މިލާން (10 މެއި) - ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި މިރޭ އިންޓަ މިލާނާ ދެކޮޅަށް އޭސީ މިލާން ނުކުންނައިރު، މިއީ ދެ ޓީމަށް ވެސް ވަރަށް ހާއްސަ މެޗެއް ކަމަށާއި ރަނގަޅު ނަތީޖާއެއް ނެރެވޭނެކަމުގެ އުންމީދު ބޮޑު ކަމަށް މިލާންގެ ފޯވަޑް އޮލިވިއޭ ޖިރޫ ބުނެފި އެވެ.
މިލާނަށް ނިސްބަތްވެ، ޒަމާންވީ ވާދަވެރިކަމެއް އޮތް ދެ ކްލަބު ކުރިމަތިލާއިރު، މިއީ ދެ ޓީމަށް ވެސް ހާއްސަ މެޗެކެވެ. މެޗުގެ ކުރިން ޖިރޫ ބުނީ މި މެޗުން ރަނގަޅު ނަތީޖާއެއް ނެރެވޭނެކަމުގެ އުންމީދު ބޮޑު ކަމަށެވެ.
"މި މެޗަކީ ދެ ޓީމަށް ވެސް ހާއްސަ މެޗެއް. މިލާންގެ ޓީމާމެދު ވަރަށް ފަހުރުވެރިވޭ. ރަނގަޅު ނަތީޖާއެއް ނެރެވޭނެކަމުގެ އުންމީދު ބޮޑު،" ކުރިން ޗެލްސީ އާއި އާސެނަލް އަށް ވެސް ކުޅުނު ތަޖުރިބާކާރު ފޯވަޑް ޖިރޫ ބުންޏެވެ.
އުުމުރުން މިހާރު 36 އަހަރުގެ ޖިރޫ ބުނީ އުމުރުން ދޮށި ވިޔަސް، މެޗުތަކަށް ނުކުންނައިރު ހުންނަ "މޯޓިވޭޝަން" އަށް ބަދަލެއް ނާންނަ ކަމަށެވެ.
އޭސީ މިލާންގެ ކޯޗު ސްޓެފާނޯ ޕިއޯލީ އާށް މެޗުގެ ކުރިން އޮތް ނުތަނަވަސްކަމަކީ ޕޯޗުގަލްގެ ފޯވަޑް ރަފައެލް ލެއާއޯ މެޗަށް ފިޓުވާނެކަމުގެ ޔަގީންކަމެއް ނެތުމެވެ. އިޓާލިއަން ލީގުގައި އެންމެ ފަހުން ލާޒިއޯއާ ދެކޮޅަށް ކުޅުނު މެޗުގައި ލިއާއޯ އަށް ވަނީ އަނިޔާވެފަ އެވެ. އޭގެ ފަހުން އެނާ ފަރިތަކުރުންތަކުގައި ބައިވެރިވިޔަސް، މެޗުގައި އޭނާ އަށް ކުޅެވޭނެކަން އެނގޭނީ މިއަދު ޑޮކްޓަރުންނާ ވާހަކަދެއްކުމަށް ފަހު ކަމަށް ޕިއޯލީ ވަނީ ބުނެފަ އެވެ.
މިއީ، ޗެމްޕިއަންސް ލީގުގެ ނޮކައުޓް ބުރުގައި މިލާން ޑާބީއެއް ކުޅެވޭނެ ތިން ވަނަ ފަހަރެވެ. އެ ގޮތުން، 2002/2003 ވަނަ އަހަރުގެ ސެމީ ފައިނަލުގައި މިލާނުން ވަނީ އަވޭ ގޯލުން އިންޓަގެ މައްޗަށް ކުރިހޯދައިފަ އެވެ. އަދި 2004/2005 ވަނަ އަހަރުގެ ކުއާޓާ ފައިނަލުގައި ދެ ލެގަށް ބަލާއިރު، އިންޓަގެ މައްޗަށް މިލާނުން ކުރިހޯދީ 5-0 ގެ އެގްރިގޭޓް ނަތީޖާ އަކުންނެވެ.
މިލާނާއި އިންޓަ ކުޅޭ ސެމީ ފައިނަލް މެޗު ފަށާނީ މިރޭ ރާއްޖެ ގަޑިން 12 ޖަހާއިރު އެވެ.
