ލަންޑަން (މެއި 19) - އިނގިރޭސި ޕްރިމިއާ ލީިގުގައި ލިވަޕޫލުން ޓޮޓެންހަމް ހޮޓްސްޕާސް އަތުން މޮޅުވި މެޗަށް ފަހު ލިވަޕޫލްގެ ކޯޗު ޔާގެން ކްލޮޕް، އެ މެޗުގެ ރެފްރީ ޕޯލް ޓިއާނީއާ ބެހޭގޮތުން ދެއްކި ވާހަކައިގެ މައްސަަލަ ބަލައި، އޭނާ ދެ މެޗަށް ސަސްޕެންޑް ކުރުމުގެ އިތުރުން 93000 ޑޮލަރުން ޖޫރިމަނާކޮށްފި އެވެ.
މިދިޔަ މަހު ފަހުކޮޅުގައި އަމިއްލަ ދަނޑުގައި ލިވަޕޫލުން ލަނޑު ޖަހައި، 4-3 އިން ޓޮޓެންހަމް ބަލިކުރި މެޗުގައި ލިވަޕޫލް މޮޅުކޮށްދިން ލަނޑު ޑިއޯގޯ ޖޮޓާ ޖެހިއިރު، ކްލޮޕް ވަނީ މެޗުގެ ހަތަރު ވަނަ އޮފިޝަލް ޖޯން ބްރޫކްސް ކުރިމައްޗަށް ގޮސްފަ އެވެ. އަދި ދުވެފައި ދިޔަ ވަގުތު، ކްލޮޕް އަށް ކޮންމެ ވެސް ވަރެއްގެ އަނިޔާއެއް ވެސް ވަނީ ވެފަ އެވެ.
އެ މެޗަށް ފަހު ކްލޮޕް ވަނީ މެޗުގައި އިންސާފުކުރި ރެފްރީ ޓިއާނީއާ ބެހޭގޮތުން ވެސް ވާހަކަ ދައްކައިފަ އެވެ.
"ޓިއާނީއާ އެކު އަހަރެމެންގެ ކަންތައްތަކެއް އެބަހުރި މާޒީގައި ހިނގާފައި، އެއްވެސް ކަމެއް ނެތޭ ޓިއާނީ ބުނި ކަމުގައި ވިޔަސް އަހަންނަށް ގަބޫލެއް ނުކުރެވޭ. އޭނަ އަހަންނާ ދިމާލަށް އެ ބަލާ ގޮތް އަހަންނަށް ކަމަކު ނުދޭ. ރަނގަޅު ވާހަކައެއް، އަހަރެން އުފާފާޅުކުރި ގޮތް ރަނގަޅެއް ނޫން. އެކަމަކު، އެ ވަގުތު ޓިއާނީ އައިސް އަހަންނާ ދިމާލަށް އެ ބުނި އެތި ބުނެފައި ރީނދޫ ކާޑު ދެއްކުން އޯކޭއެއް ނޫން،" ޓޮޓެންހަމް މެޗަށް ފަހު، ސްކައި ސްޕޯޓްސް އަށް ދިން އިންޓަވިއުގައި ކްލޮޕް ބުންޏެވެ.
އެ މައްސަލަ ބެލުމަށް ފަހު އިނގިރޭސި އެފްއޭ އިން ނިންމީ ކްލޮޕަށް ދެ މެޗުގެ ސަސްޕެންޝަނަކާ އެކު، ޖޫރިމަނާއެއް ކުރުމަށެވެ. އެ ގޮތުން ޑިސިޕްލިނަރީ ކޮމިޓީގެ ނިންމުމަކީ ކްލޮޕަށް ދިން ސަސްޕެންޝަންގެ އެއް މެޗަށް ވަގުތުން އަމަލުކުރުމަށެވެ. މާނަ އަކީ މި ހޮނިހިރު ދުވަހުގެރޭ ލީގުގައި ލިވަޕޫލުން އެސްޓަން ވިލާއާ ކުޅޭ މެޗަށް ކްލޮޕަށް ބެންޗަށް ނުދެވޭނެ އެވެ. ސަސްޕެންޝަނުގައި ހިމެނޭ ދެ ވަނަ މެޗު ގުނާނީ ކްލޮޕްގެ މި ފަދަ މައްސަލައެއް ތަކުރާރުވެއްޖެނަމަ އެވެ.
އިނގިރޭސި އެފްއޭ އިން ކްލޮޕަށް ފިޔަވަޅު އެޅުމަށް ފަހު، އާންމުކުރި ބަޔާނުގައި ބުނެފައިވަނީ ކްލޮޕް ދެއްކި ވާހަކައިގެ ސަބަބުން ރެފްރީންގެ އިންސާފުވެރިކަމާ މެދު ގިނަ ބަޔަކު ސުވާލު އުފައްދާނެ ކަމަށާއި އެ ފަދަ މަގާމެއްގައި ހުރެ ކްލޮޕަށް އެ ފަދަ ވާހަކައެއް ދެއްކުމުގެ ފުރުސަތެއް ނެތް ކަމަށެވެ. އަދި ކުރިއަށް އޮތްތަނުގައި އެ ފަދަ ކަމެއް ތަކުރާރުވެއްޖެނަމަ ދެން އަޅާ ފިޔަވަޅު ބޮޑުވާނެ ކަމަށް ވެސް ބަޔާނުގައިވެ އެވެ.
