މިރޭ ކްލަބް ވެލެންސިއާ އަތުން 3-0 އިން މޮޅުވެ، ކްލަބް އީގަލްސް އިން އެމްޑަބްލިއުއެސްސީ ދިވެހި ޕްރިމިއާ ލީގުގައި ކުޅުނު ދެ މެޗުން ވެސް މޮޅުވެ، ލީގުގައި އެ ޓީމުގެ ރަނގަޅު ފޯމު ދަމަހައްޓައިފި އެވެ.
ދިވެހި ޕްރިމިއާ ލީގުގެ ފުރަތަމަ ދެ މެޗު ހަފްތާގެ ކުޅުން ނިމުުނުއިރު، ދެ މޮޅު ހޯދީ ތިން ޓީމެކެވެ. އެއީ އެންމެ ފަހުގެ ޗެމްޕިއަން އަދި އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އާއި ސުޕަ ޔުނައިޓެޑް ސްޕޯޓްސް (ސަސް) އަދި އީގަލްސް އެވެ. ލީގުގެ އަށް ޓީމުގެ ތެރެއިން މެޗަކުން މޮޅެއް ނުލިބި އޮތް ތިން ޓީމުގެ ތެރޭގައި ވެލެންސިއާ ހިމެނެ އެވެ.
ވެލެންސިއާ މި ފަަހަރު ލީގުގައި 14 އަހަރުގެ ގިނަ ކުޅުންތެރިންތަކެއް ހިމެނޭ ސްކޮޑަކާ އެކު ކުޅޭއިރު، މި ސީޒަނަށް އެ ޓީމަށް ގެނައި ތަޖުރިބާކާރު ކުޅުންތެރިންނަށް ރަޖިސްޓްރޭޝަން މައްސަަލައިގެ ސަބަބުން ނުކުޅެވެ އެވެ. އެއީ ކުޅުންތެރިންނަށް ނުދީ ހުރި މުސާރަ މައްސަލައެއްގެ ސަަބަބުން އާ ކުޅުންތެރިން ރަޖިސްޓްރީ ކުރެވެން ނެތީ އެވެ.
ވެލެންސިއާގެ ދެ ކުޅުންތެރިން ކައިރިން އީގަލްސްގެ ރިޒޭ (މ) ބޯޅަ ހިފައިގެންދަނީ.--- ފޮޓޯ: އަބްދުﷲ އިޔާން/ އަދަދު
ގަލޮޅު ދަނޑުގައި މިރޭ ގިނަ ވަގުތު ވިއްސާރަ ތެރޭގައި ކުޅުނު މެޗުގެ 43 މިނިޓާ ހަމައަށް އީގަލްސް ހުއްޓުވުމުގައި ވެލެންސިއާ އިން ކާމިޔާބު ހޯދި އެވެ. އެކަމަކު، ފުރަތަމަ ހާފު ނިމެން ދެ މިނިޓަށް ވެފައި ހުއްޓައި، އީގަލްސްގެ ބްރެޒިލް ފޯވާޑް އިވާން ކާލޯސް ވަނީ އެ ޓީމަށް ގޯލެއް ޖަހައިދީފަ އެވެ. އީގަލްސްގެ ކެޕްޓަން، އަހުމަދު ރިޒުވާން (ރިޒޭ) އަމިއްލަ ހާފުގެ ތެރެއިން މަތިމަތިން ކުޅުނު ބޯޅައެއް ޑިފެންސްކުރަން ވެެލެންސިއާގެ ޑިފެންޑަރު އަމްދާން އަލީ (އެންޑީ) ޖައްސާލި ބޯޅަ ހޯދައި، އިވާން އެއް ފަހަރުން ޖެހި ބޯޅަ އަމާޒުވީ ގޯލުގެ ކަނަށެވެ.
މެޗުގެ 64 ވަނަ މިނިޓްގައި އީގަލްސްގެ ދެ ވަނަ ގޯލު ޖެހީ މެޗުގެ މޮޅު ކުޅުންތެރިޔާ ރިޒޭ އެވެ. ވެލެންސިއާގެ ކެޕްޓަން، ހަސަން ސުފިއާން (ސޫފީ) އަތުގައި ބޯޅައިން ޖެހުމުން ދިން ޕެނަލްޓީ ރިޒޭ ވަނީ ގޯލަށް ފޮނުވާލައިފަ އެެވެ. އެ ބޯޅަ ގޯލަށް ވަނީ ކީޕަރު އާދަމް އިމްއާން އަތުގައި ޖެހިފަ އެވެ.
އީގަލްސްގެ ފަހު ގޯލު ޖެހީ އިބްރާހިމް މަހުދީ ހުސެއިން (ފޭދޫ އިއްބެ) އެވެ. މިއީ އޭރިއާތެރެއިން ރިޒޭ ތިރިތިރިން ނަގައިދިން ބޯޅައެއް ވެލެންސިއާ ޑިފެންޑަރުން ކައިރިން ގޮސް ފޭދޫ އިއްބެ އަށް ލިބުމުން ހުސްކޮށް އޮތް ގޯލެއްގެ ތެރެއަށް ބޯޅަ ފޮނުވާލައިގެން ޖެހި ގޯލެކެވެ.
