މެންޗެސްޓާ (މެއި 13) - މެންޗެސްޓާ ޔުނައިޓެޑަށް އަމިއްލަ ބާރުގައި މި ފަހަރުގެ އިނގިރޭސި ޕްރިމިއާ ލީގުގެ ގަދަ ހަތަރެއްގައި ނިންމޭނެ ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.
ލީގުގެ ގަދަ ހަތަރެއްގެ ފުރަތަމަ ދެ ޖާގަ މެންޗެސްޓާ ސިޓީ އާއި އާސެނަލުން ޔަގީންކޮށްފައިވާއިރު، ފަހު ދެ ޖާގަ އަށް ވާދަކުރަނީ ނިއުކާސަލް ޔުނައިޓެޑާއި މެންޗެސްޓާ ޔުނައިޓެޑްގެ އިތުރުން ލިވަޕޫލް އެވެ. ނިއުކާސަލް ތިން ވަނައިގައި އޮތީ 34 މެޗުން 65 ޕޮއިންޓް ހޯދައިގެންނެވެ. ހަތަރެއްގައި އޮތް ޔުނައިޓެޑަށް ވަނީ 34 މެޗުން 63 ޕޮއިންޓް ލިބިފަ އެވެ. ފަސް ވަނައިގައި އޮތް ލިވަޕޫލްގެ އޮތީ 35 މެޗުން 62 ޕޮއިންޓެވެ.
އެންމެ ފަހުން ކުޅުނު މެޗުތަކުގައި ލިވަޕޫލުން ނެރެމުން އަންނަ ނަތީޖާތަކާއި ޔުނައިޓެޑް މި ވަގުތު އޮތް ފޯމަށް ބަލާއިރު، ގަދަ ހަތަރެއްގައި ނިންމަން އެ ޓީމަށް އޮތް ޕްރެޝަރު އަންނަނީ ބޮޑުވަމުންނެވެ. އެކަމަކު، ޓެން ހާގް ބުނީ މާ ބޮޑު ހާސްކަމެއް ނެތް ކަމަށެވެ.
"އަހަރެމެން އެ ވާހަކަތައް (ލިވަޕޫލްގެ ފޯމުގެ ވާހަކަ) ދައްކަން ނެތިން. ތި ވާހަކަ މުުހިންމެއް ވެސް ނޫން. އަހަރެމެން އަތުގައި އަމިއްލަ ބާރު އެބައޮތް. އެ ބާރުގެ އެހީގައި ޓާގެޓަށް ވާސިލްވެވޭނެ، އެހެން ޓީމުތަކެއްގެ ނަތީޖާ އަށް ބަރޯސާވާން ޖެހޭނެ ކަމަށް ނުދެކެން،" ލީގުގައި މިރޭ ވުލްވްސްއާ ދެކޮޅަށް ކުޅޭ މެޗުގެ ކުރިން ޓެން ހާގް ބުންޏެވެ.
މި ވަގުތު ޔުނައިޓެޑުން ވިސްނަންވީ ކުރިއަށް އޮތް ކޮންމެ މެޗެއްގައި ވެސް ވީ އެންމެ ރަނގަޅަށް ކުޅެގެން ނަތީޖާ ނެރުމަށް ކަމަށް ޓެން ހާގް ބުނެފައިވެ އެވެ. އަދި ފަސޭހަކޮށްލައިގެން ކުޅެގެން ސީޒަންގެ މި ހިސާބުން އެއްވެސް މެޗަކުން މޮޅެއް ނުހޯދޭނެ ކަމަށް ވެސް ޓެން ހާގްގެ ވާހަކައިގައި ފާހަގަކޮށްފައިވެ އެވެ.
ޔުނައިޓެޑް ކުރިއަށްދާން ބޭނުންވާ މިސްރާބަށް ބަލާއިރު، ކަންކަން ހުރީ ރަނގަޅަށް ކަމަށް ފާހަގަކޮށް، ޓެން ހާގް ބުނީ އެ ކްލަބާ މަޝްހޫރު ކުޅުންތެރިން ގުޅެން ބޭނުންވާ ކަމަށެވެ.
ވުލްވްސްއާ ދެކޮޅަށް މިރޭ ރާއްޖެ ގަޑިން ހަތެއް ޖަހާއިރު ކުޅޭ މެޗުގައި ޔުނައިޓެޑްގެ ތަރި މާކަސް ރަޝްފޯޑަށް ކުޅެވުމުގެ ފުރުސަތު ކުޑަ އެވެ. އެކަމަކު، އެންމެ ފަހު ވަގުތު ހަދާ މެޑިކަލް ޓެސްޓްތަކުން ރަޝްފޯޑަށް ކުޅެވޭވަރު ވެއްޖެނަމަަ ބެންޗުން އޭނާ އަށް ފުރުސަތު ދޭނެ އެވެ.
ޕްރިމިއާ ލީގުގެ ރެލިގޭޝަންގެ ބިރުން ވުލްވްސް ސަލާމަތްވެފައިވާތީ، އެ ޓީމުގެ ކޯޗު ހުލެން ލޮޕެޓެގީގެ ވިސްނުމަކީ އެ ޓީމަށް ކުރިއަށްހުރި މެޗުތަކުން ކުރިން މެޗުތަކުގައި ބޭނުންނުކުރާ ކުޅުންތެރިންނަށް ކުޅުމުގެ ފުރުސަތު ދިނުމަށެވެ.
