މެންޗެސްޓާ (މެއި 17) - ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި މިރޭ މެންޗެސްޓާ ސިޓީ އާއި ރެއާލް މެޑްރިޑް ކުރިމަތިލާއިރު، މިއީ ޔޫރަޕްގައި މި ވަގުތު އޮތް އެންމެ މޮޅު ދެ ޓީމުގެ ކުރިމަތިލުމެއް ކަމަށް ރެއާލްގެ ކޯޗު ކާލޯ އަންޗެލޮޓީ ބުނެފި އެވެ.
ސިޓީގެ ދަނޑުގައި މިރޭ މި ދެ ކްލަބު ކުރިމަތިލާއިރު، ރެއާލްގެ ދަނޑުގައި ކުޅުނު ފުރަތަމަ ލެގު ވަނީ 1-1 އިން އެއްވަރުވެފަ އެވެ. އެހެންކަމުން، މިރޭ ކޮންމެ ޓީމެއް މޮޅުވިޔަސް، އަންނަ މަހު 11 ވަނަ ދުވަހު އިންޓަ މިލާނާ ދެކޮޅަށް ފައިނަލުގައި ކުޅެން ފުރުސަތު ލިބޭނެ އެވެ.
މިދިޔަ ސީޒަންގެ ޗެމްޕިއަންސް ލީގުގެ ސެމީ ފައިނަލްގައި ސިޓީ ވަނީ ރެއާލް އަތުން ބަލިވެފަ އެވެ. އެހެންކަމުން، މިއީ ސިޓީ އަށް ރެއާލް އަތުން ބަދަލު ހިފުމަށް ލިބޭ ރަނގަޅު ފުރުސަތެކެވެ.
މެޗުގެ ކުރިން ވާހަކަދައްކަމުން އަންޗެލޮޓީ ބުނީ މިއީ ޔޫރަޕްގައި މި ވަގުތު އޮތް ދެ ޓީމުގެ ކުރިމަތިލުމެއް ކަމަށެވެ. އަދި ރަނގަޅު މެޗެއް ފެންނާނެ ކަމުގެ އުންމީދު ބޮޑު ކަމަށް ވެސް އަންޗެލޮޓީ ވަނީ ބުނެފަ އެވެ.
"މިއީ ޔޫރަޕްގައި މި ވަގުތު އޮތް އެންމެ މޮޅު ދެ ކްލަބު. ވަރަށް ބަލާހިތްވާ ކަހަކަ މެޗަކަށްވާނެ،" އަންޗެލޮޓީ ބުންޏެވެ.
ސިޓީ އެންމެ ފަހުން ކުޅުނު 22 މެޗުން ވެސް ބަލިނުވާއިރު، އެ ޓީމަށް މި ސީޒަންގައި ޕްރިމިއާ ލީގާއި އެފްއޭ ކަޕް އަދި ޗެމްޕިއަންސް ލީގު ކާމިޔާބުކުރުމުގެ ފުުރުސަތު އެބައޮތެވެ.
ސްޕެއިނުގެ ކާމިޔާބު ކޯޗު، ޕެޕް ގާޑިއޯލާގެ އިރުޝާދުގެ ދަށުން ސިޓީން އިނގިރޭސި ޕްރިމިއާ ލީގުގެ އެއް ވަނަ ޓީމުގެ ގޮތުގައި އޮތް ނަމަވެސް، އަދި ޔޫރަޕްގެ މުބާރާތެއްގައި ކާމިޔާބެއް ނުލިބެއެވެ.
އަނެއްކޮޅު ރެއާލަކީ ޔޫރަޕްގައި އެންމެ ކާމިޔާބު ކްލަބެވެ. މިހާތަނަށް ޖުމްލަ 14 ފަހަރު އެ ޓީމުން ޗެމްޕިއަންސް ލީގު ކާމިޔާބުކޮށްފައިވާއިރު، ފާއިތުވި ނުވަ ސީޒަންގައި އެ ކްލަބުން ވަނީ ފަސް ފަހަރު ޗެމްޕިއަންސް ލީގު ކާމިޔާބުކޮށްފަ އެވެ.
ރެއާލްގެ ތަޖުރިބާކާރު މިޑްފީލްޑަރު ލޫކާ މޮޑްރިޗް ބުނީ ޗެމްޕިއަންސް ލީގުގެ ސެމީ ފައިނަލަށް ރެއާލް އަލެއް ނުވާނެ ކަމަށާއި ރެއާލަށް ހާސްކަމެއް ނެތް ކަމަށެވެ.
"ސެމީ ފައިނަލްތަކަކަށް ރެއާލް އަލެއްނުވާނެ. އަހަރަމެންނަށް އިތުބާރު އެބައޮތް އެހެންވީމަ މި ތިބީ ވަރަށް ހަމަޖެހިގެން،" މޮޑްރިޗް ބުންޏެވެ.
ސިޓީއާ ދެކޮޅަށް ނުކުންނައިރު ރެއާލްގައި އަނިޔާގެ މައްސަލައެއް ނެތެވެ. ލީގުގައި އާދިއްތަ ދުވަހު ގެޓާފޭއާ ދެކޮޅަށް ކުޅުނު މެޗުގައި އަނިޔާވި އެޑުއާޑޯ ކަމަވިންގާ ވެސް މިރޭގެ މެޗަށް ފިޓުވާނެ އެވެ. އަނެއްކޮޅުން ސިޓީ އަށް ވެސް މާ ބޮޑު އަނިޔާގެ މައްސަލައެއް ނެތެވެ. ސިޓީ އާއި ރެއާލް ކުޅޭ މެޗު ފަށާނީ މިއަދު ރާއްޖެ ގަޑިން 00:00 ގަ އެވެ.
