުބާރާތްތަކުގެ ތަޖުރިބާ ބޮޑު ވިޗީފޮން ބުންޏެވެ.
"ޓެކްޓިކަލީ ނޫނީ އެހެން ގޮތަކަށް ޓީމަށް ބަދަލެއް ގެެންނަން ޖެހިއްޖެނަމަ އެ ހާލަތަށް ވެސް ތައްޔާރުވެވޭނެ ވިސްނުމެއްގައި އަހަރެމެން މި ތިބީ. އެޓޭކް ރަނގަޅުކުރަން ވިޔަސް ޑިފެންސަށް ބެލިޔަސް އޮޕްޝަން ހުރުން މުހިންމު،"
ކާވާ ޗެެލެންޖް ކަޕްގައި ރާއްޖެ ހިމެނެނީ ކަޒަކްސްތާން، އުޒްބެކިސްތާން އަދި ސްރީ ލަންކާއާ އެއް ގްރޫޕެއްގަ އެވެ. އެ ގޮތުން، ރާއްޖެ ގަޑިން މިއަދު 18:15 ގައި ކަޒަކްސްތާނާ ދެކޮޅަށް އަންހެން ވޮލީ ޓީމު ނުކުންނާނެ އެވެ. އެ އަށް ފަހު، ދެ ވަނަ މެޗުގައި މާދަމާ ހަވީރު 5:45 ގައި ރާއްޖޭން ބައްދަލުކުރާނީ އުޒްބެކިސްތާނާ އެވެ. އަދި ގްރޫޕް ފަހު މެޗުގައި، ބުދަ ދުވަހު 5:45 ގައި ކުޅޭނީ ލަންކާއާ އެވެ.
ވިޗީޕޮން ބުނީ ވާދަކުރަން ޖެހޭ ޓީމުތަކުގައި ތިބީ ރާއްޖެ އަށް ވުރެ އިސްކޮޅުން ދިގު ކުޅުންތެރިން ކަަމަށާއި އެ ކަންކަމަށް ބަލާއިރު ހުރި ޗެލެންޖް ބޮޑު ކަމަށެވެ. އެކަމަކު، އެއީ އެހާ ބޮޑަށް ސަމާލުކަން ދޭނެ ކަމެއް ނޫން ގޮތުގައި ފާހަަގަކޮށް ވިޗީޕޮން ބުނީ ވިސްނުމަކީ ކުރެވުނު އެންމެ ރަނގަޅަކަށް މަސައްކަތް ކޮށްގެން ޓާގެޓަށް ވާސިލްވުން ކަަމަށެވެ.
"އަހަރެމެން ފޯކަސް ބަހައްޓަން ޖެހޭ ކަންކަން އެބަހުރި. މިސާލަކަށް ސާވިސް، ދެން ރިސީވް ވެސް. މި އަށް ފޯކަސް ކޮށްގެން ކުޅެފިއްޔާ އަހަމެންނަށް ވާނެ،" ވިޗީފޮން ބުންޏެވެ.
ކަޒަކްސްތާން މެޗަށް ފަހު ދެން ކުޅެން ޖެހޭ އުޒްބެކިސްތާނާއި ލަންކާ މެޗާ ބެހޭގޮތުން ވެސް ކުއްލިއަކަށް ވާހަކަ ދައްކަން އުނދަގޫވާނެ ކަމަށާއި އެ މީހުން މުބާރާތުގައި ފުރަތަމަ ކުޅޭ މެޗުތައް ފެނުމުން އެ ޓީމުތަކާ ބެހޭގޮތުން ވާހަކަ ދެއްކޭނެ ކަމަށް ވިޗީފޮން ވަނީ ބުނެފަ އެވެ.
ވިޗީފޮން ބުނީ ބޭނުމަކީ މެޗުން މެޗަށް ކަންކަން ރަނގަޅުކުރުން ކަމަށާއި އެ ހިތްވަރާއި ޖޯޝް ކުޅުންތެރިންގެ ކިބައިން ފެންނަ ކަމަށެވެ.
ނޭޕާލުގެ ކަތުމަންޑޫގައި މި މަހު 28 ވަނަ ދުވަހުގެ ނިޔަލަށް ކުރިއަށްދާ ކާވާ ޗެލެންޖް ކަޕްގެ ގްރޫޕް އޭގައި އޮތީ މުބާރާތް ހޯސްޓްކުރާ ނޭޕާލް އާއި އިންޑިއާގެ އިތުރުން ބަންގްލަދޭޝް އަދި ކިރްގިސްތާން އެެވެ.
