މެންޗެސްޓާ (މެއި 18) - ޔުއެފާ ޗެމްޕިއަންސް ލީގުގައި ރޭ ރެއާލް މެޑްރިޑް އަތުން 4-0 އިން ތާރީހީ ބޮޑު މޮޅެއް ހޯދަން މެންޗެސްޓާ ސިޓީން ކުރި މަަސައްކަތަށް ސެލިއުޓް ކުރަންޖެހޭ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ދެ ލެގަށް ބަލާއިރު، ސިޓީން މި ވަނީ ރެއާލް އަތުން 5-1 ގެ އެގްރިގޭޓުން މޮޅުވެފަ އެވެ. ސިޓީން އެ ކްލަބްގެ ތާރީހުގައި ދެ ވަނަ ފަހަރަށް ފައިނަލުގައި ކުޅެން ތައްޔާރުވާއިރު، މިއީ އެ ކްލަބުން ޗެމްޕިއަންސް ލީގުގެ ފައިނަލަށް ދިއުމުގައި ތަފާތު ފޯމެއްގައި ކުޅެމުން އަންނަ ފަހަަރެކެވެ.
އިނގިރޭސި ޕްރިމިއާ ލީގުގެ ޗެމްޕިއަންކަން ޖެހިޖެހިގެން ތިން ފަހަރަށް ހޯދުމުގެ ފުރުސަތު އޮތް ސިޓީ އަށް އެފްއޭ ކަޕް ކާމިޔާބު ކުރުމާއި ޗެމްޕިއަންސް ލީގުގެ ތަށި އުފުލާލުމުގެ ފުރުސަތު ވެސް އެބައޮތެެވެ. ތިން ތަށްޓާ އެކު ސީޒަން ނިންމާލުމުގެ އުންމީދުގައި ހުރި ގާޑިއޯލާ އަށް މި ވަގުތު އޮތް އެންމެ ބޮޑު އުފަލަކީ ރެއާލް އަތުން ލިބުނު ބޮޑު މޮޅެވެ.
"އަހަރެމެން ބަނޑުގައި ހުރި ރިއްސުމެއް އަހަރެއް ފަހުން ދިޔަ ކަމުގެ އިހުސާސް ކުރެވެނީ، މިދިޔަ އަހަރުގެ އެ ބަލީގެ ހަނދާންތައް މިހާރު މުޅިން ހެން ގޮސްފި ކަހަލަ،" މިދިޔަ އަހަރުގެ ޗެމްޕިއަންސް ލީގުގެ ސެމީ ފައިނަލުގައި ފަހު ވަގުތު ރެއާލް އަތުން ކެޓި މެޗަށް އިޝާރާތްކޮށް ގާޑިއޯލާ ބުންޏެވެ.
"މިދިޔަ އަހަރު މެޗުގައި އެ ވީ ގޮތުން، ސިޓީގެ ކުޅުންތެރިންނަށް ގިނަ ފާޑުކިޔުންތަކެއް އަމާޒުވި، އަހަރެން އޭރު ވެސް ހުރީ މި ކުޅުންތެރިންނާ އެކު، އަދިވެސް މި ހުރީ އެ ގޮތުގައި، މި މެޗުގައި އެ ކުޅުންތެރިން އެ ކުރި މަސައްކަތާއި އެ ލީ ހިތްވަރަށް އަހަރެން ސެލިއުޓް ކުރަން،"
އާންމު ގޮތެއްގައި ޗެމްޕިއަންސް ލީގުގެ ފައިނަލަށް ދިއުމަކީ ވަރަށް ބޮޑަށް އުފާފާޅުކުރަން ޖެހޭނެ ކަމެއް ނަމަވެސް މި ވަގުތު ސިޓީ އަށް އެކަން ކުރެވެން ނެތީ ކުރިއަށް މުހިންމު މެޗުތަކެއް ހުރުމުން ކަމަށެވެ. އަދި ޕްރިިމިއާ ލީގުގައި ކުރިއަށް އޮތީ ވަރުގަދަ މެޗުތަކެއް ކަމަށް ގާޑިއޯލާ ވަނީ ބުނެފަ އެވެ.
ތުރުކީގެ އިސްތަންބޫލްގައި އަންނަ މަހުގެ 11 ވަނަ ދުވަހު ކުޅޭ ފައިނަލުގައި ސިޓީން ބައްދަލުކުރާނީ އިޓަލީގެ އިންޓަ މިލާންއާ އެވެ. ގާޑިއޯލާ ބުނީ ފައިނަލެއްގައި އިޓަލީގެ ޓީމަކާ ދެކޮޅަށް ކުޅުމަކީ ފަސޭހަ ކަމެއް ނޫން ކަމަށާއި ސީދާ އެ މެޗާ މެދު ވިސްނާނީ ވަގުުތު އައިސް ޖެހުމުން ކަމަށެވެ.
