ޕެރިސް (މެއި 10) - ލިއޮނަލް މެސީ، އަންނަ ސީޒަނުގައި ބޮޑުު މުސާރަ ލިބޭ ކޮންޓްރެކްޓެއްގައި ސައުދީ ޕްރޯ ލީގުގެ ކްލަބަކަށް ކުޅެން ނިންމާފައިވާ ކަމަށް މަޝްހޫރު ނިއުސް އެޖެންސީ "އޭއެފްޕީ" އިން ރިޕޯޓްކޮށްފައިވަނިކޮށް، އެއީ ރަނގަޅު ހަބަރެއް ނޫން ކަމަށް މެސީގެ ބައްޕަ، ޖޯޖް މެސީ ބުނެފި އެވެ.
އަންނަ މަހު 36 އަހަރު ފުރޭ މެސީ މި ވަގުތު ކުޅެމުން އަންނަ ޕީއެސްޖީގައި ހުރި ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. މެސީ، ލައްވައި ޕީއެސްޖީން އާ ކޮންޓްރެކްޓެއްގައި ސޮއިކުރުވަން ކުރި މަސައްކަތުގައި އަލި މަގެއް ނުފެނެ އެވެ. އަދި ދާދި ފަހުން މެސީ ހުއްދަ ނުހޯދައި، ސްޕޮންސަޝިޕް ދަތުރެއްގައި ސައުދީ އަރަބިއްޔާ އަށް ދިއުމުން، ހުއްދަ ނުހޯދައި، ކުރި ދަތުރެއް ކަމަށް ބުނެ، ޕީއެސްޖީން މެސީ އަށް އަދަބު ދިނެވެ. އެހެންވެ، ދެން، މެސީ ޕީއެސްޖީއާ އެކު ކުރިއަށްނުދާނެކަން ވަނީ ޔަގީންވެފަ އެވެ.
ސައުދީގެ ރިޔާދު އޯލްސްޓާސް އާއި ޕީއެސްޖީ ކުޅުނު މެޗުގެ ތެރެއިން: މެސީ (ކ) އަތުން ބޯޅަ ހޯދަން ރޮނާލްޑޯ މަސައްކަތް ކުރަނީ.
ދުނިޔޭގެ ހަބަރު ފަތުރާ އެޖެންސީތަކުގެ ތެރެއިން މަޝްހޫރު، "އޭއެފްޕީ" އިން އިއްޔެ އާންމުކުރި ރިޕޯޓެއްގައި ބުނެފައިވަނީ މެސީ އަންނަ ސީޒަނުގައި ސައުދީ ލީގުގައި ކުޅެން ހުރިހާ ކަމެއް ނިމިފައިވާ ކަމަށެވެ. އެ ގޮތުން، މީޑިއާ ރިޕޯޓްތައް ބުނާގޮތުން މެސީ، ސައުދީގެ އަލް ހިލާލްއާ ގުޅޭ ޖުމްލަ ކޮންޓްރެކްޓްގެ އަގު 500 މިލިއަން ޑޮލަރަށް ވުރެ އިތުރުވާނެ ކަމަށް ވެސް ރިޕޯޓްތައް ބުނެ އެވެ.
އެ ހުރިހާ ވާހަކަ އަކަށް ހުއްޓުމެއް އައީ މެސީގެ ބައްޕަ، ޖޯޖް މީޑިއާގައި ވާހަކަ ދެއްކުމުންނެވެ. ޖޯޖް ބުނީ މެސީގެ މުސްތަގުބަލާ ގުޅޭ ކަންކަން ފައިނަލް ވާނީ މި ސީޒަން ނިމުމުން ކަމަށާއި އޭގެ ކުރިން އަވަސް އަރުވާލައިގެން ކުރަން ޖެހޭ އެއްވެސް ކަމެއް ނެތް ކަމަށެވެ.
މެސީއާ އެންމެ ވާދަވެރި ތަރި، ކްރިސްޓިއާނޯ ރޮނާލްޑޯ މި ވަގުތު ކުޅެމުން އަންނަނީ ސައުދީ ޕްރޮފެޝަނަލް ލީގުގެ ކްލަބް، އަލް ނަސްރު އަށެވެ. ރިޕޯޓްތައް ބުނާގޮތުން ސައުދީ ލީގަށް މެސީ ގެންދަނީ ރޮނާލްޑޯ އަށް ވުރެ ބޮޑު މުސާރައެއް ލިބޭ ގޮތަށެވެ.
ސައުދީ ލީގަށް މެސީ ބަދަލުވާނެ ކަމަށް ގިނަ މީޑިއާތަކުގައި އަޑުފެތުރިފައިވާއިރު، ސްޕެއިނުގެ މީޑިއާ ރިޕޯޓްތައް ބުނާގޮތުން ބާސެލޯނާ އިން އަންނަނީ ލަލީގާއާ އެކު މަޝްވަރާތަކެއް ކޮށްގެން އަލުން މެސީ ގެނެވޭތޯ އޮތް ފުރުސަތުތައް އޮޅުންފިލުވަމުންނެވެ.
