ޓޯކިޔޯ، ޖަޕާން (މެއި 11) - ކެމްބޯޑިއާ ފުޓްބޯޅަ ޓީމުގެ މެނޭޖަރަކަށް ހުރެ، ކޯޗުގެ ޒިންމާ ވެސް އުފުލަމުން އައި ޖަޕާނުގެ މަޝްހޫރު ފުޓްބޯޅަ ތަރި، ކެސޫކޭ ހޮންޑާ، އަށް ނަތީޖާ ނުނެރެވި ކެމްބޯޑިއާގެ އެ މަގާމު ދޫކޮށްލަން ޖެހިއްޖެ އެވެ.
ފަސް އަހަރަށް ފަހު ކެމްބޯޑިއާގެ އެ މަގާމު ދޫކޮށްލަން، އުމުރުން 36 އަހަރުގެ ހޮންޑާ ނިންމި އެންމެ ބޮޑު ސަބަބަކީ އަމިއްލަ ގައުމުގައި ހޯސްޓްކުރި ސީ ގޭމްސްގެ ފުޓްބޯޅަ އިވެންޓްގައި އެކަށީގެންވާ ނަތީޖާ ނުނެރެވި، ގްރޫޕް ސްޓޭޖުން ވެސް ކެޓުމުންނެވެ.
ކޯޗިން ލައިސަންސްތައް ފުރިހަމަނުވާތީ، ކުރިން އޭސީ މިލާނަށް ވެސް ކުޅެފައިވާ ހޮންޑާ، ކެމްބޯޑިއާ ޓީމުގެ ކޯޗެއްގެ ޒިންމާ އަދާކުރަނީ ޓީމު ލިސްޓުގައި މެނޭޖަރެއްގެ ގޮތުގައި ރަޖިސްޓްރީވެ ހުރެ އެވެ.
ކެމްބޯޑިއާ ޓީމު މެނޭޖަރަކަށް ހުރެ ހޮންޑާ އެ ޓީމުގެ ކުޅުންތެރިންނަށް ކޯޗުކޮށްދެނީ.
ބާވީސް އަހަރުން ދަށުގެ ޓީމު ގޮވައިގެން ހޮންޑާ ވަނީ ސީގޭމްސްގައި ކެމްބޯޑިއާ ކުޅުނު ފުރަތަމަ މެޗުން ޓިމޯ ލެސްޓޭ އަތުން މޮޅުވެފަ އެވެ. އެކަމަކު، ދެ ވަނަ މެޗުގައި ފިލިޕީންސްއާ އެއްވަރުވެ، ފަހު ދެ މެޗުން އިންޑޮނީޝިއާ އާއި މިޔަންމާ އަތުން ބަލިވެ ކެޓީ އެވެ.
"ކެމްބޯޑިއާގައި މީގެ ފަސް އަހަރު ކުރިން 2018 ވަނަ އަހަރު ފެށި ޕްރޮޖެކްޓެއް މި އޮތީ ނިމިފައި،" ޓްވިޓާގައި ހޮންޑާ ކުރި ޕޯސްޓެއްގައިވެ އެވެ. "އެންމެ ފަހުން މި ނިމިދިޔަ މުބާރާތުގައި އަހަންނަށް އެކަށީގެންވާ ނަތީޖާތަކެއް ނޫން ނެރެދެވުނީ،"
ރިޕޯޓްތައް ބުނާގޮތުން ހޮންޑާގެ މި ނިންމުމަކީ ކެމްބޯޑިއާގެ ފުޓްބޯޅަ އެސޯސިއޭޝަން އިން ބޭނުންވާތީ އައި ނިންމުމެކެވެ.
ޖަޕާން ގައުމީ ޓީމަށް 98 މެޗު ކުޅުނު ހޮންޑާ ވަނީ ކްލަބް ކެރިއަރުގައި، ޖަޕާނާއި ނެދަލެންޑްސް، ރަޝިއާ، އިޓަލީ، މެކްސިކޯ، އޮސްޓްރޭލިއާ އަދި ބްރެޒިލްގެ ޓީމުތަކަށް ކުޅެފަ އެވެ.
