މިލާން (މެއި 16) - ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި މިރޭ އިންޓަ މިލާނާ ދެކޮޅަށް އޭސީ މިލާނުން ކުޅޭ މެޗަށް ނުކުންނައިރު، އެ ޓީމުން އެންމެ ބޮޑަށް ބަލަމުން އަންނަ އެއް ކަމަކީ އެ ޓީމުގެ ތަރި ރަފައެލް ލެއާއޯ މި މެޗަށް ފިޓްވެ، ކުޅެވުން ކަމަށް ދޭހަވާ ގޮތަށް މިލާނުގެ ކޯޗު ސްޓެފާނޯ ޕިއޯލީ ވާހަކަ ދައްކައިފި އެވެ.
އިޓާލިއަން ލީގުގައި މި މަހު ހަ ވަނަ ދުވަހު، ލާޒިއޯ އަތުން މިލާން މޮޅުވި މެޗުގައި ލެއާއޯގެ ފަލަމަސްގަނޑަށް ލިބުނު އަނިޔާގެ ސަބަބުން މިދިޔަ ހަފްތާގައި ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި އިންޓައާ ކުޅުނު މެޗުގައި ނުކުޅެވުނެވެ. ފުރަތަމަ ލެގުން އިންޓަ އިން ވަނީ 2-0 އިން މިލާން ބަލިކޮށްފަ އެވެ. އެހެންކަމުން، ހަތް ފަހަރު ޗެމްޕިއަންސް ލީގުގެ ތަށި އުފުލާލައިފައިވާ މިލާނުން އަނެއްކާ ވެސް ފައިނަލަކަށް ދެވެން އޮތީ މިރޭގެ މެޗުން ދެ ގޯލުގެ ނަތީޖާއެއް އަނބުރާލައިގެންނެވެ.
ފައިނަލަށް ދިއުމުގެ އުންމީދު އެބައޮތް ކަމަށް ބުނެ، ޕިއޯލީ ވަނީ އެ ޓީމުގައި މި ވަގުތު އަނިޔާގައި ހުރި ކުޅުންތެރިންގެ ފިޓްނަސް ރަނގަޅުވަމުން އަންނަ ވާހަކަ ދައްކައިފަ އެވެ، އޭގެ ތެރެއިން އެންމެ މުހިންމު ކުޅުންތެރިއަކީ ލެއާއޯ އެވެ.
"ލެއާއޯ ވެސް ރަނގަޅު، ހަމަ ކްރުނިޗް އާއި މެސިއަސް ވެސް އެ ގޮތަށް، ހުރިހާ ކަމެއް ރަނގަޅަށް ގޮސްފިނަމަ އެ އެންމެންނަށް ވެސް މެޗުގައި ކުޅެވޭނެ،" ޕިއޯލީ ބުންޏެވެ.
މިދިޔަ ހަފްތާގައި ފުރަތަމަ ލެގުން ބަލިވި މެޗަށް ފަހު ޕިއޯލީ ވަނީ ޓީމުގެ ފަރާތުން ފެނުނު ބައެއް ކަންތައްތަކާ މެދު ހިތްހަމަނުޖެހުން ފާޅުކޮށްފަ އެެވެ. ޕިއޯލީ ބުނީ ނަތީޖާ އަނބުރާލައި ފައިނަލަށްދާނަމަ މިލާނަށް ދެން އިތުރު ގޯހެއް ހަދައިގެން ސަލާމަތްވެވޭނެ ފުރުސަތެއް ނެތް ކަމަށެވެ.
"ފަރުވާ ބަހައްޓައިގެން ޕްލޭނާ އެއްގޮތަށް ގޮސްގެން މިކަން ކުރެވޭނެ،" ޕިއޯލީ ބުންޏެވެ.
އިންޓަ މިލާނުން މަސައްކަތް ކުރަމުން އަންނަނީ 2010 ވަނަ އަހަރުގެ ފަހުން ފުރަތަމަ ފަހަރަށް ޗެމްޕިއަންސް ލީގުގެ ފައިނަލަށް ދިއުމަށެވެ. އިންޓަގެ ކޯޗު ސިމޯން އިންޒާގީ ބުނީ ފުރަތަމަ މެޗުގެ ނަތީޖާ އަކީ އެޑްވާންޓޭޖެއް ނަމަވެސް އެ އަށް ވިސްނައިގެން މި މެޗުގެ ޕްލޭންތައް ނުހަދާނެ ކަމަށެވެ. މިލާނަކީ ޗެމްޕިއަންސް ލީގުގައި ކާމިޔާބު ތާރީހެއް އޮތް ޓީމެއް ކަމަށާއި އިންޓަ އިން މި މެޗުގައި ސަމާލުވާން ޖެހޭނެ ހުރިހާ ކަމަކަށް ވިސްނައި، ކުޅޭނީ މޮޅުވާން ކަމަށް އިންޒާގީ ވަނީ ބުނެފަ އެވެ.
މިރޭގެ މެޗަށް ނުކުންނައިރު، އިންޓަ އިން ވަނީ ހުރިހާ މުބާރާތެއްގައި އެންމެ ފަހުން ކުޅުނު ހަ މެޗުން ވެސް މޮޅުވެފަ އެވެ.
އިޓަލީގެ ފުޓްބޯޅައިގެ ސިޓީއެއް ގޮތުގައި އޮތް، މިލާނަށް ނިސްބަތްވާ ދެ ޓީމު، އިންޓަ އާއި މިލާންގެ މެދުގައި މިހާތަނަށް 236 މެޗު (ރަސްމީކޮށް ސްޓެޓްސް ނަގަން ފެށިފަހުން) ކުޅެވިފައިވާއިރު، އިންޓަ 88 މެޗުން އަދި މިލާން 79 މެޗުން ވަނީ މޮޅުވެފަ އެވެ. އަދި 69 މެޗު ނިމުނީ އެއްވަރުވެގެންނެވެ.
މިލާނާއި އިންޓަ ކުޅޭ ސެމީ ފައިނަލް ދެ ވަނަ ލެގު ފަށާނީ މިރޭ 00:00 ގަ އެވެ.
